البااارلمنجى: سيادة النائب «الكلبوظة» عايز يأكلنا «البلوظة»

من الغريب الرهيب المريب أنك تلاقى نائبًا يبرر أخطاء الحكومة بهذا الشكل العجيب.. يعنى الحكومة تقرر إعفاء الدواجن المستوردة من الجمارك تلاقيه طالع علينا يقول لنا إن الحكومة تقصد من أم القرار ده منع ارتفاع الأسعار.
النائب بتاع أم الدايرة بتاعتنا لا يناقش الحكومة في قراراتها ولا يسكت ويسيب الأمور تعدى.. لأ.. دا لازم يحرق في دم أُم أهالي الدايرة، ويطلع يبرر تصرفات الحكومة عمال على بطال.. قال إيه لأنه بيعمل لمصلحة الوطن وطبعًا هو شايف نفسه «مستقبل وطن» أي والله مستقبل وطن ودعم وطن ويحيا الوطن وكل الأسماء دى هي اللى هتخرب أم الوطن، وأنا بقى جمعتكم النهاردة يا أهل دايرتى علشان أقولكم آدى نتيجة اختياراتكم لنواب دايرتنا اللى هي جزء من الوطن.
اللى يغيظك بقى أن النائب بتاعنا بعد أن أتحفنا بكلامه اللى يحرق الدم رجع ليكمل على أهالينا بالقاضية فقال إن الحكومة تعمل جاهدة على رفع العناء على المواطن، ومن لا يرى هذا التيسير في حياة الفقراء في الفترة الأخيرة فهو أعمى النظر والقلب والطحال والبنكرياس.
بس برضه النائب رجع وطالب الحكومة _كدا وكدا يعنى_ بأنها لا ينبغى أن تكون قراراتها على حساب منتجى الدواجن خصوصًا أن هناك استثمارات ضخمة تتخطى ال 50 مليار جنيه.
يعنى هو عارف أن عندنا إنتاج دواجن بالمليارت وعندنا بنى آدمين بيعملوا موظفين في أم قطاع الدواجن وهتتخرب بيوتهم على إيده وإيد الحكومة بتاعته.
سيادة النائب الكلبوظة عايز يأكلنا البلوظة وبيلاعبنا لعبة حاورينى يا كيكا ويرجع يقول بالصوت الحيانى: لازم الحكومة تحد من الاستيراد وتشجع الصناعة المحلية والاستثمار المحلي لتوفير آلاف من فرص العمل للشباب والقضاء على البطالة.. الراجل دا هيجننى
مع تحياتى: أخوكم «نزيه صندوق عبد المتعال الناخب» الشهير بالبااارلمنجى.. نائب ساقط ببرلمان 2016.