قصة قصيرة

الفانوس السحري

يلا يا بابا‏..‏ ميعاد الحكايات‏.‏ انت مش بتشبع حكايات ابدا؟ وهي حكاياتك ينشبع منها يا بابا؟‏..‏ ما انا قلت لك ان الحكايات عندي اجمل حاجة في الدنيا‏..‏ بس بعدك طبعا‏.‏
يا او نطجي يا نصاب‏.‏
والله بجد يا بابا‏,‏ ما اقدرش اعيش من غيرك‏.‏
طيب قول لي لما بابا يموت هاتعمل ايه؟
هاموت نفسي‏.‏
‏........................‏
ايه يا بابا سكت ليه؟
مش عارف اقول لك ايه‏.‏
طيب يلا القصص اهي‏..‏ احكي بقي‏..‏ انا عارف ليه يا ربنا ما خلقتنيش قصة؟
‏..‏بس المشكلة يا بابا لو كان ربنا خلقني قصة كان ممكن حد يقطعني‏..‏ الحمد لله يا ربنا انك ما خلقتنيش قصة‏..‏ يلا بقي‏.‏
صلي علي النبي
‏........................‏
الله حلوة قوي يا بابا‏.‏
يلا يا جميل‏..‏ دورك بقي‏.‏
بس انا يا بابا ما بعرفش اقرا‏.‏
عارف يا غلباوي‏..‏ ما انت كل يوم بتألف من دماغك‏..‏ يلا‏..‏
صلي علي النبي‏.‏
عليه الصلاة والسلام‏.‏
كان فيه بابا‏..‏ كان جميل قوي وطيب خالص‏..‏ لما باعمل حاجة غلط واجري بسرعة عشان اقول له عليها‏,‏ بيديني حتة علقة‏!!..‏ يقوم يبوسني بوسة كبيرة ويقول لي ما تعملش كده تاني‏..‏ أنا بصراحة ساعات مابكونش عملت حاجة أصلا وأروح أقول له كده عشان البوسة بس‏..‏ بعدين بابا ده عرف اني بضحك عليه فقال لي كده انت بتكدب‏..‏ قلت له ما انت عارف السبب اني بحبك يا بابا‏..‏ عارف‏..‏ هتقول لي اني لازم احب ربنا والرسول اكتر وبعدين بابا‏..‏ المهم يا سيدي‏..‏ بابا الحلو ده سافر عشان يجيب فلوس
وسابني‏..‏ وانا قعدت اعيط كتير خالص‏,‏ وما سكتش الا لما قال لي في التليفون انه كده هيزعل مني‏..‏ مش عارف والله يعني هو مفيش فلوس كتير هنا ليه؟‏..‏ في الحضانة ولاد كتير باباهم بيجيبهم ويروحهم وانا كأني ما ليش بابا‏..‏ ماما بتذاكر لي‏,‏ بس مش شاطرة زي بابا وبتزعق لي كتير كمان‏...‏ السنة اللي فاتت يوم ما كان بابا مسافر كان بيصورني بالكاميرا في البيت‏,‏ حطني وسط شنطة السفرالكبيرة وصورني‏..‏ قلت والله يابابا هاعملك مقلب واستخبي جوة الشنطة وتفتحها تلاقيني هناك‏..‏ صحيت من النوم ادور علي الشنطة ما لقتهاش ومالقيتش بابا‏..‏
المرة دي والله ما هنام خالص‏..‏ ليه ياربنا ما خلقتش فلوس كتير هنا؟
‏..‏ هو احنا عايزين فلوس ليه اصلا؟‏..‏ الست اللي بتنام في الجنينة اللي جنبنا هي والنونو بتاعها‏,‏ بابا قال لي ما عندهمش بيت وكان بياخدني كتير معاه بالليل نعطيها
اكل‏..‏ طيب احنا عندنا بيت‏..‏ بابا قال انه بفلوس كتير في الشهر‏..‏ طيب ما انا بكرة هاشتغل واجيب فلوس كتير قوي‏..‏
بابا الحلو ده سألني مرة وهو خارج عاوز ايه يا حبيبي؟‏..‏ قلت له عاوز فانوس سحري‏..‏ قال لي لسة بدري علي رمضان‏..‏ قلت له لامش عاوز فانوس رمضان‏..‏ انا عاوز الفانوس السحري اللي بيطلع منه العفريت‏..‏ بس يكون عفريت طيب زي ما كان في فيلم امبارح‏..‏ بابا ضحك وقال لي هتطلب منه ايه؟‏..‏ قلت له طبعا فلوس كتير خالص عشان ما تسافرش‏..‏ والله يا ربنا لو خليتني الاقي الفانوس السحري مش هاعمل حاجة غلط تاني‏..‏ طيب قول انت يا ربنا ممكن بابا ما يسافرش ازاي‏..‏ بابا‏..‏ بابا‏..‏ انت بتعيط ولا ايه؟‏!.‏


إضافة تعليق

البيانات مطلوبة

اسمك
*


بريد الالكترونى *
البريد الالكتروني غير صحيح

عنوان التعليق *


تعليق
*