البااارلمنجي: نائب مناخوليا.. باع دايرته بأوامر عليا

أنا بقى جمعتكم النهاردة يا أهل دايرتى الكرام علشان أناقش معاكم المهزلة اللى نواب دايرتنا حطونا فيها وكسفونا وسط أهالي الدواير اللى حوالينا.
حد منكم هيقولى خير ياعم البااارلمنجى.. اللهم اجعله خير!! وأنا هرد عليه وأقوله: ومنين هييجي الخير ياواد عمى!!
وهفكر حضراتكم بأيام الانتخابات لما كل مرشح كان بيعرض أم البرنامج بتاعه قدامنا.. ورغم أننا كنا عارفين أنه فشار وصدره واقع فإننا كنا بنصفق له ويتكل على الله وييجي غيره وهاتك يارغى.. فاكرين ولا ناسيين؟!
طب فاكرين لما اجتمعنا هنا في الدايرة وقررنا أن برنامج حزب المصريين الأحرار هو اللى ممكن يحقق لنا أمانينا في البرلمان خاصة أن معظم المرشحين من بتوع دعم الدولة وفى حب الدولة"؟!
ساعتها قلنا إحنا عايزين مرشح يقف في وش الدولة.. ومش عايزين مرشح ينحنى للحكومة والدولة.
وفعلا وقفنا وراهم.. وفعلا نجحناهم.. وكلنا كنا عارفين أن حملاتهم الانتخابية على نفقة الحزب بتاع المصريين الأحرار.. وكلنا برضو كنا عارفين مين اللى بيمول المصريين الأحرار.
يعنى احنا عارفين إن اللى أسس الحزب عمل واجب مع مرشحين دايرتنا.. يعنى عمل واجب معانا إحنا اللى صوتنا لمرشحى الحزب في دايرتنا.. وحلمنا بتحقيق برنامج الحزب في دايرتنا على يد مرشحى دايرتنا اللى بقوا نواب دايرتنا.
قوم إيه نصحى من النوم نلاقى نوابنا لا حس لهم ولا خبر تحت قبة البرلمان.. وعلى كل اللى بتعمله الحكومة موافقين كمان.. يعنى باعوا الدايرة وودونا في خبر كان.. لدرجة أنهم موافقون على رفع الدعم عنا كمان.. لكن أنا أخيرًا عرفت السر يا مان.
أتاري البهوات نوابنا التلاتة.. طلقوا الحزب بالتلاتة.. بطريقة كلها غتاتة.. بالضبط كما طلقوا مصالحنا العامة لحساب مصالحهم الخاصة.
أنا والله حسيت بالعار.. واتصلت بالسادة نوابنا الكبار.. وعن طريق الهزل والهزار.. سألتهم ليه بعتم الراجل اللى دخلكم الدار؟!!
بكل بجاحة قال أولهم "والله هي جات كدا.. إحنا لقينا نفسنا مع الجبهة التانية".. وقال الثانى "ياعم إحنا بناكل عيشنا.. أما الثالث فقال: "شكلها كدا أوامر عليا ضد صاحبنا إياه.. بس لسه هنشوف.. إحنا برضو مع المصلحة أينما كانت".
والله يارجالة أنا حسيت بالعار؛ لأن النواب دول بيمثلوا دايرتنا..وقال على رأى المثل: "تيجى تزرعه.. يقلعك" ونوابنا عايزين يخلعوا الراجل اللى زرعهم من أم الحزب.. مع أنه هو اللى زرعهم في البرلمان وفى الحزب.. وعجبى
مع تحياتى: أخوكم "نزيه صندوق عبد المتعال الناخب" الشهير بالبااارلمنجى.. نائب ساقط ببرلمان 2016.