فيلم الموسم.. الرجل الثانى .. بطولة: رجل مصر الأول ونجم الفيس بوك وتويتر واليوتيوب مرسى أباظة ونجمة مصر الأولى السيدة أم أحمد!!

مرسى أباظة: أنتى لازم تعرفى يا أم أحمد الحقيقة اللى كنت مداريها عليكى من 10 شهور فاتت.
أم أحمد: خير يا رشدى يوه يقطعنى قصدى يا مرسى وغوشتنى عليك قول ياراجل وريح قلبى.
مرسى اباظة: فكرك كده؟ هو أنا لما أقول أنتى حترتاحى ما يمكن تشيلى الهم اللى أنا شايلة وكاتمة فى صدرى بس خلاص مابقتش قادر استحمل الحمل تقيل وبقى عامل زى الحجر الصوان الراسخ على قلبى وصدرى.
أم أحمد: قول يارشدى.
مرسى أباظة: اسمها قول يامرسى مش رشدى، رشدى ده الاسم الحركى ولا تحبى أقولك ياسامية جمال.
أم أحمد: لأ على إيه الطيب أحسن أنا أم أحمد أنا نسيت سامية جمال دى من زمان.
مرسى أباظة: أحسن برضه الحقيقة اللى أنا عايزك تعرفيها هى أنى مش الراجل الأول أنا الراجل التانى
أم أحمد: يالهوى! الراجل التانى؟ بقى الشنة والرنة دى كلها وتطلع فى الآخر الراجل التانى؟
مرسى أباظة: أنا قولت أقولك بنفسى لما تعرفى منى أحسن ما حد يقولك وتعرفى من غيرى.
أم أحمد: أنا كنت ساعات بشك فى ده بس كنت بكدب نفسى
مرسى أباظة: لأ ماتكدبيش نفسك ظنك فى محله
أم أحمد: قصدك .......... الراجل الأول؟
مرسى أباظة: ايوه هو بس ده سر بينا انا كتبتلك رسالة فيها كل شيء عن التنظيم والمكتب والجماعة وفيها تفاصيل التفاصيل وكل خططنا وعملياتنا القذرة بالاسماء لو جرالى حاجة أو حد منهم قتلنى ابقى طلعى المعلومات دى للرأى العام ابقى أديها لإبراهيم عيسى ويسرى فودة وكمان هيكل دول أنا بثق فيهم رغم كرههم ليا أنا مش عايز دمى يروح هدر لازم يتفضحوا والبلد كلها تعرف حقيقتهم دول عصابة منظمة.
أم أحمد: طيب أنا حشيل الرسالة دى فين؟
مرسى أباظه: فى الجبس
أم أحمد: ايه ياراجل هو أنت ناوى تكسر لى رجلى وتخبى الورق جوه الجبس؟
مرسى أباظة: علشان الحقيقة تبان ومصر تعيش لازم نضحى برجلك رجلك مش أغلى من مصر 21 يوم فى الجبس مش حاجة فدا مصر
أم أحمد: طيب وبعد ال21 يوم حعمل إيه فى الورق؟
مرسى أباظة: أنتى مش حتعملى حاجه أنا اللى حعمل
أم أحمد: حتعمل ايه يامرسى؟
مرسى أباظة: حسفرك قبل ميعاد فك الجبس برا مصر تفكيه فى روسيا وانا هناك حكون مرتب كل حاجة وأنا طالع اهه روسيا كام يوم حظبط أمورى هناك وأرجع احنا مش لازم نتراخى أو نتكاسل الوقت بيجرى وبيعدى بسرعة والموقف بقه حرج للغاية وأسهمى بتسقط كل يوم فى الجماعة وفى البلد وممكن الجماعة والمكتب يضحوا بيا فى أى وقت وفى أى لحظة.
أم أحمد: حاضر يارشدى
مرسى أباظة: (منفعلًا) قلنا مرسى انسى رشدى ده خالص شيليه من دماغك
أم أحمد: حاضر يامرسى ماتزعلش منى مش حغلط فى اسمك تانى
مرسى أباظة: يلا يا أم أحمد
أم أحمد: يلا ايه يا مرسى؟
مرسى أباظة: يلا عرى رجلك لما اهبدك شومة عليها أكسرها
أم أحمد: من غير بنج؟
مرسى اباظه : احنا فاضين للكلام ده والدلع الفاضى بنج ايه اللى انتى جاية تقولى عليه مش عاوزين شوشرة عايزين الكسر يتم فى السر وفى طى الكتمان الحيطان لها ودان .
أم أحمد: طيب وحياه العشرة والعيال خلى ايدك حنينة شويه ماتفتريش لأصرخ وألم عليك الناس
مرسى أباظة: بقى دى آخرتها ياسامية عايزة تفضحينى وتجرسينى
أم أحمد: اهبد وخلصنى ماهو كان يوم مش طلعاله شمس لما حالنا اتغير واتغنينا وبقينا من المشاهير
مرسى أباظة: كله بتمنه ودى الضريبة اللى احنا لازم ندفعها
أم أحمد: وماله ادفع الضريبة بس بالراحة يا أبو أحمد
ويرفع مرسى الشومة ويهوى بها على ساق أم احمد بعزم ماعنده فتصرخ أم أحمد صرخة مدوية ترتج لها الشقة فيستيقظ مرسى من نومه على صراخها مجزوعا
مرسى: خير يا أم احمد كابوس ده ولا إيه؟
فتنظر م أحمد بغضب لمرسى وهى تقول
أم أحمد: أنا حلمت حلم مش حلو خد بالك من نفسك وخد بالك من ...... وصمتت
مرسى : من مين يا أم أحمد ؟ قلقتينى
أم أحمد: من الراجل الأول
بهت مرسى وقد فهم مقصدها وما تبغى أن يصله
مرسى: أنتى حلمتى بإيه؟
أم أحمد: ابقى اتفرج على فيلم الراجل التانى لرشدى أباظة وسامية جمال وأنت تعرف أنا حلمت بإيه.
مرسى: هو أنا فاضى للفرجة؟ وبعدين لما اتفرج اتفرج على رشدى أباظة وسامية جمال؟
أم أحمد: وتتفرج ليه ما أنت عايش الفيلم
مرسى: سيبك من الكلام ده وقومى صليلك ركعتين واستعيذى من الشيطان الرجيم
أم أحمد: حاضر يامرسى
وتقوم أم أحمد للصلاة ومرسى يجلس مفكرا فى حلمها والفيلم وماترمى إليه ونسمع صوت تفكيره يقول :
( ده مفيش حاجة بتستخبى فى البلد دى أنا كده بقيت مفضوح ومن ده بكره بقرشين )
ظلام تدريجى دامس يخيم على الحجرة وعلى وجه مرسى