طالما الحكومة والبرلمان راسين في طقية.. يبقى لازم عجينة يطالب بكشف العذرية

شايفين يا حضرات؟!.. سامعين يا بهوات؟!.. البرلمان بقى بيخدش حياء البنات.. اه والله «زمبقولكم كدا».. شوية «أعضاء» يعانون من الحرمان الجنسي تم دسهم داخل البرلمان بطريقة أو بأخرى وأنا معرفش إزاي!
بصراحه أنا جمعتكم النهاردة يا أهل دايرتي الكرام علشان أحملكم مسئولية اللى بيحصل في برلمان الشعب.. لأن الكام نائب اللى بيشوهوا البرلمان كلهم من دايرتنا.. وكلهم معروفون لديكم.. لكنكم صوتم لهم طمعا في المصلحة.. أغرتكم أموالهم وتركتونى أنا ابنكم البار الذي يحمل همكم.
نائبنا وابن دايرتنا الهمام بدلا من أن يناقش مشاكلنا داخل البرلمان راح يطالب الحكومة بإلزام الجامعات بإجراء كشف عذرية على البنات اللى هيدخلوا الجامعة.. وقبلها بأسبوع كان بيقول بالصوت الحيانى إن الرجالة المصريين ما بيعرفوش.. طب لما الرجالة ما بيعرفوش ياحتت عجينة طرية.. يبقى إيه لأزمة كشف العذرية؟!
يعنى حتى في الاستهبال فاشل يا سيادة النائب.. لا بقى واللى زاد الطينة بلة أن نائب تاني من دايرة تانية بيكمل السخافة وبيطالب بأن كشف العذرية يبقى في بداية كل عام دراسى حتى تنهى البنت الأربع سنوات جامعة.. دا طبعا بغض النظر عن البنات بتوع طب وهندسة اللى هيتكشف عليهم ست أو سبع مرات.. برضو كلام له وجاهة لأن البنت ممكن تبقى سليمة وهى دخلة الجامعة وتطلع منها ضاربة ورقتين عرفى وواحدة مسيار!
أصل طالما الحكومة والبرلمان بقوا راسين في طقية يبقى ياما هنسمع من الهرتلة والمهلبية.. ويبقى من حق عجينة أن يطالب بكشف العذرية وأكتر شويه.. لأن النائب مالوش وش يطالب الحكومة بحاجة تخص الشعب.
مع تحياتى: أخوكم «نزيه صندوق عبد المتعال الناخب» الشهير بالبااارلمنجى.. نائب ساقط ببرلمان 2016.