البااارلمنجى يكتب: علشان الحياة مناولة عملوا ائتلاف دعم الدولة

وأدينا بنتعلم أدينا.. أدينا بنتعلم..
نسكت نخرس خالص إحنا.. والنواب تتكلم
خلى العالم يجى يتفرج ومنهم يتعلم
عملوا ائتلاف لدعم الدولة.. والشعب بيتألم
بس أنا عايزك تخرس خالص وأوعى تانى تتكلم
ما أنت اخترت وأنت يا صاحبى عمرك ما هتتعلم
دى كانت شوية أبيات حلمنتيشى كده على ما قُسم.. وكان لا بد منها كمقدمة للموضوع اللى جاى اتكلم معاكم فيه النهاردة.. بعد أن علمت أن أعضاء البرلمان اللى حضراتكم انتخبتوهم راحوا يعملوا ائتلافا داخل البرلمان وأسموه "ائتلاف دعم الدولة".. وطبعا الغرض منه أن النواب عايزين يبلغوا رسالة للشعب أنهم مع النظام ضد أي حد وأى حاجة وكأنهم يقولون لكم إن الانتخابات التي جرت كانت ولا حاجة وأى حاجة في أي حاجة وما لهاش أي ميتين عازة.
حد هيقولى طب ليه يا عم البااارلمنجى بتقول كده.. هو أنت يعنى ضد توجهات الرئيس في الوقت الحالى؟!
وأنا طبعا هقول: لا بالعكس ده أنا أكبر داعم للرئيس في الوقت الحالى!
فهيرجع يسألنى طب إيه اللى مش عاجبك في الائتلاف يا عمنا؟!
أنا بقى هقوله طب اترزع كده على حيلك واسمعنى يا عم الفلحوص.. تقدر تقولى يعنى إيه أكثر من 400 نائب يعلنوا انضمامهم لائتلاف واحد تحت مسمى دعم الدولة؟!.. أمال مين اللى هيعارض الدولة ويصوبها ويعدل مسارها لو مالت كده ولا كده؟!.. طب لما هما رموا نفسهم في حضن الدولة يبقى أنت انتخبتهم ليه بقى يا فلحوص؟!
هؤلاء النواب أنا أعتبرهم غير مسئولين بالمرة عن المواطنين الذين انتخبوهم.. والدليل أن الفكرة خرجت من رحم جماعة "في حب مصر" وطبعا حب مصر دى قائمة كانت ناجحة ناجحة والدليل أنها نجحت باكتساح وصوت لها الناس دون حتى أن يعرفوا من هم أعضاؤها.
طبعا انتم هتقولولى إنى حاقد على النواب إللى نجحوا في الانتخابات لأننى لم أوفق في الوصول للبرلمان.
وأنا هقولكم أبدا خالص أبسبيوتلى.. أنا بس عايزكم تتفرجوا على نتيجة اختياراتكم.. أديكم انتخبتم نواب الدولة وبمجرد وصولهم للبرلمان عملوا ائتلاف لم يحدث في برلمانات العالم وأراهنكم أن يكون الرئيس "السيسي" راضى عن هذا الائتلاف الجهنمى
وأنا أرى أن يقوم الرئيس بتعيين نواب معارضين لنواب الدولة.. أي والله لازم الرئيس يراعى الموضوع ده في اختياراته للنواب المعينيين
أما هؤلاء النواب فقد اعتادوا على أن الحياة "مناولة" وعلشان كده عملوا ائتلاف دعم الدولة
طب ألم يكن من الأفضل أن يتم تشكيل البرلمان بالتعيين وتقوم الدولة بتعيين رجالها المخلصين لها بدلا من تلك الأموال التي تم إهدارها في الانتخابات؟!
واللذيذ في الموضوع إن السادة أعضاء البرلمان.. قصدى أعضاء الائتلاف يرفضون ضم أعضاء حزب النور إليهم ههههههههههههههههه وكأنهم يقولون للنائب الذي لن ينضم معهم أنه تابع للنور أو الإخوان في إشارة تهديد لمستقبله البرلمانى.. أو في إشارة إلى أن النائب المعارض لنواب الدولة سوف يعامل داخل البرلمان معاملة نواب النور
بصراحة أنا شمتان فيكم يا أهالي مصر وخاصة أهل دائرتى الذين لم ينتخبونى لأكون صوتهم داخل البرلمان وانتخبوا نوابا ليكونوا صوت الدولة داخل البرلمان
عموما أدينا بنتعلم من الزمان.. ومعلش إحنا بنتكلم يا مان.
مع تحياتى: أخوكم "نزيه صندوق عبد المتعال الناخب" الشهير بالبااارلمنجى مرشح ساقط ببرلمان 2015