البااارلمنجى: النواب بيفرشوا المساجد.. والشعب بيفرد لهم الملاية

أهالي دائرتى الكرام.. أنا لم أجمعكم اليوم لأننى غاوى رغى.. لكننى جمعتكم بغرض استعراض تصرفات النواب الذين اخترتموهم على حسابى.
طبعا حد منكم هيطلع يقولى "بلاش تهرى في المهرى يا بااارلمنجى" وطبعا هيقولى إن النواب فرشوا المساجد في الدائرة بمناسبة شهر رمضان في كل دوائر الجمهورية وبارك الله فيهم.
لكن أنا بقى هرد على سعادتك وهقولك "هو أنت انتخبتهم علشان يفرشولك المسجد ولا علشان يفرشولك بيتك اللى مافيهوش مروحة ترطب على العيال في شهر الصيام؟!".. ما هو لما سيادة النواب يوفرولك شغلانة كريمة انت وأمثالك.. ساعتها هتقدر تجيب مروحة وهتقدر تفرش بيتك.. مش كده ولا إيه ياشعب دائرتى الكرام؟!
وثالثا وليس ثانيا تعالالى أنت وهو وجاوبونى على السؤال ده:
هو ليه النائب بيعلن في دايرته أنه قام بفرش المسجد الفلانى.. فجميعنا يعلم أن وزارة الأوقاف هي الجهة المنوطة بفرش المساجد حسب خطة زمنية معروفة مسبقا.. وجميعنا يعلم أن الحكاية فيها إنّ طالما أنه لم يفرشه على نفقته الخاصة.
اسمعوا وعوا يا أهل الزمان والمكان.. فلما كانت وزارة الأوقاف هي الجهة المسئولة عن فرش المساجد في أنحاء البلاد.. ولأن الأوقاف تتبع الحكومة.. وبرلماننا العزيز وافق على بيان الحكومة وأصبح البرلمان والحكومة نسايب وحبايب فقد وجب رد الجميل
عمنا وزير الأوقاف طلب من كل نائب كشف بالمساجد اللى عايزه تتفرش داخل دائرته وأهو كده كده تبقى خدمة للنائب يتباهى بيها قدام أهل دائرته.
قوم إيه بقى عمنا النائب يوعد الأهالي بأنه سيجبر وزارة الأوقاف على فرش تلك المساجد
قوم إحنا نصدق أن النائب هو اللى فرش الجامع غصب عن أم الحكومة
قوم ننتخبه تانى لفترة تانية.
لأ والغريب أن النواب قاموا بتقسيم المساجد فيما بينهم داخل الدائرة الواحد.. يعنى انت قول انك هتفرش المسجد الفلانى وانا اقول انى هفرش المسجد العلانى.. وكله بالحب
بس دا عشم إبليس في الجنة.. لأن الشعب لازم يحاسب النواب ويفرد لهم الملاية ويسألهم عن إنجازاتهم.. ففرش المساجد ليس إنجازا ياعم النائب انت وهو.. الإنجاز في فرد الملاية.
مع تحياتى: أخوكم "نزيه صندوق عبد المتعال الناخب" الشهير بالبااارلمنجى.. نائب ساقط ببرلمان 2016.