آخر خميس قبل رمضان

كل سنة وأنتم طيبون النهاردة آخر خميس قبل رمضان، بالتأكيد كل واحد فينا له طقوس وعادات وتقاليد بيعملها، وفى الإجتماع اليومى للموقع دار حوار بيننا حول ما يفعله كل منا فى الحميس الاخير قبل رمضان .. ما رأيك لو تشاركنا الفكرة ؟
فى آخر خميس قبل رمضان أقوم بالتسخين للشهر الكريم !! .. ففى آواخر شعبان أبدأ بالاهتمام بالمواظبة على آداء جميع الصلوات فى المسجد ولكنى كالعادة أفشل فى أداءها كلها بهذا الانتظام، أيضا أقوم بتحضير المصحف الصغير الذى لم يمس منذ رمضان الماضى لختمة المواصلات والمصحف الكبير لخاتمة "رايقة" وبتدبر بعد صلاة الفجر.
وطبعا الجلابية البيضاء مهمة جدا والطاقية البيضاء إللى بتطلع من رمضان لرمضان .. قارورة زيت الحجر الأسود اللى الحاجة جابتها لى فى آخر عمره ليها وشايلها لرمضان .وطبعا لازم أعرف مواعيد برامج الشيخ محمد حسين يعقوب والشيخ محمد حسان وبصراحة كمان عمرو خالد بحب جدا برامجه بتاعة رمضان ..زيادة الذكر والاستغفار والسنن القبلية والبعدية كله بيزيد قبل رمضان بأيام ،
وكمان فى حاجة مهمة جدا بعملها كل خميس قبل رمضان وهى "الحلاقة" ..... حلاقك .. موسك .. قرعتك .. دقنك اللى تسيبها تطول .. رمضان بقى وكل سنة وانت طيب.
أحمد عصمت

بصراحة أنا مشغول جدا، وكان نفسى أخد أخر خميس قبل رمضان أجازة، مش عشان أهرب من الشغل، لأ .. لأنى كان نفسى أسافر للمنوفية أحضر خطوبة أختى اللى بعتذر لها كتير، بس خير إن شاء الله ربنا يكرم وأوصل فى الوقت المناسب.
حواش منتصر

أعتدت مقابلة أصدقائي كل خميس بعد أن ننتهي جميعا من العمل فنجلس على أحد المقاهي أو الكافيهات التي نتردد عليها دائما، ولكننا اتخذنا قرار أن يكون هذا هو الخميس الأخير الذي سوف نقضيه على المقهى قبل رمضان.
لأن الجلوس علي المقاهى فى رمضان قد يفسد الصوم، فمبدئيا تجد نفسك متكاسلا عن صلاة التراويح وتغريك رائحة دخان الشيشة وأكيد ستبدأ تتحدث عن كم المعاناة التي كنت تعانيها فترة الصيام، وبالطبع ستبدأ في الكلام عن أصدقائك غير الموجودين وتفني الوقت في عشرتين طاوله.. المهم أنك ستجد خلال قضائك لفترة ما بعد الإفطار وحتى السحور ليس ورائك سوى الطاولة والشيشة والرغي في كلام فارغ وبرغم هذا تجد مثل هذه الجلسات تعتبر إدمان لدى الكثير منا.
كريم كمال

ا لخميس آخر يوم شغل في الأسبوع، وفي نهاية هذا اليوم بحاول (أفصل) تماما عن الشغل، فأقضي ساعاته الأخيرة على طريقتي، وبالتحديد من الساعة 10 مساء وحتى الفجر، ولكن هذا اليوم هو آخر خميس قبل رمضان، وطبعا في الشهر الكريم وبالتحديد في هذه الساعات أقضيها في قراءة القرآن، لذلك سأحاول استغلال آخر خميس قبل رمضان في عمل كل الحاجات التي أعتدت عليها والتي لن أفعلها في رمضان، وفي العادي أقضي هذا اليوم في وسط البلد وبالتحديد في طلعت حرب، وبعد العودة للبيت أقعد على الانترنت وخصوصا الفيس بوك والماسنجر، فهي الفرصة الوحيدة التي أتكلم فيها مع أصدقائي، والشئ الوحيد الذي لن يتغير اليوم عن أيام رمضان هو أن صلاة الفجر هو نهاية هذا اليوم بالنسبة لي.
محمد فتحى
أنا هقضي يوم الخميس شغل ... شغل ... شغل ، مع اني كنت مخططة لليوم ده بشكل مختلف تماما كان نفسي أروح البيت بدري و ابدأ في تنظيفه قبل رمضان ... و اشتري طلبات البيت اللي هستخدمها في رمضان ... لكن للأسف كل ده هيتأجل لأن استاذ محمد عبد الله طلب مننا شغل كثير جدا على فكرة ... لكن يا سلام لو اخر ميعاد لتسليم شغل المجلة يكون الأحد ... هيتحول وقتها يوم الخميس من يوم خنيق ليوم لطيف .. كفاية كده لأنى ورايا شغل.
شيماء ممدوح


اخر خميس قبل رمضان بيفكرنى دايما بالخروج وبصراحة أكتر بفتكر البنت الى كنت مرتبط بيها لأن طبعا كان الارتباط مش بشكل رسمى يعنى "صحوبية" وده طبعا فى حكم الدين والشرع حرام فكنا فى رمضان لا نتقابل ونقضيها تلفونات.
وأخر يوم خميس قبل رمضان كنا لازم نخرج فيه من أول النهار حتى الساعة التاسعة مساء ويبتدى اليوم بدخولنا السينما من حفلة الواحدة بعد الظهر حتى الثالثة وبعد ذلك نخرج ونذهب أى مطعم للغداء ثم نبحث عن كافيه هادئ لنقضى باقى الساعات المتبقية من اليوم والخروجه ونحاول نشبع من بعض ونقول كل كلام الحب الى فى الدنيا.
محمد المراكبى

لخميس الأخير اللى قبل رمضان .. فكرت يكون يوم مختلف وهعمل فيه شئ مش هقدر أعمله فى رمضان مثلا كان نفسى أسافر الأسكندرية مع أخواتى لكن الفكرة كانت صعبة التنفيذ بس كان كفاية انى أحلم وقلت خلاص كفاية انى اخرج اتفسح مع أصحابى و نروح السينما أو نقعد فى أى كافية لكن مع الأسف لأن الشغل متكدس ومتكوم عليا كان لازم أنه يكون يوم عادى مشحون زى اى يوم شغل تانى ولو انى مش هضيع فرصة السينما أو الكافية بس مش النهاردة ممكن ده يحصل يوم السبت لأنه اجازة ولأنى بحب شغلى فشغلى أهم لكن اللى هيحصل و انا متأكده منه انى هروح البيت و ابص للسقف شويتين و بعدين افتح التلفزيون و ادور على حاجة دمها خفيف و بعدين اسلم نمر و انام حتى لو بدرى!
عبير المرسى
النهاردة هو أول خميس بالنسبة لي هقضيه قبل رمضان وأنا متجوز، وكنت مخططله طبعا إني أنزل اشتري ياميش رمضان كعادة كل سنة وأسافر البلد عشان أعيد على وش الخير الحاجة أمي...لكن بمجرد أن كشفت عن خيوط خطتي لزوجتي فقالت بكل براءة "طيب وماما"، ولما رديت بكل براءة "مامتك مالها؟.. خير؟"...
وقالتلي "نعم يا حبيبي؟"...طبعا أنا بقى بطلت استهبال عشان أعرف آكل عيش في البيت وقلتلها "آه تقصدي هنجيبلها الياميش إمته؟...متقلقيش أنا حاططها في الخطة بعد ما نرجع من السفر هنروح نوديلها الياميش علطول"... ثم قلت محاولا إيجاد حل وسط "ممكن نودي الياميش لمامتك الأول...ونروح نودي الياميش لمامتي في أول يوم رمضان عشان كدة كدة هنفطر هناك"...فوجدت زوجتي تردد"انت أناني..كل حاجة مامتك الأول..وأنا عايز تحرمني من مامتي كمان عايزها ما تفرحش بيا المهم انتهت النزاعات على أن تذهب هي بالياميش لمامتها في نفس اليوم الذي اسافر فيه بالياميش لمامتي، على أن يتصل كل منا بمامة الآخر ليعيد عليه وليبلغه آسفه على عدم مقدرته للحضور ووعد بالحضور في يوم آخر.
هشام عبد اللطيف
يوم الخميس هو أخر يوم نستطيع السهر فيه قبل قدوم الشهر الكريم والسهرة هي سهرة عائلية تجمع أختى وزوجها وابنهما العسوله مازن وآخى وزوجتة ودلوعة العائلة ابنتة نور .. فبعد انتهاء العمل أمامى يوم شاق للتسوق الرمضاني وذلك لشراء الزينة وهى عبارة عن أحبال معلق عليها أشكال لفوانيس صغيرة ونجوم وهلال ثم شراء فانوس رمضان الذي اعتاد "مازن " أن أقدمه له كل رمضان ولكن الجديد هذا العام أننى سوف أقوم بشراء فانوس أخر للدلوعة "نور" وهناك أيضا سهرة خاصة جدا حيث يوافق اليوم عيد ميلادي فالمناسبة بالنسبة لي مناسبتين وكل سنة وأنا وانتوا طيبين
بسمة عامر

النهاردة يوم مختلف لأنه آخر خميس قبل رمضان وزحمة السهر في شوارع وسط البلد وعشان كده يبقي لازم أستمتع أكثر ويكون يوم مختلف عن أي خروجه, وقررت أني أقعد علي كافيه وبعدها ممكن أروح أركب مركب في النيل خاصة وانه أجمل وقت في النيل بعد الساعة 12 بالليل
بصراحة ومن الآخر عايزة أغير مودي خاصة بعد اجتماع الصبح مع الأستاذ محمد عبد الله وانه عايز يخلينا نسلم الشغل كله النهاردة علي اعتبار أن كل واحد فينا سوبر مان أو ومان!!
ولاني السينما أساسي بالنسبة لي قررت أدخل فيلم عسل أسود لأحمد حلمي، بعد كده رجعت فى كلامى لأني دخلت فيلم حلمي قبل كده وكمان فيلم مكى وبصراحة مش بحس أن تامر ممثل فقررت أن أدور علي سينما فيها فيلم انجلينا جولي " سوليت" وأدخله خاصة وأن الأفلام الأجنبية لها متعة مختلفة.
مروة عصام الدين
زي النهارده الاسبوع اللي جاي انشاء الله نكون 2 رمضان وربنا يبلغنا رمضان ويبلغنا ليلة القدر ويقدرنا علي صيامه وقيامه والمفروض ان النهارده اخر خميس قبل رمضان والمفترض إن اليوم ده بيبقي استثنائي بس بالنسبة لي أنا هو يوم عادي جدا ل ده كمان يوم سخيف لأن عندي شغل كتير أوي أوي وكمان هشتغل جمعه وسبت وكل الناس أجازه فربنا يعدي النهارده واليومين اللي جايين علي خير
هاجر اسماعيل
كلة سنة وانتم طيبين النهاردة أخر يوم خميس قبل رمضان لان ان شاء الله هذا الشهر الكريم يجى علينا بالخير الاربعاء القادم وانا بالنسبة ليا يوم الخميس اللى قبل رمضان أول خميس اخر بيبقى يومى للسفر سواء لبلدتى لقضاء يوم مع اقاربى وأسرتى وده بيبقى نوع من الخروج من جو التعب وقضاء ولو يوم واحد بس للراحة والتغير فبيبقى اليوم ده للخروج من ضغوط العمل بنتظرة كل اسبوع هذا اليوم لان بعتبرة اجازة من كل شئ .
محمد عبد المجيد
كل سنة وقبل رمضان متعودة انا واصحابى ان يكون اخر خميس قبل رمضان عبارة عن خروجة غداء خارج المنزل فى اى مطعم او حتى كافيه المهم اننا نقعد نضحك ونتريق على الناس ومفيش مانع من حبة نميمة كده على الماشى ..لكن للاسف السنة دى غير كل سنة أول عام لى فى مجلة الشباب وطبعا وقتى كله فدا مجلة الشباب فمفيش اخر غدوة قبل رمضان فى شغل ثم شغل ثم شغل الا بقى لو استاذ محمد عبدالله ربنا يكرمه ويعلى مراتبه يأجل لنا آخر ميعاد لتسليم الشغل ليوم الأحد ...تعليقاتكم معنا يمكن يوافق
مى عبدالله
ودلوقتى حضرتك ممكن تكتب وتشاركنا برأيك .. عملت ايه فى آخر خميس قبل رمضان؟وحتعمل ايه الساعات اللى فاضلة على بدء اول ايام رمضان؟