كنباوى وكنباوية.. حلقة (96).. العريان المتحدث الرسمى باسم الإخوان!

كنباوي يحدث نفسه وهو جالس في انتظار آذان المغرب قائلا: واخرتها إيه ؟ مع الشياطين دول ؟ تسمعه كنباوية وهي تمر من الصالة في طريقها إلى المطبخ لاستكمال طعام الفطار فتدهش وتنظر له قائلة، فيه حاجة مضيقاك في الشغل ؟ ولا فيه حاجة هنا في البيت مش عجباك ؟ الولاد مزعلينك في حاجة؟ قول، وفضفضلي، هو انت ليك غيري تشكيله؟
كنباوي: مفيش حاجة من ده كله اللي جه في بالك، الحكاية غير كده خالص لا ليها دخل بالبيت ولا بالشغل ليها دخل بحال البلد بلدنا مصر يا كنباوية.

كنباويه: قولي بس إيه اللي مضيقك ؟ خايف على مصر من إيه ؟ ما اهه مصر بقت زي الفل بعد الإخوان ماغاروا في داهية.

كنباوي: غاروا في داهية! بأمارة إيه ؟ بأمارة ماهمه لسه قاعدين في رابعة العدوية ؟
كنباوية: خليهم قاعدين بكرة يزهقوا ويمشوا احنا خاسس علينا إيه بقعدتهم دي ؟
كنباوي: مش حيمشوا ياكنباوية، مش حيمشوا، همه متبعين سياسة النفس الطويل وبعدين يمشوا ليه ؟ ماهمه بعتوا جابو نسوانهم وعيالهم قاعدين معاهم وفيه اللي بيصرف عليهم أكل وشرب وبياخدوا فلوس كمان وسي العريان اللي ربنا مخليه عريان اللهي وانت جاهي مايكسيه ابدا ويفضل طول عمره عريان هو اللي بيمشيهم هو والبلتاجي عايزين ينفذوا مخطط فنزويلا إنهم يرجعوا مرسي بالضغط زي ما شعب فنزويلا عمل ورجع هوجو تشافيز ولو مانفعش المخطط ده حيعملوا مخطط سوريا والحرب ضد الجيش دول ولاد كلب انتي عارفة انهم بيعطلوا الحركة المرورية وبيشلوها بتظاهراتهم دي ده غير انهم بيسربوا إشاعات أن الجيش بيتحايل عليهم إنهم يصتلحوا مع الجيش مقابل إن الجيش يقدم لهم شوية تنازلات وده عمره مايحصل ولا يكون لأن الجيش مش خايف منهم رغم انهم مصلطين بتوع الجهاد في سينا يضربوا في الجيش ويحاربوه وكل يوم بيقتلوا اتنين تلاتة من أفراد الجيش ذنبهم إيه اللي بيموتوا دول كل يوم وهمه بيدافعوا عننا الله يلعن الإخوان ويحرقهم بجاز وسخ المشكلة اللي الناس مش قادره تفهمها أن التفاهم مع الإخوان مش حيجيب نتيجة لأنهم شارطين أن أول طريق المصالحو هو عوده مرسي للاتحادية ورئاسة الجمهورية وعودة الدستور الزبالة بتاعهم وعودة مجلس الشورى المنحل وكده يبقي لامؤاخذة...... وطبعا غير كدة همه مش حيوافقوا على أي شىء وبيقولوا كمان إن لو ده حصل ممكن يتفاوضوا ويعملوا استفتاء على الانتخابات الرئاسية المبكرة ويعدلوا الدستور ويشكلوا وزارة جديدة بتوافق كل أطياف الشعب طيب ماعملوش كدة ليه من الأول وريحوا نفسهم وريحونا واشمعني دلوقتي وافقوا على الوزارة والشعب باس رجليهم علشان يشيلوا قنديل الفاشل مليون مرة ومرسي رفض ولا لما بقوا همه دلوقتي في موقف ضعف وافقوا.

كنباويه: دول نمارده ملاعين
كنباوي: انتي عارفة لو ده حصل ولقيوا مجنون يوافقهم عليه قولي على البلد دي يارحمن يارحيم الإخوان لازم ينضربوا بالقباقيب علشان يرجعوا عن اللي في دماغهم ده، وبعدين مين حيسامحهم على الجنود والظباط اللي ماتوا بسببهم في سينا والعريش مين ؟ دول لازم يتحبسوا لازم ويشوفوا الذل من تالني دول مافيا جماعة إرهابية منظمة.
كنباوية: لأ وقال عاملين اجتماع للتنظيم العالمي في تركيا وبيحطوا كمان خطط للعودة للحكم وأردوغان يصرح ويقول مرسي رئيسي في مصر شوفت بجاحة أكبر من دي ياكنباوي ؟
كنباوي: لا بجاحة بالشكل ده ماشوفتش أبدا
كنباوية: أحسن حاجة أن الوزارة اتشكلت بسرعة وعقبال ما الوزرا يحلفوا اليمين كمان يومين يكون حلها حلال من عنده.

كنباوي: لازم يتم القبض على المرشد والبلتاجي والعريان وحجازي علشان الجيش يكون في مأمن من شرهم.
كنباوية: كلامك عين العقل لازم فعلا ده يحصل وبسرعة علشان يبطلوا أحلامهم وأوهامهم دي قال إيه مرسي يرجع تاني هو احنا كنا بنقوم بثورة تاني من باب حب الثورات ولا كانت الثورة وحشتنا وحنينا ليها علشان كدة قمنا بيها دول مجانين ولاد مجانين انهم بيفكروا كده.

كنباوي: لازم الجيش يتصرف ويعمل عمل كبير مع المعتصمين في رابعة يرعبهم بيه علشان يرجعوا عن اللي في دماغهم ده.
كنباوية: ماهو الجيش بين نارين، بين نار الإعلام الغربي وبين نار منظمات حقوق الإنسان والمطالبين بالمصالحة الوطنية ودول طبعا مجانين لو صدقوا أنه ممكن تحصل مصالحة وطنية مع الإخوان لأن راسهم وألف جزمة قديمة عودة مرسي الأول وده مش حيحصل ولا حيكون لأن ده معناه إنهم حينتقموا من الجيش ومن عبد الفتاح السيسي وكل اللي رفضهم ووقف ضدهم.

كنباوي: الجيش مش حينولهم غرضهم حتي لو قتلوا نص جنوده وظباطه وسينا بكرة تتلم وتقف عند حدها وإسرائيل الواطية طلعت انضف منهم وأشرف منهم وبتساعد الجيش في القضاء على الجهاديين والبؤر الإجرامية المسلحة هناك.

كنباوية: فعلا إسرائيل أشرف من الإخوان الإخوان عيب وحرام علينا إننا نقول عليهم مصريين دول شياطين ولاد شياطين.
كنباوي: سيبك انتي من قرف الإخوان وادخلي كملي الأكل
كنباوية: روق روق بكرة ربنا يريحنا منهم أنا حسيبك شوية واخش المطبخ أجهز الأكل المدفع خلاص على وشك أنه يضرب
كنباوي: ادخلي شوفي حتعملي إيه وأنا حدخل أتوضا علشان المغرب فاضل عليه دقايق وربنا يحلها بقي من عنده.
كنباوية: ونعم بالله ياكنباوي اللي يرمي حموله على الله ربنا بينصفه وبيكرمه
كنباوي: يارب ياكنباويه، يارب !