«لماضة الأطفال» تثير اهتمامات النشطاء.. بسنت: ضربته أمه فقال يا إلهي إنها حقا مؤلمة.. قمر: أختي الصغيرة تعنفني على الكذب.. نادية: طفلي أخجلني مع البائعة.. ومحمد «عايز أصلي» أحدث اختراع للهروب

أصحاب المراكب النيلية يستخدمون ألعاب الكرتون لجذب المواطنين بقنا (فيديو)
شغلت حكايات الأطفال الصغار حيزا كبيرا من اهتمامات نشطاء موقع التواصل الاجتماعي "فيس بوك"، وأخذوا يسردون حكاياتهم مع براءة الأطفال الصغار، ومشاعرهم وأحاسيسهم الصادقة وأيضًا شقاوتهم التي تظهر بوضوح في أحاديثهم ما أثار دهشة وإعجاب نشطاء التواصل الاجتماعي.
البداية كانت لسيدة على أحد جروبات فيس بوك، طالبت متابعي الجروب أن يسردوا حكايات الأطفال القريبين منهم، ولاقت الدعوة اهتمام عدد كبير من متابعي الجروب، وأخذوا يتحدثون عن براءة و"لماضة" الأطفال.
مسح الموبايل
قالت بسنت خليل "ابن خالتو مره كنت بلعب بالموبايل وكان عاوزه وعشان اسكته قولت له همسح حاجه وادهولك يروح يجى تانى اقوله همسح حاجه ادهولك وهكذا كام مرة لحد ما قاللى لا أنا زهقت منك كل ده مش عارفه تمسحيه هاتى كدا وخده مسح التليفون ف هدومه وقالى ها امسح كمان ولا كفايه كدا".
إنها حقا مؤلمة
أضافت بسنت أن أخوه كان بيحب الكارتون ولا يترك مشاهدته طوال اليوم وذات مرة ضربته أمه فكانت المفاجأة أن قال لها "أوه أوه يا إلهي إنها حقا مؤلمة".
وأضافت قمر هشام "كان معايا توكتين المهم بنات اختي كانوا عندي واديت الصغيرة واحده وجت الكبيرة بتقولي معاكي واحده تاني قولتلها لا.. لقيت نور بنت اختي الصغيرة وقفت وبصتلي وقالتلي ازاي يا خالتو تكدبي انتي مش عارفة أن الكداب بيروح النار. وفضلت تقولي نشيد عن الكدب ادهولها في الحضانة".
وعلقت نادية شحاتة "عندنا ست تحت البيت بتعمل طعميه وساندوتشات بتبيع يعني كل يوم ابني عاوز يشتري منها اقوله يا حبيبي انا اعملك في البيت أحسن يقوللي لا عاوز منها هي وفضلنا كده كتير اوي كل يوم ينزل يشتري منها وفي يوم ندهت عليه قولتله بص فيه كلب قاعد جنبها الكلب دا بقي بيلحس في العيش والطعمية عشان أقرفه منها وما يشتريش تاني وفعلا قرف منها جدا وقال لي مش هشتري تاني وفي يوم كان نازل تحت الست ندهت عليه بتقوله مش بتشتري مني ليه يا صهيب قالها ماما بتقول على حضرتك انك وحشه وبتخلي الكلاب تلحس في الساندوتشات واكلك وحش الواد باعني والست من يوميها ومش طايقاني".
جدو فين
وقالت ياسو سماك "ابنى الله يهديه لما بابا الله يرحمه توفى كان بابا متعود يحط لابنى شوكولاته تحت المخده وابنى أول مره نروح بيت بابا وهو مش موجود فضل يلف البيت ويطلع وينزل ويقول فين جدو بتاع الشوكولاتة أول لما عرف أنه مات قال ماكنش عارف يستنى لما يجيبلى الحصان اللى وعدنى بيه وكان بيروح لجدو التاني يقوله إنت مش هتروح لجدو بقى وفى يوم كنت تعبانه جدا وبقول اااه لقيته بيقولى قولى اه بصوت واطى عشان مش سامع الكارتون بقوله حرام عليك ماما تعبانه يايوسف قالى خلاص روحى اتعبى جوا ويوسف يتفرج على كرتون هنا".
وأضاف محمد توفيق "كنتي بدي درس عن verb to be وبقول am is are فكان قاعد ولد صغير تقريبا وقتها كان 3 سنين وكل ما اقول is. يقول عيب كل ما اقول is يقول عيب المهم مامته دخلت لقيته بيقول لها يا ماما المستر بيقول "is".
وعلقت ضحي أبو الفتوح "بنتى أيام ما كانت الكهربا بتقطع كتير كان عندها 4 سنين اتصاحبت على خيالها اللى على الحيطه وتقعد تكلم معاه ومسمياه صاحبتي جم اخوتها يعرفوها أنه خيال ويحطوا اديهم على الحيطه قعدت تعيط جامد وتقول كده نعكشتي شعر صحبتي".
الحقيقة
وقال محمد سعيد "ابن اختى كان عنده 5 سنين كنت بزعقله وكنت شاكك أن خد حاجة بتاعتى فبقوله انت خدتها؟؟ فلقيته متنح بقوله قول الحقيقة لقيته بيقول "الحقيقة" فطست على روحى من الضحك ووقعت عالارض ونسيت طبعا اللى كنت عايزاه".
عايز أقوم أصلي
وأضاف محمد صلاح "ابني لما كان في kg1 ولسه أول يوم دراسه وقعدت اذاكر له...زهقني شويه رحت مزعق فيه..قعد يعيط وعايز يقوم..و يخترع لي حجج..عايز اشرب اكل انام ادخل الحمام..وانا لا لا لا... وبعد خمس دقائق....سرح كده..وقالي بابا عايز أقوم أصلي... وقعت من الضحك..و قلت له صلي وخلي امك تذاكر لك على طول".