في نفس التوقيت من كل عام ننتظر شهر رمضان «المبارك».. لا لا لا « بلاها مبارك خليها كريم أحسن يقولوا إني من الفلول ولا حاجة» .. ننتظر شهر رمضان الكريم بنفس الترتيبات والتجهيزات ابتداء من ظهور الفانوس في البيت «اللي غالبا أنا اللي باتدبس وأجيبه» مرورا بجرد المطبخ لمعرفة المخزون الاستراتيجي «لزوم العزومات» انتهاء بالمكسرات وقمر الدين والياميش اللي بيفضل لغاية آخر يوم في رمضان ومحدش بيقربله ... وعلي الرغم من كل ده إلا أن رمضان السنة دي مختلف ... ومش عشان هنصوم في الحر لأن السنة اللي فاتت كان حر برضو ولا هنصوم 28 يوم لا سمح الله ولا هنفطر علي العصر لا مؤاخذة، لكن مع ذلك رمضان السنة دي مختلف لأنه أول رمضان تشهده البلاد من غير «مبارك» وأول رمضان من غير حزب وطني ... معلش بقي اللي كان حاطط عينه علي شنطة من شنط الخير اللي كانوا بيوزعوها يصرف نظر أو ليه ممكن يروح ياخدها من الإخوان أو من المجلس العسكري كرتونة مش شنطة هيوزعوا ربع مليون كرتونة.. وطبعا الاختلاف ده واضح وملموس ومحسوس لينا كلنا لكن يبقي هناك اختلاف آخر! كالعادة وأنا في رحلة بحثي عن فوانيس أحدهما «لزوم التعليق في البلكونة» والثاني لأختي آخر العنقود «يا إما مش هدخل البيت» تزداد حيرتي بتعدد الفوانيس وباختلاف الأسعار فهذا جميل بيغني وبينور وصيني زي الفل وسعره غالي وذاك «صاج» وبشمعة أو ممكن أركب له وصلة بلمبة بجنيه وسعره علي قد الإمكانيات أصله مصري ومركون بقاله خمس سنين يادوب كل رمضان يطلعه يمسحوا التراب من عليه ويبيعوه ويا عيني الفانوس المصري زي القرش البراني مهما اتعرض فين يرجع لصاحب المحل تاني.. ما علينا الفوانيس اتعلقت وما عنديش حجة مجبش فانوس السنة دي ..... وأثناء سيري بين الفوانيس طلعت بحجة ممتازة أقدر أقولها لأختي .... «مجبتش فانوس السنة دي عشان رمضان مختلف ومافيش فانوس للثورة وأي حاجة كنا بنعملها زمان اتغيرت بعد 25 يناير» .... حجة جميله أختي هتقتنع جدا لأنها بقت وطنية جدا بعد الثورة هي أي نعم في ثانية ابتدائي بس طول اليوم بتلف في الشارع زي المجنونة مع صاحباتها تقول: «الجيش والشعب إيد واحدة»، قلت زيادة تأكيد أسأل بياع الفوانيس... • كل سنة وأنت طيب يا حاج ملاقيش عندك فانوس ثوري يعني بعد الثورة معملتوش فوانيس بالمناسبة دي؟! رد عليا الحاج بمنتهي العصبية: .. لا ياستي معندناش كل الموجود بتاع السنة اللي فاتت «كرومبو»، الجمل، أبو تريكة و«سحس بومب»، فيه عندي بوجي وطمطم ينفع؟ • لا للأسف يا حاج مينفعش أصله كان بيتعرض «أيامه» أنا عايزة فانوس جديد كده مناسب لأيام الثورة. -مش هتلاقي يا ستي أصل الثورة اللي أنتي فرحانة بيها قطعت عيشنا والمستوردين مجبوش حاجه السنة دي. بدأت الفرحة تعتصرني إني مش هدفع فلوس في شراء فانوس لأختي ولكن حاسة بالذنب ... قلت أسأل عن السعر يمكن عشان الظروف اللي هو فيها يهاود السعر. • طيب يا حاج بوجي وطمطم بكام؟ - ب 45 جنيه ... ويبدأ في شيله من مكانه لوضعه في الكيس عشان يبعهولي. خدته منه قائلة: عنك انت ياحج ونزعت عنه الكيس ووضعته جنب باقي إخواته من الفوانيس وأنا بقول بثقة: مينفعش أجيبه دي خيانة بقولك كان يتعرض أيامه. ومضيت في طريقي والبياع فاكرني اتجننت وفاضلي دقيقتين وانكش شعري .... وسألت بائعا آخر قلت أعمل اللي عليا برضو. • لو سمحت مافيش فوانيس جديدة السنة دي لزوم الثورة وكده يعني؟ رد عليا باقتضاب.. يا أستاذة الثورة مش فوانيس الثورة أكبر من كده بكتير .. الفوانيس دي تراث من زمان أيوه بيتغير أشكاله بس اللي بيتبقي منه المعني وارتباطه بشهر رمضان ده الأهم ... يعني الثورة حاجة والفوانيس حاجة الفرق بينهم زي الآيس كريم والملوخية ! يعني طلب حضرتك عمره ما هيحصل ولا هتلاقي .... مش هتنفعينا بحاجة بقي وتدخلي علي ست الكل بفانوس «وحوي يا وحوي». • عملت نفسي مسمعتش عشان ضميري اللي بحاول أنيمه ميصحاش! وعشان أحس بالراحة الحقيقية وأكون بذلت مجهود مقابل حجتي لفيت علي أكثر من 15 بائع فوانيس في أماكن مختلفة وكلما سمعت جملة مافيش فانوس للثورة ازددت ارتياحا ... لأني مبكدبش وعمري ما هجيب فانوس عادي يا فانوس الثورة يابلاش أنا ولا باكل كنتاكي ولا ليا أجندة ولا من الفلول. وفضلت أحفّظ نفسي الجملتين دول عشان أقولهم لأختي بصوت عال بدل ما بقف قدامها زي التلميذ الخايب قدام المدرس. ازددت فرحا بالثورة أنها أنقذتني من فلوس الفوانيس وازددت فخرا بالمستوردين أنهم ملحقوش يستوردوا فوانيس ويبيعوها لينا. وحمدت ربنا إن المصريين نسيوا صناعة الفوانيس أحسن كان زمانها بقت «سبوبة» وبيبيعوا فوانيس الثورة زي ما عملوا لوحة ارقام العربيات «بثورة 25 يناير» وكنت ساعتها هغرم هغرم». خلاص هانت في نهاية هذا الشارع بيتي وهدخل البيت وأنا رافعة راسي فوق أنا مصري وإذا بالكارثة والمصيبة الكبري التي صعقتني عندما رأيت المحل المجاور لبيتي وضع الفوانيس مش دي المصيبة ... المصيبة إني قريت جملة فانوس التحرير علي صندوق .... وأثناء اقترابي من المحل فضلت أدعي أكون قريت غلط أو دي تهيؤات وعقلي الباطن ترجم الكلام الموجود جواه علي كرتونة الفانوس .... دخلت المحل وأنا بدعك عيني بس الجملة صح قولت أهدي يمكن ده اسم بس عشان يبيع .... وسألت البائع وياريتني ما تعشمت. • لو سمحت هو ده فانوس بعد الثورة ؟ - أيوه يا أستاذة ... عارفة ده إيه ؟ حزري فزري ؟ • أحزر إيه وأفزر إيه لسه بدري علي الفوازير قدامنا أسبوع علي رمضان. - طيب براحتك يا أستاذة ده فانوس الدبابة. • ??????? علامات الاستفهام ظهرت فوق رأسي وأنا مبحلقة في الراجل والفانوس ... إيه ده ده دبابة بجد؟ - لو مش عاجبك يا أستاذة في فانوس عادي صاج مكتوب عليه رمضان الحرية وعليه علم مصر. نزل علي الكلام بالسكتة وفضلت «مبحلقة وسرحانة» وفوقت علي كلام البائع وهو بيقول : يا أستاذة.. يا أستاذة أجيب شنطة؟! سألته بسرعة: هو بكام ؟ رد ببساطة: ب 58 جنيه بس ده من غير فصال أصل الاستيراد كان قليل أوي السنة دي يادوب المستورد اشتري 500 فانوس دبابة واتوزعت علي المحلات يعني نصيب كل محل 5 فوانيس أو سبعة بس احنا عشان محل كبير عندي 10 فوانيس وده هيبقي أول فانوس ثورة أبيعه رفضت بكبرياء 58 جنيه بس يا بلاش ده رخيص جدا بس أنا عايزة حاجة «بناتيتي» .... وأشرت علي فانوس عادي ب 35 جنيه قلت له لف ده .... أصبحت الآن مضطرة للشراء قبل ما تنزل أختي وتشبط في الدبابة؟ واحسرتاه أحلامي كلها اتهدت .... وطلعت لأختي الحبيبة وأنا بحفظ الجملتين . وبقولهم بابتسامة كل سنة وأنت طيبة وبقدم الفانوس لقتها حطت إيدها الاتنين علي وسطها وبتتهز كأنها مركبة وسطها علي سوسته وبتقولي بصراخ: إيه الفانوس القديم ده ؟؟ أنا عايزة من ده وبتوريني الدبابة قلت لها: برافو مين جابلك فانوس غيري. قالت لي: ده بتاع ميران وانتي هتجبيلي زيه ده ب 58 جنيه بس والمحل تحتنا ولو مجبتهوش بقي..؟! رديت بسرعة: مش هتدخليني البيت ... ردت بابتسامة: لا طبعا بس هقول لكل الناس إنك ضد الثورة ومن النظام البائد ومش بعيد تكوني شاركتي في قتل الشهداء! نزلت غصب عني وتأكدت أن من «حفر حفرة لأخيه وقع فيها». ودي كانت آخر حاجة اكتشفتها خلت رمضان السنة دي مختلف عن كل سنة!
