البااارلمنجي: طلب فّتة وممبار في برلمان أم منار

سبحان الله يا جدعان.. نواب دائرتنا آخر «بدنجان».. تجيبهم يمين يروحولك «شمال».. نشرحلهم همومنا لكنهم في «التوهان».. وكأنهم هبطوا علينا من كوكب «السرطان».. مشاكلنا بالنسبة لهم «وهمية».. وشايفين أن الحكومة عاملة اللي عليها والحياة هتبقى أحلى بنسبة 100%.
وأنا بقى جمعتكم النهاردة يا أهل دائرتي علشان أقدم لكم كشف حساب للخدمات والإنجازات اللى قدمها لنا نواب دايرتنا بعد اجتماعنا معهم الشهر اللي فات.
وطبعا كلكم فاكرين كم المشكلات اللى عرضناها على السادة نواب دائرتنا ووعدونا بتقديم طلبات إحاطة واستجوابات وبيانات عاجلة في البرلمان.. وكلكم عارفين أن الشهر مر علينا دون أن نسمع عن نواب دائرتنا خبرا يشير لنا بأنهم موجودون أصلا تحت قبة البرلمان.. اللهم إلا ظهورهم على شاشات الفضائيات وهم يقتصون من إنسان الغاب طويل الناب.. النائب الخائن الكداب.. حسب وصفهم المهبب بستين هباب.. المدعو «السادات»!
لكن وإحقاقا للحق أنا شاهدت سيادة النائبة أم منار وهي بتجلجل في برامج «التوك شو»، وتعرض البيان العاجل بتاع معاليها واللي قلب كيان الحكومة.
النائبة بتاعتنا سايبة كل همومنا ورايحة تحذر الحكومة في بيان عاجل من «طبق الممبار الصيني» اللي بيتباع في السوق المصري بدون تراخيص.
وراحت تصرخ أمام الإعلامي إياه أن «الممبار» ضار جدا بصحة المصريين.. وأنها خايفة على الشعب المحتار من تسممات الممبار.. قال يعني الشعب كان اتصدم قبل كدا لما عرف أنه بياكل لحمة حمار!
وراحت النائبة بتاعة دايرتنا تصرخ أمام الشاشات في وجه الحكومة، وتقول بصوتها «المسرسع» الجميل: «هي الحكومة عارفة بالمصيبة اللي بيتعرضلها الشعب دى ولا مش عارفة؟!.. جاوبوني يا أهل الدار.. هل تعلم الحكومة خطورة أطباق الفّتة والممبار؟!».
وطبعا كالعادة لم ترد عليها الحكومة ولا «البدنجان».. وآدى نتيجة اختياراتكم يا بني الإنسان!
مع تحياتي: أخوكم «نزيه صندوق عبد المتعال الناخب» الشهير بالبااارلمنجي.. نائب ساقط ببرلمان 2016.