الرخامة لابسة جلابية ودقن

لو صادفت الإخوانى أو السلفى وقف مع شخص مش من هذا الفصيل ولا ذاك ليبرالى أناركى يسارى أو غير مؤدلج خالص وارتفع صوت الأذان فى المسجد مش حيسيب الشخص اللى واقف معاه ده أبداً ومش حيتقبل أنه يروح يصلى لوحده حينتابه إصرار غريب غريب وعجيب وأنه يأخده معاه حتى لو كان عارف ومتأكد أنه ما بيصليش وما بيركعهاش حياخده معاه غصب عنه ويمكن يحرجه كمان ويقول له: إيه يا راجل هو أنت مش مسلم؟
ينفع تسمع الأذان وما تدخلش الجامع تصلى وتأدى فرض ربنا فرضه عليك ده أول ما يحاسب عليه المرء يوم القيامة الصلاة الصلاة عماد الدين عيب عليك ياراجل أدى ربنا حقه زى ما بيرزقك وبيحميك وبيسر لك كل حياتك.
غصب عن الراجل ده حيدخل الجامع ويصلى مجبور مقهور ما هو الأخ السلفى أو الإخوانى لازم ياخد منه ثواب ثواب بالعافية ثواب غصب عنه رذالة رذالة وتناحة تناحة وغلاسة غلاسة ورخامة رخامة.