بالصور.. عصافير الجنة يروون حكايات سنة أولى صيام

ذكريات لا تنسى عن هذا العام الأول فى كل شىء، وتحديدًا "سنة أولى صيام" عن الشغف والانتظار لدخول عالم الكبار من هذا الباب، وعن ولعنا لتجربة هذا الشىء للمرة الأولى، صيام عن الماء وآخر عن الطعام فقط محاولات طفولية للحاق بدرب الكبار بأقل الخسائر، لا أحد ينسى فرحة المرة الأولى للإفطار أو حتى محاولات الصوم حتى أذان العصر أو الظهر"، لدى كل بيت طفل يحاول جاهدًا أن ينضم إلى صفوف الكبار من خلال هذه الفريضة التى تأتى مرة واحدة فى العام، حكايات على لسان أطفال يخطون فى الدنيا خطواتهم الأولى وما زالوا يحلمون أن يصيروا "كبارًا".
نور عمرو "8" سنين
"أنا ابتديت أصوم السنة اللى فاتت بس كنت تعبانة قوى وجعانة وعطشانة، وكنت بفضل أعيط وأقول لماما وبابا "أنا عايزة أكل هاتولى ماية"، بس السنة ديه هصوم اليوم كله عشان ربنا يحبنى والملايكة تكتبلى الثواب، إحنا لازم نصوم فى شهر رمضان عشان نحس بالناس الغلابة اللى معندهمش أكل، عشان كده ماما عرفتنى أنه لازم أصوم الشهر كله، وحتى لو كانت الدنيا حر وأنا عطشت هستحمل عشان ربنا يدخلنى الجنة".
كنزى طلعت "5 سنوات"
"أنا أول سنة هصوم عشان ربنا يحبنى بس مش هصوم اليوم كله عشان هبقى جعانة، هصوم بس لحد الضهر عشان أشرب بعد كده وأكل، ماما قالتلى إنه لازم أصوم عشان أدخل الجنة، وأن ربنا هيحبنى لو صمت زيهم فأنا بقى هعمل زيهم وهصوم رمضان عشان أبقى حلوة وأكبر وأدخل الجنة، وكمان فى ناس فى الشارع مش عندهم أكل، فإحنا عشان كده ربنا بيخلينا نصوم فى رمضان بابا بيقول كده".
لمى وليد "6 سنوات"
"أنا هصوم السنة ديه عن الأكل والماية، ومش هعيط لماما وأقولها أنى عطشانة أو جعانة، بس مش هقدر أصوم اليوم كله يعنى ممكن لحد العصر بس عشان الدنيا حر قوى، وأنا ببقى عطشانة، أنا عايزة أكبر عشان أصوم اليوم كله زى بابا وماما وربنا يدينا حسنات كتير وأدخل الجنة كمان، ماما بتقولى أن ربنا بيخلينا نصوم عشان نشكر ربنا على الحاجات الحلوة اللى عندنا، وأن فى ناس غلابة معندهمش أى حاجة".
سما أحمد " 8" سنوات
"أنا نفسى أصوم اليوم كله عشان أدخل الجنة.. السنة اللى فاتت صومت لحد العصر بس وماما قالتلى لازم تقدرى تتحملى عشان ربنا يحبك، وكمان بابا بيصوم اليوم كله هو وماما، وقالى إنهم هيدخلوا الجنة وأنا بقى عايزة أدخل معاهم، عشان كده عايزة أكبر وأصوم وأخلى ربنا يقول "سما شاطرة وبتسمع الكلام وهدخلها الجنة".
زينة عبد الرحمن "7 سنوات"
"أنا صومت السنة اللى فاتت لحد العصر عشان مكنتش بقدر أكمل اليوم كله، والدنيا بتكون حر وكنت فى أيام مش باكل بس وبشرب عادى، بس ماما قالتلى لازم أصوم من غير ما أكل ولا أشرب ولا أكذب عشان ربنا يحبنى وأدخل الجنة، وكمان عشان أحس أن فى ناس غلابة مش عندهم أكل زينا فربنا بيخلينا نصوم عشان نحس بيهم، هصوم رمضان كله السنة ديه بس خايفة أعطش أو أجوع مش عارفة بقى هعمل أيه بقى بس هحاول أصوم خالص عشان ربنا يحبنى".
محمد ياسر "5 سنوات"
"أنا عارف رمضان.. ماما وبابا مش بياكلوا خالص خالص، وأنا قولت لماما أنى نفسى أصوم عشان أبقى كبير زيهم، بس هما مش بيوافقوا، السنة ديه بابا قالى صوم لحد العصر عشان ربنا يحبنى والملايكة يقولوا عليا أنى شاطر، وكمان أنا عايز أدخل الجنة عشان كده هصوم، أنا صحابى بياكلوا عادى وبيقولوا أنهم صايمين مع أن ماما قالتلى لازم مش ناكل خالص ولا نشرب عشان نبقى صايمين، بس أنا السنة ديه هعمل كده ومش هاكل خالص ولا هشرب عشان أبقى شاطر".
أحمد سامح " 7 سنوات "
"أنا بحب رمضان عشان أصوم فيه وأبقى زى بابا وماما.. كنت وأنا صغير بعيط عشان ببقى عايز أكل بس أنا خلاص كبرت وهصوم، وماما قالتلى لو حسيت أنك جعان أو عطشان نام أحسن عشان مش تفطر، وكمان لازم أصوم لحد المغرب عشان أدخل الجنة بقى وأكل كل الحاجات الحلوة وربنا يحبنى وأبقى كويس وشاطر".
ألاء محمد "6 سنوات"
"هصوم لحد المغرب لأنى لازم أصوم عشان أنا كبرت خلاص، ولازم أعمل اللى ربنا عايزه عشان يحبنى وميزعلش منى، فلازم أصوم رمضان ومش أكذب عشان أبقى كويسة وشاطرة، بابا قالى أننا لازم نصوم فى رمضان كتير كتير عشان نبقى شاطرين والملايكة تكتب لينا حسنات، وربنا يودينا الجنة اللى فيها كل حاجة حلوة".