النواب عايزين يعلمونا الأدب

عارفين ياجودعان أنا ليه زعلان؟! علشان لما بشوفكم متحسرين على أصواتكم اللى راحت هدر بتصعبوا عليا.. خاصة لما حد منكم ييجى يشكيلى من حال البرلمان المصرى.. طب ماانا كنت قدامكم أهه ولم تنتخبونى وفضلتم علىّ أصحاب الأموال.. ودا طبعا لأنكم لا يملأ أعينكم إلا التراب.. وكما يقول المثل الشعبى: زامر الحى لا يُطرب.
عموما مش ده موضوعنا.. أنا جمعتكم النهاردة علشان أفرجكم على بلوة جديدة من بلاوى نوابكم الذين اخترتموهم ليمثلونكم تحت قبة البرلمان.. واحد من حبايبنا نواب دايرتنا قدم للمجلس اقتراحًا بسن قانون قال إيه ياسيدى اسمه قانون "التربية الأخلاقية".
صاحبنا بيطالب الحكومة حبيبة قلب معاليه إنها تسن قانون ينظم أخلاق الشعب.. وكأن الشعب أصبح من وجهة نظر معاليه شعب "قليل الرباية".. وطبعا طلع كام نائب من النواب اللى مش لاقيين لهم شغلانة داخل البرلمان وأيدوا الفكرة وقالوا فعلا الشعب ده عايز يتربى.. ولازم يتربى وبالقانون.
طبعا فيه نواب كتير اعترضت على الفكرة الهابطة دى وقالوا للنائب بتاعنا: يعنى إحنا خلصنا كل مشكلات الشعب ومابقيش لنا غير أننا ننظم أخلاقه؟!
وأنا من هنا أقول لسيادته: ياسيدى روح نظم وقتك وفرغ ولو ساعة منه للقاء أهل دائرتك المطحونين واسمع شكواهم من صديقتك اللى اسمها الحكومة.. ياسيدى روح قول للحكومة توفر الأكل للشعب وتستره بدلا من أن تطالبها بتربيته.
مع تحياتى: أخوكم "نزيه صندوق عبد المتعال الناخب" الشهير بالبااارلمنجى.. نائب ساقط ببرلمان 2016.