كرامتك وكرامة أهلك فوق كل شيء

أنا بحب شاب من سبع سنين، واتخطبنا من سنة.. في أول الخطوبة اعترف لي بكل ماضيه، وأنا كنت معاه، وعدّيت كل حاجة، وقلت المهم إن إحنا مع بعض.
بعد كده استمرينا، وابتدى يشكّ فيّ كتير، ويقول لي إن دي غيرة وإنه خايف عليكِ، وكنت والله باسمع كلامه، وكان كتير بيتلكك لي.
وفجأة بِعِد عني من غير سبب لمدة شهرين، وماكانش بيردّ على التليفون.. سكت وصبرت.. وبابا كلمه عشان عايزه؛ فماقدّرش بابا، وكان قبلها ماقدّرش ماما.
بعت له رسالة؛ وقلت له: تعالى خد حاجتك؛ عشان حتى يتصل أو يسألني: ليه؟ أو: في إيه؟ ماعملش أي حاجة.
وعلى فكرة أنا كنت باتحايل عليه عشان يفهّمني هو بيبعد عني ليه كان بيرفض، ومارضيش يواجهني.
وبعديها بكام أسبوع مامته طلبت الحاجة، وقالت لي إني غلطانة، وإنه كان تعبان وعنده مشكلات؛ بس بابا رفض يرجع لهم الحاجة.
بعد كده لقينا حماتي جت وعايزاني أرجع له تاني.. وأنا مش عارفة أعمل إيه؟ أنا بحبه أوي والله، ومش قادرة أبعد عنه؛ لأنه الحب الوحيد في حياتي، وعمري ما حبيت ولا هاحب غيره؛ بس خايفة.
يا ريت حد يقول لي أعمل إيه؛ لأن دي آخر فرصة بينّا، وبابا وماما سايبين لي الاختيار.
samar

لو عايز تفضفض لنا دوس هنا