النائب «الفنكوش» بيقول إن الرجالة المصريين «مابيعرفوش»

شوفوا بقى بالصلاة ع النبى.. أنا النهارده جمعتكم يا أهل دائرتى الأعزاء علشان أوريكم عينة من النواب اللى اخترتوهم وصوتم لصالحهم على حسابى أنا ابنكم وحامل همومكم.
سيادة النائب المبجل عن دائرتنا أصبحنا بالنسبة له رجالة ورق.. أي والله رجالة ورق.. وبيقول إننا رجالة مابنعرفش.. وقال سيادته إن نص رجالة الشعب المصرى عندهم ضعف جنسى وأصبحنا لا نعجب البيه النائب وعايز يستبدلنا برجالة من «الصين».. وقال على رأى المثل: «رضينا بالنائب والنائب مش راضى بينا».
وطبعا مصر كلها بتقول إن دايرتنا مافيهاش رجالة.. عشان سيادة النائب بيقول إنه عمل إحصائية عند مأذون الناحية وعلم منه أن سبب حالات الطلاق هو الضعف الجنسى عند الرجال.. يعنى فضيحتنا بقت بجلاجل بين الدواير يا رجالة.
والنائب ده بيفكرنى بنائب أسكتلندى اسمه «فنكوش دانيال».. كان يطالب الحكومة الأسكتلندية بإعطاء الجنسية الأسكتلندية للشباب المهاجرين من دول أفريقيا لأنهم أكثر فحولة من شباب أسكتلندا وقادرون على إنجاب الأولاد للحد من ارتفاع نسبة الإناث هناك.. وكان الفنكوش يقول بالفم المليان أن الرجالة «مابيعرفوش».
وأدينا عشنا وشُفنا نائب مصرى بيقول إن الرجالة في مصر مابيعرفوش.. مثله مثل النائب الفنكوش الأسكتلندى.. فهل يجب السكوت على مثل هذا النائب يا رجال دائرتي؟!.. وهل صوتم له كى يناقش قضايا الجنس داخل البرلمان أم صوتم له ليناقش قضايا الفقر والهم والغم الذي نعيش فيه؟!
مع تحياتى: أخوكم «نزيه صندوق عبد المتعال النائب» الشهير بالبااارلمنجى..
نائب ساقط ببرلمان 2016