رمضان جه بعد طول انتظار.. وفي الشهر الكريم ده بنحب نكتر من العبادات والتقرب إلى الله.. نيتنا قبل الشهر ما يبدأ، أننا هنعمل كل حاجة.. هنقراء أجزاء كثيرة من القرآن.. وهنزود صلاتنا ونحسنها.. وهنزور ملاجئ للأيتام ونعمل خير هناك..
مش كده وبس بنقرر مع دخول الشهر إننا لازم ننزل نصلي التراويح، ونشارك في جمعية ولا اتنين نعمل معاهم شنط رمضان.. وغيرها كتير من الخطط الممتازة اللي كلنا بنعدّها لرمضان.. المشكلة بقى إن أغلبنا ما بيقدرش ينفّذ كل ده.. بندخل في دوامة.. الشغل.. المواصلات.. وقت رمضان بيعدي بسرعة... ونلاقي الشهر خلص من غير ما نعمل حاجة.. علشان كده فكرنا نكسب ثواب سوا.. إزاي؟! ***************************
اليوم العاشر جددت إيمانك إمتى؟ النهارده يوم مميز جداً.. فالنهارده خلّصنا عشرة الرحمة وهندخل على المغفرة.. وعلشان كده خليني أسألك.. جددت إيمانك امتى؟؟ امتى شهدت أن لا إله إلا الله، بجد وأنت واعيها ومفكر في كل كلمة بتقولها وفاهم معناها وقاصدها؟؟ مش مجرد ترديد للكلام وخلاص.. النهارده هنجدّد إيماننا سوا.. من فضلك خد "دُش" سريع بنية التطهر من كل ذنوبك، وأنت بتاخده فكّر في مدى الصفحة الجديدة اللي عايز تفتحها في حياتك.. وبعد ما تخلّص صلِّ ركعتين بنية تجديد الإيمان وركّز فيهم أوي.. وبعد ما تخلّصهم.. اشهد "أن لا إله إلا الله وأن محمداً رسول الله". بقلبك وأنت واعي لكل كلمة مش بلسانك.. ومن بكرة بنبدأ بإذن الله عشرة المغفرة سوا برضه..
***************************
النهارده هنتعلم بعض أدعية الرسول صلى الله عليه وسلم اليوم التاسع
إيه رأيك النهارده نتعلم سوا بعض أدعية الرسول، ودول ممكن يفضلوا معانا كتير ونقدر نحفظهم ونرددهم كمان بعد رمضان وتبقى فايدة ممتدة.. ومن هذه الأدعية: * اللهم آتنا في الدنيا حسنة وفي الآخرة حسنة وقنا عذاب النار. اللهم إني أعوذ بك من الفقر، والقلة والذلة، وأعوذ بك من أن أَظلِم أو أُظلَم. يا مقلّب القلوب ثبّت قلبي على دينك.
* اللهم إني أعوذ بك من العجز والكسل والجبن والهرم والبخل، وأعوذ بك من عذاب القبر ومن فتنة المحيا والممات. الله أهدني وسددني، اللهم إني أسألك الهدى والسداد. * اللهم إني أعوذ بك من زوال نعمتك، وتحوّل عافيتك، وفُجاءة نقمتك، وجميع سخطك. اللهم إني أعوذ بك من جار السوء في دار المقامة، فإن جار البادية يتحول. اللهم إني أسألك علماً نافعاً ورزقاً طيباً متقبلاً. * اللهم إني أعوذ بك من شر ما عملت ومن شر ما لم أعمل. اللهم إني أعوذ بك من يوم السوء، ومن ليلة السوء، ومن ساعة السوء، ومن صاحب السوء، ومن جار السوء في دار المقامة. * لا إله إلا الله العظيم الحليم، لا إله إلا الله رب العرش العظيم، لا إله إلا الله رب السماوات ورب الأرض ورب العرش الكريم. اللهم إني أسألك الجنة وأستجير بك من النار. * اللهم رحمتك أرجو فلا تكلني إلى نفسي طرفة عين، وأصلح لي شأني كله، لا إله إلا أنت. اللهم طهرني من الذنوب والخطايا اللهم نقّني منها كما ينقّى الثوب الأبيض من الدنس. اللهم طهرني بالثلج والبرد والماء البارد. * لا إله إلا أنت سبحانك إني كنت من الظالمين. اللهم إني أسألك بأن لك الحمد لا إله إلا أنت (وحدك لا شريك لك) المنان يا بديع السموات والأرض يا ذا الجلال والإكرام يا حي ياقيوم إني أسألك الجنة وأعوذ بك من النار. * اللهم إنك عفو كريم تحب العفو فاعف عني. اللهم ارزقني حُبك وحُب من ينفعني حُبّهُ عندك، اللهم ما رزقتني مما أُحبُ فاجعله قوة لي فيما تحب، اللهم ما زويت عني مما أُحب فاجعله فراغاً لي فيما تحب. * اللهم إني أسألك العافية في الدنيا والآخرة. اللهم متّعني بسمعي وبصري واجعلهما الوارث منيِّ وانصرني على من يظلمُني، وخذ منه بثأري. اللهم أعنّي على ذكرك وشكرك وحسن عبادتك. * اللهم إنّا نسألك موجبات رحمتك، وعزائم مغفرتك، والسلامة من كل إثم، والغنيمة من كل بر، والفوز بالجنة والنجاة من النار. اللهم إني أعوذ بك من البخل والجبن وسوء العمر وفتنة الصدر وعذاب القبر. * اللهم أصلح لي ديني الذي هو عصمة أمري، وأصلح لي دنياي التي فيها معاشي، وأصلح لي آخرتي التي فيها معادي، واجعل الحياة زيادة لي في كل خير، واجعل الموت راحة لي من كل شر. * اللهم ألّف بين قلوبنا، وأصلح ذات بيننا، واهدنا سبل السلام، ونجّنا من الظلمات إلى النور، وجنّبنا الفواحش ما ظهر منها وما بطن، وبارك لنا في أسماعنا وأبصارنا وقلوبنا وأزواجنا وذرياتنا، وتب علينا إنك أنت التواب الرحيم، واجعلنا شاكرين لنعمك مثنين بها عليك قابلين لها وأتممها علينا. اختار اتنين من الأدعية دي واكتبهم في ورقة وردّدهم على مدار اليوم وإنت بتفكر في معناهم مش مجرد ترديد باللسان، حس بيهم وفكّر إنك بتمشي على خطى النبي عليه الصلاة والسلام، وبتردّد كلام هو قاله.. هتشعر بشعور رائع جدا.. وطبعا يا ريت لو تعرف أدعية زيادة شاركنا بيها وخلي الفايدة تعمّ.. *************************** اسجد شكرًا لله، وتذكر قوله تعالى "لئن شكرتم لأزيدنكم" اليوم الثامن
حياتك بؤس؟؟ ظروفك في العمل أو الجامعة أو المدرسة مش كويسة؟ فلوسك قليلة والحياة مش ماشية معاك صح؟ حاسس بضيق وإن مافيش حاجة كويسة في حياتك؟؟ ما تداريش.. كلنا بيجي علينا أوقات نشعر فيها بكده.. ده شيء طبيعي.. لكن لو عايز تحس قد أيه فيه في حياتك حاجات كتير ربنا اداها لك رائعة، وأنت ما كنتش واخد بالك.. هات ورقة وقلم في البريك وقت شغلك أو قبل ما تنام أو حتى بعد صلاة العصر وأنت قاعد منتظر أذان المغرب وأبدأ اكتب قائمة بالحاجات اللي عندك، وممكن ما كانتش عند ناس تانيين.. مثلاً.. 1- عندك أب وأم أو ابن أو زوجة أو زوج.. فيه ناس بتبقى عايشة وحيدة، وهتقعد تفطر لوحدها النهارده. 2- عندك بيت عايش فيه.. وفيه ناس عايشة في خيم إيواء أو في الشارع. 3- عند وظيفة بتقبض منها حتى لو مش كتير.. فيه ناس عاطلة وقاعدة على القهوة. 4- عندك عائل بيديك مصروف.. فيه أطفال وشباب عايشين في الشارع تحت الكباري. 5- عندك نظر وعينين قادر تشوف بيها.. فيه غيرك فاقد لنعمة البصر.. وعلى النمط ده اكتب كل اللي ييجي في بالك هتلاقي إن عندك حاجات كتير أوي ونعم لا تعدّ ربنا اداها لك.. ما تنساش بعد ما تخلّص تصلي ركعتين شكر لله.. وتذكر قوله تعالى: {لَئِن شَكَرْتُمْ لأَزِيدَنَّكُمْ}.. *************************** صينية كنافة أو جلاش أو شوية قطايف.. ممكن تسعد بيهم جيرانك اليوم السابع
"النبي وصى على سابع جار" كلنا بنقول الكلمة دي، لكن الحقيقة إن مشاغل الحياة ومشاكلها بتمنعنا إننا نفتكر حتى جارنا مش إننا نهتم بيه.. ولكن النهارده هنفكّر في جيراننا، لو كان عندك أو عندكِ وقت هتدخل المطبخ وتشمر عن كمامك وتبدأ تعمل حاجة حلوة لجارك، وهتتفنّن فيها.. صينية كنافة جميلة، أو جلاش، ممكن شوية قطايف أو كام طبق رز بلبن، أما لو كان وقتك ما يسمحش أو سنك أصغر من أنك تقدر تعمل ده.. فمش مشكلة، فكر إيه أكتر حاجة بتحبها وجيبها لجارك، ممكن تشتري له حاجة حلوة ولو حتى شوكولاتة.. وتخبّط عليه قبل المغرب وتهديها له، ويا ريت بقى لو كان جارك ده علاقتكم مع بعض ما كانتش كويسة أوي.. تبقى كسبت ثوابين سوا، واحد لودّ جارك والتاني لأنك من بدأت بالسلام.. *************************** ساعد بابا وحسسه إن بقى عنده راجل يتسند عليه اليوم السادس
لو أنت شاب أو شابة صغيرين في السن أو حتى كبار، فركّز معنا النهارده.. لأننا هنطلب منك إنك تفكر في ولي أمرك، والدك أو والدتك، جدك أو جدتك، حتى لو خالك أو عمك.. الشخص اللي عايش معاه وبتعتبره أسرتك، النهارده هيكون يوم الشخص ده في حياتك.. فكر إزاي تقدر تسعده وتلبي له رغباته، مش بحاجة مادية... لا بحاجة معنوية.. هتكون حنين معاه وهتسمع كلامه، هتلبي له طلباته.. * هتساعدي ماما النهارده في تحضير الفطار والسحور، وهتخليها مرتاحة وهتأكدي لها إن عندها شابة تقدر تعتمد عليها..
* وهتساعد بابا وهتجيب طلبات البيت وتريّحه، وتحسسه إنه بقى عنده راجل يقدر يبقى مكانه ويتسند عليه..
* النهارده مش هيصدر منك أي شيء ممكن يزعلهم ولو كلمة.. أما بقى لو أنت الأم والأب نفسهم.. فخطتنا النهارده مش هتختلف كتير..
* عليك إنك تعامل ابنك أو بنتك بشكل مختلف، وريه النهارده معنى الحب والحنية إيه.. مش معنى إنك بتحبه في قلبك إن مشاعرك دي واصلة له، والنهارده عليك إنك توصل له حبك ده..
* النهارده مش هتتعصب عليه.. مش هتضربه.. مش هتتخانق معاه، حتى لو حبيت توضح له حاجة أو عمل حاجة غلط هتفهّمه بالذوق والتفاهم.. والجميع هيشوف كمّ الهدوء اللي هيسود البيت وازاي شكل الحياة نفسه هيختلف..
***************************
لو عايز تتابع الحلقات الجديدة من فكر ثواني.. تكسب ثواب (اضغط هنا)
لو عايز تتابع الحلقات (1-5) من فكر ثواني.. تكسب ثواب (اضغط هنا)
لو عايز تتابع الحلقات (11-15) من فكر ثواني.. تكسب ثواب (اضغط هنا)
لو عايز تتابع الحلقات (16-20) من فكر ثواني.. تكسب ثواب (اضغط هنا)
لو عايز تتابع الحلقات (21- 25) من فكر ثواني.. تكسب ثواب (اضغط هنا)
