حديث المدينة

مفيد فوزى : انا لا اعتقد بتاتا انكم عندكم رغبة مرة اخرى ان تعود الينا هذه النوعيات من النواب فى مجلس الشعب ودعونى افكركم دعونى اذكركوا انعش الذاكرة قليلا نواب الكيف النواب النقوط نواب القروض نواب اكياس الدم نواب التأشيرات نواب سميحة نائب الرصاص نائب الحزاء نائب السي ديهات نائب القمار نائب المحمول نواب العلاج نواب سيئ السمعة . من اجل هذا اعود مرة اخرى لاقيس حرارة الوعى لمستقبل وطن يحتشد لانتخابات قادمة تمثل مصيرا فى حياة امه التحقيق فى حديث المدينة
فاصل
مفيد فوزى : انت هل عندك بطاقة انتخابية؟
مواطن : بطاقة انتخابية
مفيد فوزى : ياسلام المسألة محتاجة كل ده يا عندك يا معندكش
مواطن : عندى
مفيد فوزى : هل بتروح تنتخب ؟
مواطن : بالطبع لازم اروح انتخب
مفيد فوزى : مش لازم انت بتروح تنتخب ؟
مواطن : اه بروح بروح انتخب
مفيد فوزى : انت بتنتخب مين؟ هل انت بتنتخب بلدياتك؟ والا بتنتخب الراجل اللى بيعرف ربنا والمتدين فهمنى؟
مواطن : انتخب الراجل اللى هو هيوصلنى للشيئ الصح
مفيد فوزى : وايه الشيئ الصح عندك ٍ؟
مواطن : الشئ الصح ان انا ابقى مواطن سليم مواطن بلاقى كل امورى سهلة
مفيد فوزى : يعنى ايه امورك سهلة؟
مواطن : فى حياتى
مفيد فوزى : يعنى ايه اللى يخلى..
مواطن : يعنى اى مشكلة فى حياتى هو هيقدر يحلها او مش هيحلها
مفيد فوزى : اه يعنى ده المعيار؟
مواطن : طبعا امال يعنى هيكون المعيار ايه
مفيد فوزى : مشاكلك؟
مواطن : مشاكلى ماهى المشاكل ومشاكل زميلى ومشاكل اخويا
مفيد فوزى : زى ايه زى ايه ؟
مواطن : ساعات المجال سواء تعديات المراحل التعليمية والمشاكل فى الحياة بقى عامتا اولادى اذ كان فى مدارس عايزة يعنى اى عقبات يقدر يزللها لى
مفيد فوزى : يروح يخبط عليك؟
مواطن : اه طبعا المفروض المفروض ان هو يستقبلنى بنفس ال
مفيد فوزى : الحماس؟
مفيد فوزى : قولى حضرتك لما تكون نائبة فى مجلس الشعب هل ممكن حضرتك تروح تخبط عليها فى البيت لما يبقى لك مشكلة؟
مواطن : بامانة لأ
مفيد فوزى : بامانة لأ
مواطن : بامانة لأ
مفيد فوزى : الله يعنى كان النائبة دى ظروفها صعبة ؟
مواطن : اه صح فى مجتمعنا بتبقى صعبة شوية مش اى وقت اخبط عليها واروح لها واقول لها
مفيد فوزى : انما اى راجل تخبط عليه
مواطن : بامانة الصراحة كده
مفيد فوزى : يعنى انت ممكن تنتخب واحد لانه كان بيعرف ربنا وانك لازم تبقى قريب من ربنا هتبقى مرجعية دينية؟
مواطن : اللى هيقدر يخدمنى ويخدم بيتى وعيالى وبلدى ده اللى هتنتخبة لكن فى ما عدا ذلك لأ
مفيد فوزى : يعنى مايهمكش مسالة المرجعية الدينية؟
مواطن : لأ
مفيد فوزى : انت فاهم يعنى ايه المرجعية الدينية؟
مواطن : فاهم فاهم فاهم وعارف فاهم ماتفرقش معايا خالص
مفيد فوزى : لكن انت ست صعب ست تديها صوتك؟
مواطن : صعب اه اه صعب
مفيد فوزى : صعب تديها صوتك؟
مواطن : اه اه
مفيد فوزى : هو حضرتك متزوج؟
مواطن : متزوج وعندى عيال
مفيد فوزى : مراتك بتشتغل ؟
مواطن : دلوقتى لأ
مفيد فوزى : انت اللى اقعدتها؟
مواطن : لأ انا ثلاث بنات عندى فا قعدت
مفيد فوزى : انت خايف على البنات ؟
مواطن : طبعا
مفيد فوزى : فقلت لها اقعدى ؟
مواطن : برضاها هى
مفيد فوزى : هى مش بتجيب مرتب تصرفه فى البيت ؟
مواطن : بتجيب مرتب
مفيد فوزى : ومع ذلك انت فضلت..
مواطن : هى طلبت كمان
مفيد فوزى : قالت تقعد؟
مواطن : هى طلبت تقعد طيب على العين وعلى الراس
مفيد فوزى : انت سى السيد فى البيت بقى؟
مواطن : لألأ ابدا والله
مفيد فوزى : عشان كده مش ممكن ابدا انك انت
مواطن : مش النظرية كده تعنى الست بردوا محدودة شوية غير الراجل
مفيد فوزى : خصوصا السياسة؟
مواطن : لأ مش سياسة دى حاجة كقطاع خدمى بالنسبة للناس بالنسبة انا يهمنى الخدمة اللى هتأديها لى هى صعب انها تقوم بده غير حتة انها ناجحة فى حاجات كثيرة لكن بالنسبة ليا انا صعبة شوية
***
مفيد فوزى : يادكتور انت من الممكن لما تكون ناخب مستنير وعندك حد مرشح نفسه ومن بلدك بلدياتك اكيد هتنتخبه صراحة؟ امانة كده يعنى من غير ما تدعى يعنى
د. كريم محمد باشا : صراحة يا استاذ مفيد كان عندى فرصة طلعت بطاقة انتخابية بس ما رحتش انتخبت يعنى
مفيد فوزى : امال عملت بيها ايه ؟
د. كريم محمد باشا : لأ الصراحة انا جبتها بس لاخر لحظة عزفت على انتخاب حد منها بردوا الواحد مهواش مقتنع ان فى حياة سياسية فى مصر يعنى لكن معندناش حياة سياسية يعنى يمكن مجلس الشعب فيه جزء من الحياة السياسية لكن ماهياش كل الحياة السياسية احنا معندنش احزاب قوية احنا احنا عندنا حزب واحد محتكر الامور كلها وان ماكنتش معاة تبقى ضده بقيت الاحزاب من اولها الى اخراها سواء كان الوفد او التجمع الناصرى او حتى الجبهة الديمقراطية كل دى للاسف ليس لها حتى هذه اللحظة دور قوى الحياة السياسة فى مصر وملهاش جمهور
مفيد فوزى : هل لها رصيد فى الشارع ؟
د. كريم محمد باشا : دلوقتى ليها رصيد طبعا قوى جدا كان قبل كده لكن دورة دلوقتى انكمش انكمش لدرجة غير معقولة يعنى ممكن هما يكونوا دلوقتى بدأوا يرجعوا تانى للحياة السياسة بس بردوا لسه امامهم وقت طويل علشان يقدروا ينافسوا الحزب الواحد اللى مسيطر على الامور يعنى فى الحياة السياسة محتاجة اصلاح محتاجة احزاب تستوعب طاقات الشباب الجامعى والشباب المصرى الموجود فى كل حتة يعنى محتاجين كلنا نتحط فى سياسة
مفيد فوزى : انت ما استخدمتش بطاقتك الانتخابية بتاعت ؟2005
د. كريم محمد باشا : انا ما استخدمتهاش ومش هنتخب الدورة ديت لان اللى حاصل فى انتخابات الشورى المرة اللى فاتت حاجة سيئة جدا ونموذج سيئ للانتخابات واحنا بنبص على الناس اللى بتنتخب حتى فى دول عربية بنلاقى ديمقراطية حقيقية يعنى بنبص عليهم وبيحصل لنا نوع من الاحباط بنغير يعنى طب احنا ليه ما نبقاش كده ليه ما يبقاش الواحد وهو رايح ينتخب انه كل ده هيفرق يعنى صوته ده ممكن ينجح مرشح ويسقط مرشح ثانى ، دى نماذج سليمة فى مجلس الشعب كل شهر كل فترة نسمع عن نائب قمار نائب قروض نفقة الدولة فساد حاجة تدعو الواحد الى الاحباط يعنى
مفيد فوزى : يعنى ما تدعوكش انك انت تخش بصوتك يعنى اذا كنت انت شايف ده بردوا هتقف سلبى تتفرج تتكلم وتفضل تقر؟
د. كريم محمد باشا : طب وليه تسميها نوع من السلبية انت تسميها يعنى..
مفيد فوزى : هل هو موقف انك انت تبعد؟
د. كريم محمد باشا : اه موقف طبعا
مفيد فوزى : انك تبعد؟ ما هو غيرك هيدخل وهيديك مجلس أسوأ
د. كريم محمد باشا : ماهو غير ده مش قادر اسيطر عليه مش قادر اقف ضده يعنى الاحزاب نفسها لها معارضة
مفيد فوزى : قيمتك يا دكتور بصوتك ايه يعنى خلينى ادخل معاك بهذه النوعية من الاسئلة 000 احساسك بصوتك ايه ؟
د. كريم محمد باشا : قيمتى فى حياتى فى المجتمع اللى انا شغال فيه
مفيد فوزى : بس يعنى انت قيمتك اللى معتز بيها مهنيا؟
د. كريم محمد باشا : طبعا اه طبعا
مفيد فوزى : مش قيمة سياسة ؟
د. كريم محمد باشا : قيمة سياسية مش لاقى حياة سياسية
مفيد فوزى : انت مش حاسس ان انت يعنى شئ مضاف للحياة السياسية
د. كريم محمد باشا : ايام الجامعة كان لينا نشاط بس كان نشاط محدود بردوا نشاط لازم ترضى عنه الادارة ترضى عنه الشرطة لازم محكوم بردوا ماتقدرش تاخذ حريتك مفيش حرية التعبير وبعدين يا استاذ مفيد لازم يحصل اصلاح شامل فى حاجات كثير جدا ازاى نطالب مثلا رب اسرة بيطلع من الساعة 6 الصبح مايرجعش مثلا غير الساعة 12 بالليل ان هو يروح ينتخب مفيش بيت دلوقتى فى مصر مافيهوش فشل كلوى او فشل كبدى او سرطان وسرطانات الاطفال اللى كثرت فى كل حتة دى ازاى يعنى
مفيد فوزى : كل الكلام اللى حضرتك بتقوله ده بياكد لى انه من الضرورة بل الحتمية ان كل الاصوات اللى زى حضرتك تدخل طب هسألك سؤال هل انت متخيل انه ستزيف ارادتك؟
د. كريم محمد باشا : اه اه طبعا
مفيد فوزى : عندك القناعة؟
د. كريم محمد باشا : انت انتخابات مجلس الشورى كانت من كام شهر
مفيد فوزى : لأ ما تخدش ماهو انت كمان بتقول كلام مرسل يعنى ما بتقوليش ايه يعنى يا استاذ مفيد ما انا عايز اقول لك انتخابات مجلس الشورى فى اشياء سيئة وهو تروح مطلع من جيبك ورق كده وانا احطة امام الناس يشوفوا نوعية من التزيف انما لا تردد كلاما لا تملك فى ايدك القواعد يعنى مثلا اعتبرنى اخوك الاكبر بلاش ابوك يعنى اخوك الاكبر انك انت فى مصر فى أعادة اسمها نربى الاتهام المرسل وربما الفضائيات احد الالوان ربما الفضائيات هى اللى بتعكار صفو الحياة فى مصر
د. كريم محمد باشا : هو الكلام ده جاى منين مش من الواقع اللى احنا بنعيش فيه والا هو كلام مش من الواقع
مفيد فوزى : ماهو من الممكن جدا يبقى من الواقع لكن نحن نملك اصواتنا شوف انا باقول ايه اصواتنا يعنى انا لما بتقول لى انت سنة 2005 لم تنتخب ومعاك بطاقة طب ما انت تملك هذا العمل
د. كريم محمد باشا : بعد اذن حضرتك واللى راحوا انتخبوا ونتج عن الانتخابات مجلس الشعب اللى حضرتك شايفة دلوقتى ده هل حضرتك راضى عن اداء مجلس الشعب دلوقتى
مفيد فوزى : مين قال لك انى انا راضى امال انا ليه هسألك سؤال انا ما اقدرش اجيب سعد الصغير فى حديث المدينة ؟
د. كريم محمد باشا : ممكن اه
مفيد فوزى : مش كده املك والا ما امملكش؟
د. كريم محمد باشا : تملك طبعا
مفيد فوزى : والناس تتفرج
د. كريم محمد باشا : تمام
مفيد فوزى : والناس تنبسط والناس تنشكح انما ايه اللى باعمله ان انا باخذ الموضوع جاد مش لذه عامة انا لا هرشح نفسى ولاعندى طموحات انما فى نهاية الامر عندى رغبة انا والولاد دول اللى انت شايفهم بنفكر ازاى ممكن يحصل تغيير فى المجتمع انا انا ابتدى باللى زيك ووعيه وغيره وغيره وغيره وغيره وغيره وغيره وغيره ثق تماما ان ده هيغير هيمسك بقبضة ممكن جدا انت بتفكر فى الراجل اللى بخدم مصر مش بيخدم دايرة مش كده؟
د. كريم محمد باشا : وظيفة مجلس الشعب الاساسية مش قضاء حاجات للناس والحى اللى ساكن فيه ولايوظف ده ولا يسفر ده
مفيد فوزى : دى دى النظرة الضيقة
د. كريم محمد باشا : ماهى دى للاسف النظرة الموجودة بتاعت الشعب يعنى
مفيد فوزى : اذا ما كنش شاب زيك يغيرها هيسيبها لمين؟
د. كريم محمد باشا : احنا يا استاذ مفيد انا اللى باتكلم فيه ده مش سبب للاحباط او السلبية لا والله ابدا
مفيد فوزى : من المهم ان انا افرض ايرادتى شوف التعبير افرض ارادتى بهذا الصوت لانه مجموعة الاصوات اللى زيك تنجح بلد
د. كريم محمد باشا : ان شاء الله باذن الله هنتمنى ان الانتخابات تكون مثال مشرف لمكانة مصر وللشعب المصرى ويناسب تاريخ مصر احنا كان عندنا زعماء شباب قبل كده مصطفى كامل ومحمد فريد وغيره وغيره يعنى معنى كده ان المبدأ موجود وان تحت الجلد المصريين فى حضارة وفى رقى وعندهم استعداد يغيروا بس نجد المناخ المناسب يعنى نحس كده من حوالينا ان اه انت لو عملت حاجة فعلا هتغير انت لو عملت حاجة فعلا هيبقى فى الافضل فى الاحسن مش ان انت مثلا بتدن فى مالطة
مفيد فوزى : مش هتدن فى مالطة يعنى ربنا يسهل احنا نتمنى من حضرتك الكلام ده وربنا يستجيب لكلامك ده و انشاء الله نصلح ويكون مجلس الشعب احسن من المرات اللى فاتت
فاصل
مفيد فوزى : التهافت فى الانتخابات يؤدى احيانا الى استخدا م البلطجة موقفك ايه عن البلطجة ؟
هند حنفى : غير مسموح بيها حاجة تكسف حاجة تزعل ان احنا نوصل لمرحلة فى الانتخابات يعنى ده وضع غير امنى حتى فى البلد
مفيد فوزى : هناك راى يقول ياريت المعارضة القوية تبقى موجوده هل تعتقدى انه المعارضة القوية مهمة فى حياتنا؟
هند حنفى : مهمة مهمة
مفيد فوزى : طب ليه بيتقال احيانا ان الحزب الوطنى ممكن يخنق المعارضة ويخلى عدد المعارضين قليل داخل البرلمان هل ده وارد؟
هند حنفى : لأ انا فى نظرى مش وارد لان دلوقتى المعارضة بقت ظاهرة جيدا المهم تكون معارضة بناءه مش معارضة
مفيد فوزى : دكتور مدركين معارضة بناءه ومعارضة موضوعية
هند حنفى : اه علشان المعارضة ما بقتش بناءه ابدا للاسف يعنى
مفيد فوزى : اه المعارضة ما بقتش بناءه انتى فى تقديرك هذا؟
هند حنفى : بكثير بكثير قوى
مفيد فوزى : الى كام فى المية ان بيحدث ان الناس تنتخب لمرجعيات دينية بوضوح وامانة ؟
هند حنفى : فى نسبة كبيرة
مفيد فوزى : ما بسألش عن النسبة
هند حنفى : اقول كام فى الميه
مفيد فوزى : نعم
هند حنفى : حوالى توصل الى 40 – 50 %
مفيد فوزى : 40-50% ينتخبون لمرجعية دينية سؤال اخر كام% فى تقديرك الشخصى بينتخبوا لاسباب تتعلق بالعصبية القبلية ؟
هند حنفى : يمكن 20%
مفيد فوزى : هل تعتقدى ان هذه النسبة سببها ايه 20% يعنى سبب انها موجوده ايه ؟
هند حنفى : ان لسة الفكر القبلى مسيطر فى المجتمع مش فى كل الفئات لكن فى فئات معينة وفى اقاليم معينة يعنى مثلا فى مرسى مطروح – الفكر القبلى موجود جدا بشكل كبير
مفيد فوزى : فى الصعيد؟
هند حنفى : فى الصعيد موجود مضبوط
مفيد فوزى : هل انا لما اجى حضرتك تنتخبى وزير كان فى حكومة يعنى كان له اداء ايه المعيار؟ اللى انا فيه ادى له صوتى اوما اديهوش المره دى ما فى ناس مقدمة مرشحة نفسها ايه معايير الاداء الواعية اللى تخلى الناس اللى بتشفنا تدرك انه لما يجى يروح الانتخابات يبقى الوزير ده مش هدى له المره دى صوتى
هند حنفى : ما هى وزارته هى الدليل انجازه فى الوزاة هو الدليل ما هو فى انجازات فى وزارته يبقى ده انسان يستحق وانسان عايز يدى فا اللى عايز يدى بلده وعايز يعمل من اجل بلده ده بيبان فى وزارتة
مفيد فوزى : كام % عنده هذه الدرجة من الموضوعية فى المجتمع طبعا انت عارفة انه فى مصر لم نحشد الاصوات لاكون وزير ايه المعيار
هند حنفى : هو فى حاجتين هو عيب الوزراء بيظلموا ويبقى عليهم هجوم كبير جدا واوقات بتحشد لهم الاصوات
مفيد فوزى : دكتورة هند حضرتك منشنة على منصب الوزير ؟
هند حنفى : وده موجود وده موجود
مفيد فوزى : دكتوره هند هو حضرتك باعتبارك معينة بتحسى بحرج من بواخة اسئلتى؟
هند حنفى : ابدا انا احب الصراحة جدا فى الاسئلة
مفيد فوزى : يعنى انا شايف انا باقول لحضرتك انه ممكن جدا ان تكون لدى الحكومة او لدى الدولة عملية تقليم حجم المعارضة علشان ما تبقاش معارضة مش مستحبة ببساطة كده انا باشوف بشكل متواضع ان المعارضة القوية تستحقها حكومة قوية وبالتالى حضرتك شايفة انه الحشد علشان الوزير ده لانه وزير ؟
هند حنفى : مش تمام لانه جزء من الحشد اه فى وزراء بيتعمل لهم حشد وكل الكلام ده
مفيد فوزى : هل هناك وزراء فى هذه الحكومة مرشحين نفسهم ممكن الناس ما تديش لهم اصواتها ؟
هند حنفى : اه ممكن لأ النا س مش شرط تدى للوزير حقيقى يعنى
مفيد فوزى : هل الناس بتدى اصواتها لرجال الاعمال باسم الضائقة الاقتصادية اللى فى حياتهم ؟
هند حنفى : اه جزء كبير اه
مفيد فوزى : هل تعقدى ان رجل الاعمال فى الحكومة لعب دورا مهما ؟
هند حنفى : الى حد ما
مفيد فوزى : كام %
هند حنفى : كام % من المفروض انه يلعبة والا كام %ْ من اللى حاصل فعلا
مفيد فوزى : كام % من اللى بيلعبه يعنى هناك انتقاد للوزراء من رجال الاعمال؟
هند حنفى : ممكن نقول ان هما عملوا 60% من المفروض يعملوه
مفيد فوزى : 60 % فقط اه طيب كان مفروض يعملوا ايه ؟ فى تقديرك
هند حنفى : كان مفروض يساهموا فى بناء البلد اكثر من كده
مفيد فوزى : بمعنى؟
هند حنفى : بمعنى انشاء المصانع اكثر انشاء فرص عمل طبعا من خلال انشاء مصانع من خلال المؤسسات المختلفة
مفيد فوزى : دكتورة هند حنفى الانتخابات فى مصر فلوس ونفوذ علقى على هذا الكلام
هند حنفى : هى نفوذ طبعا ومش مفروض تكون نفوذ ابدا
مفيد فوزى : الانتخابات صناعة يومية وخلقت ما يعرف باقتصاديات الانتخابات الناس اللى بتعمل اليفت والناس اللى بتاجر معرفش فى ايه
هند حنفى : ما يصرف فى الانتخابات حرام ممكن يعمل حاجات تانية احسن
مفيد فوزى : من فضلك وضحى لى معنى كلمة حرام اول مرة اسمعها
هند حنفى : لانه هدر اموال
مفيد فوزى : هدر اموال؟
هند حنفى : هدر اموال
مفيد فوزى : ازاى ممكن يبقى فى اطر جديدة فى حياتنا نفرضها ونحطها ده بايد مين؟ بايد صانع القرار فهمينى؟
هند حنفى : نثقف شعبنا ونثقف بلدنا الناس المسئولين لما كل الناس تبقى عارفة اية اللى بيحصل يبقى فى توعية مين هيفيدهم مين يمثلهم هيعرفوا ان مش لازم الفلوس كل حاجة ما نشتريش الناس بفلوسك
مفيد فوزى : هل الضائقة الاقتصادية بتلعب دور فى حياة الناس هل ده اللى بيخلى المرشحين يدخلوا المال السياسى ان صحت العبارة ؟
هند حنفى : للاسف ايوا
مفيد فوزى : للاسف كده
هند حنفى : انا باقول كل اللى عندى
مفيد فوزى : لأ انتى متحفظة ليه؟
هند حنفى : مش متحفظة
مفيد فوزى : طيب كلمينى على المرأة فى الانتخابات ،بيحدث احيانا انه على الفيس بوك بتطلع اشاعات ، واشاعات قاتلة هل هى طبيعة المنافسة والا طبيعة, مجتمع والا قيم مجتمع وانت سيدة فاضلة المنافسة غير شريفة لما توصل ان هما يجرحوا الناس تبقى منافسة غير شريفة واحنا لازم نحد من الطرق اللى هى بتأثر على القيم ما بتاخذش فى الاعتبار القيم الاخلاقية قيم المجتمع بتعنا الشرقى حتى لو احنا فى مجتمع غربى مايصحش فى اصول ما صحش التجريح بالناس ما يصحش الكلام على الظروف الشخصية لاى شخص ما ينفعش المفروض ان يبقى فى عقلانية فى الدعاية الانتخابية ولكن التجريح ده
مفيد فوزى : هل المنافسة الى هذا الحد ممكن تبقى تخلى يختلط الحابل بالنابل؟
هند حنفى : ده اللى بيحصل فعلا
مفيد فوزى : ده اللى بيحصل ؟
هند حنفى : وده بيخلى سيدات كثير على مستوى عالى كان ممكن ينفعوا البلد يخافوا ان هما يخوضوا معارك الانتخابات
مفيد فوزى : يحجمن صح الكلمة؟
هند حنفى : بالضبط بالضبط
مفيد فوزى : يحجمن عن ان هما يخشوا التجربة
هند حنفى : لانها فيها تجريح للشخصية نفسها للشخص نفسة
فاصل
مفيد فوزى : سيادة المستشار يمكن هكلمك فى موضوع اخر شديد الاهمية البلطجة فى الانتخابات
المستشار : هذه البلطجة اصبحت وسيلة فعالة جدا فى الانتخابات ومستخدمة استخدام على نطاق واسع وللاسف الشديد كنت انا رئيس اللجنة الدائمة للتشريعات بوزارة العدل اعدينا مواد قانون 375 و375 مكررة للبلطجة كانت شاملة كل صور البلطجة لمقاومة البلطجة لمكاحة البلطجة والقضاء عليها تماما وفعلا لما هذه المواد اتعلمت 375 و375 مكررة فى قانون العقوبات نفذت وكانت ناجحة جدا فى مكافحة الولاداللى استخدموا اساليب البلطجة من استخدام الحيوانات والاسلحة البيضاء والحاجات دى كلها لكن للاسف طعن على القانون بانة بيعرض على مجلس الشورى كا اجراء دستورى وحكم بعدم دستوريتة مش فاهم لية السبب لحد انهارده لانه لم يعرض على مجلس الشورى رغم القانون هو القانون فى مادة الدستور
مفيد فوزى : تمام
المستشار : فالى الان لم تفكر الجهات المعنية انها تعيد صياغة هذه المواد ثانى او تعيد وضع هذ ا القانون مرة اخرى وعبر مجلس الشورى علشان يعدل الوضع الدستوى بتاعة دى معرفش لية
مفيد فوزى : ايه ممكن يكون العائد؟
المستشار : العائد هو القضاء على البلطجة لان البلطجة اصبحت شائعة دلوقتى واصبحت مستخدمة فى كل حاجة اصبحت مستخدمة يعنى انا عايز اقولك انه فى ناس انهاردة بتحصل على الحقوق بالبلطجة لانه اصبح اسرع فى الانتخابات
مفيد فوزى : هو ايه صورها ايه ؟
المستشار : صورها ان كل مرشح عنده مجموعه من البلطجية بيضربوا الناس المنافسين له او المعارضين له اللى مش هيدوا له صوتويرهبوا الاشخاص اللى داخلين انه اذا ما اداش هيحصل وهيحصل وبالتالى وسيلة فعالة جدا فى الانتخابات اللى فاتت فى مجلس الشعب بشكل ظاهر جدا وواضح وكانت واضحة لكل الناس انه فى مجموعة من الشباب اللى واقفين البلطجية انتهكوا اللجنة الانتخابية ومعاهم اسلحة معاهم بتاع فا اى انسان يقولك انا ما اخشش احسن
مفيد فوزى : تحسين الصورة ازاى؟
المستشار : اصدار قانون البلطجة مرة اخرى لابد ان المادة موجوده وجاهزوصالحة ولا يمكن يكون فى احسن من كده ابدا وهذه صيغه هى صيغة لنمط مشابهه تماما لمواد اللى موجوده مواد قانون .. لكن للاسف اقفلت حكاية اعضاء مجلس الشورى معرفش عمدا والا سهوا لدرجة ثم طعن على القانون فا فات على الحكاية دى سنين يعنى لابد ان يعاد اصدار هذه المواد مرة اخرى و
مفيد فوزى : اداة البلطجة تركع
المستشار : البلطجة لعدم وجود لوايح
نادية نصر الدين : طبعا البلطجة والفلوس اثرت ووصلت ناس لمجلس الشعب اللى فات ابتديت احس انه فى وعى انا ماكنتش باروح وما كنتش باشارك بدليل ماكنتش بافكر مش هروح لمكان اتعرض لاهانة لندخل علية ناس يعنى الواحد كبربما فيه الكفاية ما يعرضش نفسة لاى مهانة ولكن دى التغيير حتى مع الناس البسطاء شجعت وحسست الواحد انه ممكن يبقى له صوت الصوت ده ممكن يعنى
مفيد فوزى : امتى حصل ده علشان تقولى لى الكلام المتفائل ده انتى بتتمنى والا بتحلمى والا ايه ؟
نادية نصر الدين : بقيسه بنفسى
مفيد فوزى : ازاى؟
نادية نصر الدين : يعنى عمرى ما فكرت اروح انتخب ولكن السلبيات الكثيرة اللى مرت وحسينها وعرفناها مع مجلس الشعب اللى فات لازم حتى لو الصوت ده مش هيأثر بس ضميريا قبل ما اجى انصح بنتى او ابنى يروح لازم انا اروح already كنت سلبية وما باشاركش فكانت النتيجة الفعلية وانا علشان اقول له غير نفسك ابدا بنفسى
مفيد فوزى : هل انتى حبيتى تبقى قدوة لاولادك؟
نادية نصر الدين : بالضبط لان يوم ما اقول له روح انتخب لان صوتك مهم لان انت المستقبل
مفيد فوزى : هو انتى ايه قرفتى من اللى فات ؟
نادية نصر الدين : يعنى مشاركة بنسبة لان ما باعرضش نفسى لمهانة ولا اشوف بلطجية
مفيد فوزى : ماهو ماهو انسحابك اللى فات ادى ان فى اصوات اخرى دخلت
نادية نصر الدين : حسيت بتانيب ضمير طبعا واحساس الناس حوليا ان حتى لو صوتنا ما اثرش لازم نروح المره دى
مفيد فوزى : هل هو زي ما بتسموه فعلا المال السياسى؟
نادية نصر الدين : طبعا
مفيد فوزى : مال البلطجة ايه بالضبط ؟
نادية نصر الدين : طبعا
مفيد فوزى : طبعا
نادية نصر الدين : المية جنيه ممكن تعيش عيلة بره 5 أيام مش مهم الدولة مش مهم المهم اعيش انا واولادى 4 - 5 تيام الناس ابتدى لأ وخصوصا الشباب قيمة الخسائر واللى حصل فى مجلس الشعب نوعية النواب ونوعية الناس هى دى مصر لأ
مفيد فوزى : اذن انت قلتى لى عبارة مهمة جدا وواقف عندها ضميريا
نادية نصر الدين : شاركنا السلبية المطلقة طبعا صوتى مش هيأثر صوتك مش هيأثر
مفيد فوزى : مش صحيح
نادية نصر الدين : مش صحيح اغير ولادى اللى انا باعدهم هو ده المستقبل اللى انا ما اتمناش لهم ان مصر تبقى كده
مفيد فوزى : ماهو عفوا لما انسحب وحضرتك تنسحبى وهو ينسحب وهى تنسحب ما بنسيب ده لغيرنا
نادية نصر الدين : بالضبط بالضبط كان نتاج اللى فات اللى وصلنا له
مفيد فوزى : النواب او اللى بيرشحوا نفسهم بالملايين فى انفاق على اليفط وعلى السهرات ايه ده مع ان الدولة محددة 70 الف جنيه
نادية نصر الدين : اكيد هاخذهم اضعافا مضاعفة لو صرفت 10 جنية ، لازم تيجى لى اضعاف مضاعفة وكان بمنتهى الوضوح اتلمس من انتخابات المجلس اللى فات
مفيد فوزى : ازاى ؟
نادية نصر الدين : كل الجرائم كل المحاكمات وكل الكلام ده كله انا لما اتكلم عن قطاع مستشفى قبل ما ابدأ بنفسى واصرف على نفسى الفقير ونفقة الدولة والمهازل اللى سمعناها من الكبار والمسكين بيعانى
مفيد فوزى : انت واقفة عند مشوار العلاج ؟
نادية نصر الدين : يعنى انا باديك ك exampl
مفيد فوزى : كمثال
نادية نصر الدين : عايشة اللى انا عايشة فى ناس بيبقوا محتاجين نفقة الدولة بيقعدوا بالشهور والحالات بتموت قبل ما يوصلوا الى نفقة الدولة
مفيد فوزى : فى الوقت اللى فيه نواب
نادية نصر الدين : بالضبط تجميل ورفاهية مطلقة يعنى
مفيد فوزى : مش عارف اعلق اقول لك اية؟
نادية نصر الدين : no comment
مفيد فوزى : ايه اللى ممكن تكتبة لو حبيت تجتذب زملائك الشباب يروحوا ينتخبوا ؟
رامى ياسين : يعنى بالنسبة للشباب فى المجتمع المصرى فى انطباع ان الناس ان هما ما بيشاركوش
مفيد فوزى : طب ما هو فعلا كده انت عايز تفهمنى ان الشباب بيشارك؟
رامى ياسين : طب اناهقول لحضرتك على حاجة يعنى هبص على العالم الافتراضى مش العالم الوطنى يعنى فى الانترنت على موقع ال facebook يعنى تلاقى الشباب موجود تلاقية فى قضايا بيتكلم
مفيد فوزى : ماهو موجود فى عالم افتراضى
رامى ياسين : عالم
مفيد فوزى : يعنى مش موجود على العالم الواقعى يعنى هو ممكن يقول رأيه على الفيس بوك لانه مش موقع باسمه
رامى ياسين : هو موقع باسمه وبصوته
مفيد فوزى : كثيرة معلش لكن كثيرا ما يتقال انتخابات ايه دى اللى انتوا جايين تتكلموا عليها ولا هننتخب ولا هنروح ما انتوا عارفين المسالة من اولها الى اخرها مطبوخة وبعدين تدور تشوف اسمه ما تعرفش ده الفيس بوك لانه التعبير مقفول على الانترنت ولا احد يصادر هذا
رامى ياسين : بالتالى هيبقى فى مشكلة عايزين نجيبهم بقى من العالم الافتراضى ده
مفيد فوزى : الى العالم الواقعى؟
رامى ياسين : الى العالم الواقعى اللى موجود
مفيد فوزى : ازاى يارامى؟
رامى ياسين : هقول لحضرتك احنا دلوقتى فى عندنا قانون فى مصر بيغرم المواطن اللى ما بيروحش ينتخب هل القانون
مفيد فوزى : ما افتكرش
رامى ياسين : ما احنا بنفرض الانضباط فى المرور والحزام وبنفرض الانضباط فى حاجات كثير عن طريق القانون طب ما نفرض عن طريق المجتمع نفرض على الشباب ان هو يشارك وان هو يتحرك وان هو يختار وان هو يختار مستقبل بلد ده مجلس شعب يعنى احنا كشباب يعنى هتكلم كاشاب بجانب ان انا صحفى والشباب بيرجع بعد كده يقول اية ما اصل الحكومة عملت القانون الفلانى والحكومة عملت القانون الفلانى
مفيد فوزى : يعنى انت قصدك التغريم واستخدام القانون ده؟ يعنى يخلى الشباب يذهب لصناديق الانتخاب
رامى ياسين : اكيد هو احد الاساليب بجانب الدعاية وان احنا نحفزهم
مفيد فوزى : انت عارف فى ايه يا رامى؟ المشكلة ان مفيهاش العنصر الداخلى يعنى العنصر الداخلى زى ايه بالضبط زى لما انت تفرض عليا اذا ما دفعتش الغرامة انا مش هعمل لك الحكاية دى ممكن اعند
رامى ياسين : ده الهدف من القانون لأ مفيش عند ده الهدف نخلى المجتمع المصرى مشارك عايزين الناس تروح للصناديق عايزين الناس تختار عايزين الناس هى اللى تحط النواب
مفيد فوزى : سؤال : كام % بالتغريم هيروح صناديق الانتخاب؟
رامى ياسين : احنا هنقول بنسبة 10% يعنى انجاز وبعدين حضرتك حاجة ثانية يعنى الناس فى انتخابات الشورى اللى فات حتلاقى وزارة الاعلام مشكورة جت قبل الحملة الانتخابية بتاعت الشورى ابتدت تعمل اعلانات جابت فيها مدربين الكورة وجابت فيها لاعيبة الكورة وجابت الشباب وقالت شارك وانتخب طب الفترة دى كانت امتى يا افندم كانت قبل الانتخابات بعشر ايام ولغاية فترة الانتخابات
مفيد فوزى : يعنى انت عايز تفهمنى لما يطلع زى ما قلت فى البرنامج ده ابو تريكة ابو تريكة قال احنا يا جماعة زى ما بنلعب TEMواحد وبنكسب فى الانتخابات لازم نلعب مع بعض TEM واحد ونكسب فى الانتخابات هل ده مفيد ؟
رامى ياسين : استاذ مفيد هو مش الاعلام هدفة واحد اساسياته ان هو بيشكل راى عام جوا المجتمع انا باتكلم على وجدان الشخص نفسة
رامى ياسين : وجدان الشخص نفسه
مفيد فوزى : وعيه الداخلى
رامى ياسين : انا هفهمه حملات تسويق لمنتجات مش عارفين احنا كاعلام مصر ان احنا نعمل حملة تسويق
مفيد فوزى : للانتخابات فى مصر هل تحتاج الى حملة تسويقية اعلانية؟
رامى ياسين : حملة تسويقية اعلانية الدولة تقوم بيها اذا كانت الدولة شايفة ان مشاركة المواطنين وفى الانتخابات هو هدف
مفيد فوزى : هو هدف نعم نعم
رامى ياسين : لو الدولة شايفاه ان هو هدف وان حنا نقدر نوصل الى الكلام ده يبقى من حق الدولة ان هى تصرف عليه علشان المجتمع يتنور يتنور بوسائل اعلانية يتنور ان هو يفهم يعنى ايه دين ويعنى ايه سياسة وان ما ينفعش خلط الدين بالسياسة ان الشباب بتعنا يفهم ان الجامعة دى مكان للعلم وان الشباب يقعد انت عارف حضرتك يقعد جماعات تبقى موجوده داخل الجامعة تستغل الدين وتستغل السياسة وتعطل العملية التعليمية وتبدأ فى المظاهرات وناخذ الدنيا انتخابات يعنى حضرتك فى اسكندرية تحديدا لما حضرتك تبص فى جامعة الاسكندرية فى اتجاهات وتيارات سياسية بتحول وتلعب فى الجامعة على اعتبار ان فى انتخابات طب ما الفئة الصامته اللى جوا من الشباب دا اللى احنا كنا بنتكلم عليها موجودة على الفيس بوك وموجودة ومش موجودة على
مفيد فوزى : انت بتعتبرها فئة صامتة؟
رامى ياسين : بالتاكيد فئة صامتة
مفيد فوزى : كل افكارها وتعبيرها على الفيس بوك؟
رامى ياسين : بالتاكيد طبعا لو الفئة دى وصل لها التغيير ووصل لها الادراك ليعنى ايه انتخابات ويعنى ايه صندوف ويعنى اية تختار ازاى حزب سياسى اوتختار ازاى مرشح او تختار ان هى ايه تفهم فيه السياسة حاجة والدين حاجة يعنى هنا فى ناس عندنا بتاخذ الدين وتدخلة جوا السياسه احنا كمجتمع بنميل الى التدين فا بالتالى لما حد يجى يتكلم معايا ويتحدث معايا من منطلق الدين انا بالتالى هميل الية ده شئ اساسى
مفيد فوزى : هل بينجح هذا؟
رامى ياسين : اكيد بينجح والدليل الانتخابات بتاعت 2005.
مفيد فوزى : مين اللى انت ممكن ما تنتخبوش يعنى لو رحت صناديق الانتخاب ما تديش له صوتك او منين
تكون جبت معلومات عنه يعنى انت ايه مجرد ان اسمة مش هتنتخبة يعنى انت امتى ارادتك هتشتغل يعنى انت؟
محمد فاروق: اولا انا بالنسبة انا معرفوش على المستوى الشخصى ولكن انا معنديش بطاقة انتخابية ولا بافكر اعمل بطاقة انتخابية
مفيد فوزى : معندكش بطاقة انتخابية؟
محمد فاروق: ولا بافكر اعمل بطاقة انتخابية
مفيد فوزى : معنكش بطاقة انتخابية انت عندك كام سنة؟
محمد فاروق: عندى 33 سنة
مفيد فوزى : ليه ما معندكش بطاقة انتخابية؟
محمد فاروق: من اللى باشوفه واللى باقرأه فى الجرائد واللى باسمعه من القتلى الجرحى انا باحس انه مبنى للبلطجة يعنى وبعدين باشوف مجلس الشعب باحس انه انه بينزل الشارع فى اثناء الانتخابات ولكن بعد الانتخابات ما بتخلص وبينجح هو كده كده ALREADYبينجح الله اعلم اذا كان بينجح ازاى بس يعنى بعد كده ما بنشوفوش خالص بنلاقى حاجات فى الشارع متكسرة ومتبهدلة ما بنشوفوش خالص هو اثناء الانتخابات بس حضرتك بنلاقية متواجد ووسط الناس ويسلم ونشوفة وبعد كده بيختفى تماما
مفيد فوزى : اذا انت رفضك انك تطلع بطاقة انتخابية من اللى بتشوفه
محمد فاروق: من اللى بشوفه بالضبط
مفيد فوزى : نوعية النواب فى مجلس الشعب ما بيعجبوكش؟
محمد فاروق: خالص حتى لما باشوف فى التليفزيون فى المرافعة والضرب اللى بيحصل والشتايم كلام ما يتقلش فى التليفزيون حتى ولا فى الشارع نواب محترمة وبتتقال وبتتسمع ما كده ما باقدرش ادى صوتى لمين وانا ماعرفوش اصلا
مفيد فوزى : لو فى ست محترمة فى الدائرة اللى انت فيها تديها صوتك؟
محمد فاروق: اه
مفيد فوزى : ليه؟
محمد فاروق: لانها هتعود علينا
مفيد فوزى : والا انت كراجل تدى صوتك لراجل؟
محمد فاروق: لأ مش شرط بالخدمة تحس ان هو هيؤدى واجب كويس هيفيد بلدنا الحى اللى هو فيه
مفيد فوزى : اللى هو مين ؟
محمد فاروق: سواء كان راجل او ست يعنى
مفيد فوزى : اه بتقرر ده ازاى بتعرف ده ازاى؟
محمد فاروق: من عملة باشوفه هل هو متواجد هل هو موجود والا لإ
مفيد فوزى : هل فى نواب بيبقوا عايشين فى مصر وبعدين يجوا فجأة للحتت بتعتهم ويلبسوا جلاليب علشان خاطر يبان ان هو مواطن من نفس البلد
محمد فاروق: بشوفه اه
مفيد فوزى : وانت طول عمرك كنت بتشوفه؟
محمد فاروق: اه اثناء الانتخابات بيتواجد لكن غير كده مابيبقاش موجود خالص
مفيد فوزى : لا ن هو تمثيل عن الشعب؟
محمد فاروق: تمثيل او هو بياخذها من ناحية الوجاهة يعنى
مفيد فوزى : يعنى ايه الوجاهة ؟
محمد فاروق: بياخد مثلا اومصالح شخصية مفيش مصلحة عامة بيدور عليها يعنى
مفيد فوزى : عرض عليك حد فلوس لانك محتاج الفلوس دى فى البيت عشان صوتك هتثور وتقوله ابعد عنى لأ اوعى تقرب منى كلام كده
محمد السيد : هو حضرتك حصل
مفيد فوزى : حصل
محمد السيد : اه
مفيد فوزى : احكى لى حصل ازاى؟
محمد السيد : لأ مش حصل حد عرض عليا لأ انا باروح فى محل الانتخابات بلاقى الراجل موقف ناس من عنده وبيدى لكل واحد من اللى هيرشحوه مبلغ اكتشفت ان صوتى رخيص |"جدا جدا جدا واحد ثانى
مفيد فوزى : يعنى قصد المبلغ اللى عرضه قليل علشان كده بتقول رخيص انت بتقول رخيص قوى صوتى
محمد السيد : واحد بيشتريه وواحد ثانى بيعرض كيسين سكر زجاجة زيت علشان الواحد ينتخب
مفيد فوزى : فيها سكر وزيت؟
محمد السيد : اه بتحصل مهازل صوت رخيص يعنى عشان كيسين سكر وزجاجة زيت ومتوسط الدخل بتاعى ضعيف جدا يعنى مش هقولك انا موطف بسيط فى امس الحاجة للحاجات دى بس ما بيحصلش طبعا
مفيد فوزى : هل هما مدركين انك فى امس الحاجة للحاجات دى ؟
محمد السيد : اه مدركين طبعا ماهما بيعملوا ده لدرجة ان فى ناس بتروح لكذا واحد علشان تنتخب بس واحد واثنين وثلاثة تاخد من ده كيسين سكر ومن ده زجاجة زيت
مفيد فوزى : وبعدين لما تخش الاوضة فى الصندوق ؟
محمد السيد : لأ مافى مناطق مختلفة
مفيد فوزى : فى مناطق مختلفة؟
محمد السيد : اه
مفيد فوزى : الله اذن ده يعنى اقتصاد من الانتخابات
محمد السيد : اه
مفيد فوزى : ماهو بيستفيد من هنا ومن هنا ومن هنا
محمد السيد : الناس غلابة يا استاذ مفيد هتعمل ايه
مفيد فوزى : الناس غلابة !!!
محمد السيد : اه غلابة جدا يعنى انا مثلا لما اروح لواحد عنده 7 -8 اولاد ويدوا له 50 جنى وهو فى امس الحاجة الى 10 جنى مش 50 جنى ادى له صوتى والا لأ
مفيد فوزى : ليه دائما يقولوا لك ان الانتخابات مضمونة ولا فيش داعى تروح تنتخب .. ليه المعنى ده سائد كده عند الناس
مواطن: انا بقالى مثلا 35 سنة 20 سنه نعرف يعنى ايه عملية سياسية او عملية انتخابية واخد بالك فى ال20 سنة اللى فاتت مامرتش على تجربة كانت حقيقة الا لما اروح وادى صوتى واحس ان صوتى ده هيغير فى الموضوع ده حاجة معينة مع الرغم ان فى الراجل المنتخب بيبقى له شعبية كبيرة جدا واخد بالك ويبقى الناس حباه ومن جواها نفسها تيجى وحسة ان هو هيدافع عن حقها وبيدافع عن المطالب بتعتهم وبتيجى
تظهر نتيجة الانتخابات تيجى صورة غير اللى الناس كلها شفتها بيحصل لهم عملية احباط وياس
مفيد فوزى : هو انت بتنتخب الشخص اللى بيخدم الدائرة والا اللى عنده فكر ؟ بصراحة
مواطن: انا بالنسة لى كا وجهة نظر عندى انا
مفيد فوزى: اللى هو ايه ؟
مواطن: انا فى اختيارى
مفيد فوزى : اه
مواطن: انه يكون انسان عنده فكر
مفيد فوزى : ما انا باسألك؟
مواطن: بالنسبة لى
مفيد فوزى : اهم من اللى بيخدم الدايرة
مواطن: بالنسبة لى اللى عنده فكر ممكن يتسبب يقوم بحالة متقدم للبلد ينهضوا
مفيد فوزى : للبلد ككل مش للدايرة
مواطن: للبلد ككل مش للدايرة اه
مفيد فوزى : بيقولوا لى لما الواحد يكون مرشح نفسة ويجى لك يقولك لازم تعرف ربنا وتدينا صوتك تقول له ايه؟
مواطن: والله اعرفه الاول اسم الراجل ده واسمع البرنامج بتاعه ولو اقتنعت به اهلا وسهلا
مفيد فوزى : تسمع البرنامج بتاعة يعنى تقول له ادينى برنامج هل ده موجود فى مصر؟
مواطن: لأ انا شايف كله كلام واللى معاه فلوس هو اللى بيكسب وهو اللى بياخد وهو اللى كسبان لكن كنظام مفيش
مفيد فوزى : اللى معاه فلوس هو اللى بيكسب؟
مواطن: اه يعنى ده بيعمل عليا 200 جنى 150 جنى وهات صوتك
مفيد فوزى : تروح لبتاع ال 200 جنى
مواطن: لأ ولا ده ولا ده انا احتفظ بصوتى بقى عشان ما يكون عندى ادام ربنا
مفيد فوزى : تحتفظ به؟
مواطن: احتفط به
مفيد فوزى : ولا ده ولا ده هو بيوصل لغاية 200 جنى
مواطن: اخر انتخابات كان 200 جنى؟
مفيد فوزى : دلوقتى تبقى كام
مواطن: لأ لسه ما وصلتنيش الاسعار
مفيد فوزى : تفتكر البورصة تبقى كام؟
مواطن: حاليا توصل بتاع 300
مفيد فوزى : 300 جنى بيقطع الفلوس والا ايه؟ عايز اعرف بيعملها ازاى بيقولوا ال100 جنية بيقطعها
مواطن: لأ لأ هو المندوب بتاعة بيبقى جوا اللجنة لما بتخش تنتخب بيدى لك
مفيد فوزى : ويعرف منين انه انتخب الشخص نفسه؟ مايصح واحد ياخذ الفلوس وينتخب المنافس
مواطن: حصلت السنة اللى فاتت
مفيد فوزى : بتسمى ده ايه؟ عند والا غيظ والا ايه؟
مواطن: يعنى كل ده على بعض مفيش حاجة محدده يعنى
مفيد فوزى : انت لو فى ست مرشحة نفسها تنتخبها والا تنتخب الراجل اكثر؟
مواطن: والله الكويس هنتخب الكويس
مفيد فوزى : بتقدر تخبط عليها علشان خاطر تعمل لك مشكلة والا حاجة افرض عندك مشكلة فى القسم؟
مواطن: يعنى كصفة شخصية مش مهم المهم العامة اللى يخدم الكل الخاصة دى عملة زى المحسوبية انا محبهاش المحسوبية
مفيد فوزى : اه انت بتشتغل ايه ؟
مواطن: فنى مساحة
مفيد فوزى : انتي مراته ومخلفة له مخلفة له اه يا سلام ده عمره اد ايه
مواطنة: 20 يوم
مفيد فوزى: ياروحى 20 يوم طب ما تحطوا له برنيطه والا اى حاجة للشمس والا اى حاجة اسمة ايه
مواطنة: كريم
مفيد فوزى : ياترى انت يا ابنى فى المستقبل هتلاقى ايه ؟
مواطنة: عادى بقى
مفيد فوزى : هيكون فى مين واية ولا حد دريان ولا انت عارف ياروحى عليك
مواطنة: هو فى ملكوت تانى
مفيد فوزى : تفتكر ده بيحلم
مواطنة: اكيد
مفيد فوزى : دماغه فى ايه فى الدماغ دى فيه ايه نفسى اعرف؟
مواطن: فى تفاؤل
مفيد فوزى : تفاؤل عينيه انا شايفها واخد ايه منك هه
مواطنة: الله اعلم
مفيد فوزى : واخد ايه من ابوه
مواطن: الدم
مفيد فوزى : الدم اه هسيبك يا ابنى انا باتكلم عن الانتخابات ولا انت دريان ولا انت عارف انا باتكلم فى ايه
مواطنة: يمكن فى يوم من الايام تسجل معاه تلاقية مرشح نفسة
مفيد فوزى : تفتكرى
مواطنة: ممكن مش بعيد على ربنا
مفيد فوزى : اه مش بعيد على ربنا