رمضان جه بعد طول انتظار.. وفي الشهر الكريم ده بنحب نكتر من العبادات والتقرب إلى الله.. نيتنا قبل الشهر ما يبدأ، أننا هنعمل كل حاجة.. هنقراء أجزاء كثيرة من القرآن.. وهنزود صلاتنا ونحسنها.. وهنزور ملاجئ للأيتام ونعمل خير هناك..
مش كده وبس بنقرر مع دخول الشهر إننا لازم ننزل نصلي التراويح، ونشارك في جمعية ولا اتنين نعمل معاهم شنط رمضان.. وغيرها كتير من الخطط الممتازة اللي كلنا بنعدّها لرمضان..
المشكلة بقى إن أغلبنا ما بيقدرش ينفّذ كل ده.. بندخل في دوامة.. الشغل.. المواصلات.. وقت رمضان بيعدي بسرعة... ونلاقي الشهر خلص من غير ما نعمل حاجة.. علشان كده فكرنا نكسب ثواب سوا.. إزاي؟!
كل يوم هنحدد حاجات بسيطة مافيهاش ضغط كبير.. ونعملها مع بعضينا، وهنيجي هنا ونحكي عملنا إيه، وشعورنا كان إيه علشان نشجع غيرنا.. وكمان هنقترح على بعض أفكار جديدة نقدر نعملها كل يوم..
وبكده نكسب ثواب الفعل وثواب النصيحة على فعل الخير..
وما نخرجش من رمضان من غير ما نعمل حاجة مفيدة لينا ولغيرنا..
*******************************
النهارده تعالوا نُحيي سُنّة الاعتكاف اليوم الحادي والعشرون
النهارده أول أيام العتق من النار -بإذن الله- يا ترى جربت تعتكف قبل كده؟؟ بالمناسبة الاعتكاف مش حكر بس على شهر رمضان، الاعتكاف في المساجد سنة في أي وقت، لكن إحنا اتعودنا أننا دايماً بنعتكف في شهر رمضان.. سامعاك دلوقتي بتقول: والله نفسي أعتكف بس أعمل إيه؟ الشغل ما اقدرش أسيبه، أو البيت والعيلة مالهمش حد يشوف طلباتهم غيري، أو حتى بتقول إن ماما وبابا مش هيسمحوا لك تسيب المدرسة وتعتكف، وأكيد إنك بتقول لي إن ظروف الأولاد والبيت ما تسمحش تنفصلي عنهم في آخر رمضان.. كلنا في الحقيقة بنصطدم بالمشاكل دي لما بنفكر في الاعتكاف.. لكن إيه رأيك بقى إن العلماء لما عرّفوا وقت الاعتكاف قالوا إن أقل وقت للاعتكاف ممكن يكون "لحظة" يعني إنت مش مطالب إنك تسيب بيتك أو شغلك أو مدرستك علشان تعتكف، إنت ممكن تقتطع كل يوم في العشرة الأواخر من وقتك ساعة واحدة بس، تروح فيها المسجد وتنوي الاعتكاف، وتقضي الساعة دي في التعبد وبعديها تفكّ الاعتكاف وتكمّل أمور حياتك وهكذا.. صدقني الدين يسر وإحنا اللي بنعقدّه.. أما لو أنت سيدة أو بنت صغيرة ومش هتقدري تعتكفي في المسجد فبعض العلماء أباحوا للست إنها تعتكف في مسجد بيتها، يعني المكان اللي بتصلي فيه في بيتها.. يعني تروحي تقعدي فيه وتنوي الاعتكاف، وتاخدي لك ساعة تعبّد وبعدها تقدري تكملي شغلك عادي، وتكرري ده كل ما يكون عندك وقت طول العشرة الأواخر.. إيه رأيكم بقى النهارده بإذن الله كلنا هناخد ساعة اعتكاف، ونقول لبعض بعدها حسينا بإيه؟؟
*******************************
النهارده هنصلي بجدّ.. هنفكّر في كل كلمة بنقولها وكل حركة بنعملها اليوم الثاني والعشرون
طبعًا كلنا هنا بنصلي، وحتى اللي بتضيع منه فروض فأكيد حريص ينتظم على الصلاة في رمضان وبإذن الله يواظب بعد كده على طول.. لكن تعالَ نفكر كده، يا ترى إحنا بنتمعّن في معنى الصلاة وهدفها، واحنا رايحين نصلي؟ ولا حركات بنعملها وقرآن بنقرأه من غير ما نركّز وخلاص؟؟ خلينا صرحاء مع بعض، أغلبنا بيصلي بسرعة علشان يسقط عنه الفرض، وكأنه حمل -لا قدر الله- وعايزين ننزله عن أكتافنا سريعاً.. علشان كده النهارده هنتفق سوا إننا هنصلي بجد، هنفكر في كل كلمة بنقولها وفي كل حركة بنعملها، من بداية الإقامة وتكبيرة الإحرام، لحد التسليم.. بص معايا كده على الحديث ده.. عن أبي هريرة رضي الله عنه قال: سمعت رسول الله -صلى الله عليه وسلم- يقول: قال الله تعالى: "قسمت الصلاة بيني وبين عبدي نصفين ولعبدي ما سأل، فإذا قال العبد: الحمد لله رب العالمين، قال الله تعالى: حمدني عبدي، وإذا قال: الرحمن الرحيم، قال الله تعالى: أثنى عليّ عبدي، وإذا قال: مالك يوم الدين، قال: مجّدني عبدي، -وقال مرة: فوّض إليّ عبدي- فإذا قال: إياك نعبد وإياك نستعين، قال: هذا بيني وبين عبدي ولعبدي ما سأل، فإذا قال: اهدنا الصراط المستقيم، صراط الذين أنعمت عليهم، غير المغضوب عليهم ولا الضالين، قال: هذا لعبدي ولعبدي ما سأل". [الحديث رواه الإمام مسلم وأصحاب السنن الأربعة]. يا ربّي!! ركزت في الحديث؟؟ فكّرت في جمال ورعة الحوار ده، وحسيت قد إيه جسمك بيقشعر لما تفكّر فيه.. زي ما قلنا النهارده وإحنا بنصلي هنفكر في أركان صلاتنا ركن ركن، وهنعملها بهدوء واطمئنان، وإحنا بنقرأ الفاتحة هنفتكر الحديث ده، ونفكر وكأننا بنسمع ربنا -سبحانه وتعالى- بيرد علينا.. تعالَ نجرب سوا النهارده ونقول لبعض حسينا بإيه. ليلة القدر: مش هننسى إن النهارده ليلة فردية علشان كده هنصلي ركعتين التهجّد وما ننساش نقول دعاء ليلة القدر طول اليوم.
*******************************
النهارده هنحاول سوا نوصل رحمنا!! اليوم الثالث والعشرون
النهارده هنفكر سوا في صلة الرحم.. للأسف كتير منا بيكون بيصوم ويصلي ويزكي، ولكن ييجي عند صلة الرحم وتاخده العزة بالإثم ويكابر ويقطعها..
علشان كده النهارده هنحاول سوا نوصل رحمنا.. لو فيه حد في عيلتك متخانق معاه ما تخليش النهارده يخلص من غير ما تزوره أو تتصل بيه وتصالحه، وصدقني إنت الكسبان لأنك وصلت رحمك..
أما لو الحمد لله مافيش بينك وبين حد خصومة، فإيه رأيك نزوّد من صلة الرحم ونوصلها أكتر..
فكر مين ليك بيه صلة رحم وبقالك كتير ماسألتش عليه، وقرر إنك تسأل عليه النهارده..
لو كان وقتك يسمح فكر تاخد له حاجة حلوة وتروح تزوره، أما لو كانت ظروفك مش هتسمح، فممكن بمكالمة تليفون سريعة تسأل عليه..
وتبقى كسبت النهارده ثواب صلة الرحم بإذن الله.
*******************************
طبعاً النهارده بعد الكلام ده مش هنتوضأ وخلاص إحنا هننوي بقلب فاهم هو بيعمل إيه اليوم الرابع والعشرون الوضوء.. كلنا بنتوضأ وخلاص، لكن ليه ما فكرناش في إن الوضوء ده مقدمة لبدء الصلاة وأننا بنستعد بالوضوء ده وبنغتسل علشان هنقف بين أيدين ربنا.. وطبعاً لازم نبدأ الوضوء بالنية وما ننساش إننا نقول دعاء الوضوء معانا.. "أَشْهَدُ أَن لاَ إلهَ إِلاَّ اللَّهُ وَحْدَهُ لاَ شَرِيكَ لَهُ، وَأَشْهَدُ أَنَّ مُحَمَّداً عَبْدُهُ وَرَسُولُهُ، اللَّهُمَّ اجْعَلْنِي مِنَ التَّوَّابِينَ، واجْعَلْنِي مِنَ المُتَطَهِّرينَ". وبعد ما نخلص وضوء نقول: "سُبْحَانَكَ اللَّهُمَّ وَبِحَمْدِكَ، أَسْتَغْفِرُكَ وَأَتُوبُ إِلَيْكَ". والحقيقة إن فيه مقولة ظريفة ممكن نفكر فيها قبل ما نبدأ وضوءنا -لكن لازم نعرف إنها مجرد مقولة، وإنها مش حديث أو دعاء أو سنة عن رسول الله- هي أدعية بنتخيل إن كل حركة من حركات الوضوء بتمثله، وده ممكن يقرب لنا فكرة الوضوء أكثر.. فمثلاً غسل اليدين: بيمثل اللهم ناولني الكتاب باليمين. المضمضة: اللهم ثبّت لساني بالنطق بالشهادة. الاستنشاق: اللهم استنشقني رائحة الجنة. الاستنثار: اللهم نجّني من رائحة الزقوم. غسل الوجه: اللهم بيّض وجهي يوم تسودّ وجوه وتبيضّ وجوه. غسل اليدين إلى المرفقين: اليد اليمنى: اللهم اجعلني من أصحاب اليمين، اليد اليسرى: اللهم نجّني من أصحاب الشمال. مسح الرأس: اللهم أعتق رقبتي من النار اللهم ردّني مردّ المؤمنين. غسل الرجلين: اللهم لا تزلّ قدمي عن الطريق المستقيم. تخيل أن كل حركة بتعملها في الوضوء لها تأثير عليك بالشكل ده، وإنها بتقربك خطوة علشان تدخل في الصلاة.. أما ثوابنا النهارده، فإننا نسبغ الوضوء في كل صلاتنا، النهارده مش مجرد هنتوضأ لا إحنا هننوي بقلب فاهم هو بيعمل إيه، وهنركز في كل حركة للوضوء، وهنقول الدعاء الخاص بالوضوء.. ونخلي وضوءنا النهارده حاجة مختلفة عن كل يوم. ليلة القدر: كالعادة مش هننسى إن النهارده ليلة فردية علشان كده هنصلي ركعتين التهجد، وما ننساش نقول دعاء ليلة القدر طول اليوم.
*******************************
الأذان مش مجرد تنبيه لينا فقط علشان نعرف ميعاد الصلاة.. اليوم الخامس والعشرون
الأذان.. بتسمع الأذان خمس مرات في اليوم مع كل صلاة ولكن يا ترى فكّرت فيه؟؟ وفكّرت تعمل اللي ربنا أمرنا بيه إننا نردد الأذان وراء المؤذن وندعي بعديه؟؟
عارف الحديث ده..
عن عبد الله بن عمرو أنه سمع رسول الله -صلى الله عليه وسلم- يقول: "إذا سمعتم المؤذن فقولوا مثل ما يقول، ثم صلوا عليّ؛ فإنه من صلى عليّ صلاة صلى الله عليه بها عشراً، ثم سلوا الله لي الوسيلة، فإنها منزلة في الجنة لا تنبغي إلا لعبد من عباد الله، وأرجو أن أكون أنا هو، فمن سأل الله لي الوسيلة حلت له الشفاعة".
يعني إحنا لازم نكرّر خلف المؤذن كل جزء في الأذان بيقوله، إلا "حي على الصلاة" و"حي على الفلاح"، فهنا بنقول: "لا حول ولا قوة إلا بالله العلي العظيم"، وبعد ما يخلص ندعي بالدعاء المحفوظ لنا جميعاً..
"اللهم رب هذه الدعوة التامة والصلاة القائمة أتِ سيدنا محمد الوسيلة والفضيلة والدرجة الرفيعة، وأبعثه اللهم مقاماً محموداً الذي وعدته".
والحقيقة أن من كثرة فضل الأذان فيه حديث للرسول -صلى الله عليه وسلم- على المؤذنين "في صحيح البخاري.. أن رسول الله صلى الله عليه وسلم قال لأبي سعيد الخدري: إني أراك تحبّ الغنم والبادية، فإذا كنت في غنمك أو باديتك فأذّنت بالصلاة فارفع صوتك بالنداء فإنه لا يسمع مدى صوت المؤذن جن ولا إنس ولا شيء إلا شهد له يوم القيامة"، و"في صحيح مسلم أن رسول الله صلى الله عليه وسلم قال: المؤذنون أطول الناس أعناقاً يوم القيامة. أي لكثرة ما يرونه من الثواب".
يعني الأذان مش مجرد تنبيه لينا فقط علشان نعرف ميعاد الصلاة..
وعلشان كده إحنا النهارده في كل مرة بنسمع فيها الأذان هنردد وراه، ونركّز في معناه وبعدين ندعي كما علمنا الرسول..
واستنونا بكره مع يوم جديد وثواب جديد
*******************************
لو عايز تتابع الحلقات الجديدة من فكر ثواني.. تكسب ثواب (اضغط هنا)
لو عايز تتابع الحلقات (1-5) من فكر ثواني.. تكسب ثواب (اضغط هنا)
لو عايز تتابع الحلقات (6-10) من فكر ثواني.. تكسب ثواب (اضغط هنا) لو عايز تتابع الحلقات (11-15) من فكر ثواني.. تكسب ثواب (اضغط هنا)
لو عايز تتابع الحلقات (16-20) من فكر ثواني.. تكسب ثواب (اضغط هنا)
****************************** لو عايز تفكر ثواني.. وتكسب معلومة (اضغط هنا)