اتجاهات

الاربعاء 29/6/2011
رشا مجدي: مشاهدينا الكرام مساء الخير وبنرحب بكم في حلقة جديدة من إتجاهات خلوني في بداية الحلقة أسرد بعض التاريخ علشان نفتكر نقدر نبني عليه في سبتمبر عام 2008 تقريبا من 3 سنين فاتوا كان النظام السابق في أشد حالاته وعنفوانه وقوته وإستبداده ضيفنا كتب خطاب الي الرئيس السابق طالب فيه الرئيس بتشكيل جمعيه تأسيسيه لوضع دستور جديد للبلاد .. شعر إن لازم يكون فيه دستور جديد للبلاد – تحدث بصراحة مطلقة عن مصر والأحوال التي وصلت بها مصر والتي تؤدي الي هوه سحيقة ومصير مفجع ان بينتظرهذا البلد في ظل نظام وما كان يمشي عليه .. هاجم التوريث بشدة إنتقد فيها النجم الأصغر جمال مبارك ووصفه بإنه بدون شعبيه – ما بتمتعش بأي قدر ولو ضئيل من القبول لدي الشارع المصري وإنه رجل لا تحبه مصرولا يريده الشعب .. لسنوات طويلة ظل معارض وبعيد عن السياسة وكان عنيد أيضاً كان مغرم بشدة للدخول في عش الدبابير حتي لما الناس عرفته كنائب لرئيس الوزراء ومنذ ذلك الحين وهو ما فيش جرنال حتفتحة إلا تلاقي خبرعنه ما فيش برنامج إلا حتلاقي موضوع عنه دا ليه لإنه عنده تصريحات مثيره للجدل أحياناً أو بسبب قرارات هو شايف إنه لازم يتخذها أو إجتماعات يجب أن يعقدها .. شُنت عليه حملات من كافة الإتجاهات لا حقته الشائعات عدة مرات البعض بيشير إن هو في تناقدات فكرية والكثير يتحدث عن إن هو بيحاول أو عنده القدرة إنه يقفذ فوق هذه التناقدات – الكل يجمع علي نجاحه في كل الأزمات اللي بيواجهها وتحويلها علي الأقل لحافز له للمضي الي الأمام .. يحطئ من يظن أن ضيفنا في حلقة الليله قد ظهر فجأةً علي سطح الحياه السياسيه في مصر – يمكن فيه أجيال جديدة ما تعرفهوش يمكن أحب أقول إن هو لاعب هام في كواليس السياسة المصرية من 40 سنة فاتت هو أستاذ قانون دستوري كنا قبل الثورة بنقول عليه الفقيه الدستوري كان في أي برنامج يتقال الفقيه الدستوري – وزيراً للتنمية الادارية في حكومة الدكتور عبد العزيز حجازي عام 68
أ . د/ يحيي الجمل :متهيأ لي عام 75
رشا مجدي: 75 - ساهم في التعديلات الخاصه بالدستور المصري في سبعينيات القرن الماضي مؤسس لحركة التجمع الوطني للتحول الديمقراطي – وهو إتكلم عرفته هو مين – الأستاذ الدكتور يحيي الجمل نائب رئيس الوزراء في حديث لا ينقصه الصراحه حول مصر وكافة القضايا المطروحه .. د. يحيي حمد الله علي االسلامة
أ . د/ يحيي الجمل :أنا بأشكرك شكرا جزيلا إنك أتحتي لي هذه الفرصة وبأشكر شكر جزيل علي تقديمك لي
رشا مجدي: أقل واجب يا دكتور – أقل واجب حضرتك أستاذنا كلنا ما حدش يقدر ينقص شيئ من هذا .. أنا بأقول لحضرتك حمد الله علي السلامة طبعا حضرتك شايف قدام ماسبيرو عامل إزَّاي وحنجيله ده في حتة كده لكن كمان حمد الله علي السلامة يمكن كلنا شاهدنا اللي بيقرأ قرأ في المصري اليوم ما حدث لك في ندوة نادي الإتحاد السكندري مؤخراً إيه اللي حصل يا دكتور ؟
أ . د/ يحيي الجمل :اللي حصل أنا دُعِيت أقول محاضرة في إسكندرية في نادي من نوادي اسكندرية الكبيرة وإستجبت للدعوه وهي كانت يوم جمعه رحت قبل ما أروح قالوا لي لأ دا فيه تجمهرعلي الباب حندخل من باب جانبي – قلت حاضروماله ندخل من باب جانبي ما يجراش حاجة ما إحنا ضالين علي الحكاية ديه في مجلس الوزراء كل يوم ندخل من باب جانبي
رشا مجدي:والنهارده دخلت من باب جانبي ؟
أ . د/ يحيي الجمل : والنهارده دخلت عندكوا من باب جانبي فقلت لهم حاضر ورحت كان فيه حشد مش بطَّال أبداً وبعدين أنا بأتكل فيه مجموعة في حدود 20 – 30 واحد بالكتير في آخر القاعة قاعدين يزعقوا ولا أحد يعرف هم بيقولوا إيه إنما بيشاوروا بإيديهم ويتحركوا وبيزعقوا
رشا مجدي: داخل القاعة ؟
أ . د/ يحيي الجمل : داخل القاعة بس في الآخر من ورا أنا إللي بهمته بعد كده أو أثناء كده إنه يبدوا رئيس مجلس إدارة النادي ان له خصم في الإنتخابات وهذا الخصم أو بعض الناس حبوا إنه يفشلوا اللقاء وما يدوش كردت لعفت السادات وعفت إبن أخو الرئيس السادات وأنا بأعتبر عفت ومحمد " عفت وأنور حتي طلعت كمان بأعتبرهم ولادي ومع الإختلاف بينهم وأنا عفت لما كلمين طبعا قلت له حاضر يا عفت أجيلك وحتي برضع إتكلمنا في بعض أمورهم الخاصه عفت قال عايزينك تقعد معانا إحنا الثلاثه ونتكلم في بعض الأمور يعني وقلت له حاضر ولما تيجي مرات عمكوا من بره
رشا مجدي: السيدة جيهان السادان
أ . د/ يحيي الجمل :السيدة جيهان السادات فالمهم بأقول لحضرتك إنه يبدو إن فيه حد إتضايك إزَّاي عفت ينجح في انه يدعوني أول المحاضره بحشد مجموعه من الناس كانت بتقول إيه "الشهداء .. الشهداء" تعويضات الشهداء .. يطب أنا رايح أقول محاضرةهل ده مكانه تعويضات الشهداء ومع ذلك قلت لهم إيه بقى أغلي ما في مصر هو دم شهدائها ولابد وأن يعوض شهدائها لكن المشكلة أنه الناس لا تجيد فن الحوار ولا تجيد فن الإستماع مش كل حاجة الناس
رشا مجدي: يعني هم ما كنوش تيارات يا دكتور يحيي
أ . د/ يحيي الجمل :الله أعلم
رشا مجدي: لإن دا حيخليني
أ . د/ يحيي الجمل :الكلام اللي قال عليه الإخوان المسلمين لأ
رشا مجدي: ما هو ده اللي حأقوله لإن إحنا إعتدنا اليومين اللي فاتوا بنجد عليك هجوم شديد من جانب الإخوان المسلمين ومن السلفيين من رفع قضايا بتتهمك بالتعرض للإسلام ومجادلات ساخنة بين حضرتك وبينهم لا تنقطع
أ . د/ يحيي الجمل:عايزأستأذنك ياباشا في حاجة خليني أفََّّرّق بين الإخوان المسلمين والتيارات السلفيه – الإخوان المسلمين ما مالاجمونيش أبداً الإخوان المسلمين أنا رحت زرتهم إمبارح زي ما بأزور حزب جديد رايح أهنيهم يعني ما أقدرش أقول لك كان قد إيه إستقبال حار وكان فيه حفاوة وقابلوني كل قيادات الحزب وصمم الأخ علي إنه ينزل معايا لغاية باب العربية تحت وكتر ألف خيره الدكتور عصام العريان نائب رئيس الحزب صديقي وتلميذي لإنه عصام بعد ما خلص طب درس عندنا في الكليه ودرست له في سنة أولي وفي ثالثه وأيضا تعاثرنا في مجلس الشعب في وقت من الأوقات فيعين الحمد الله أنا بأحمد ربنا علي شيئ ان أنا لم أكسب عداء أحد في هذه البلد ولا أحب أن أعادي أحد وأتصور إن العداء ده مسألة غريبة الشكل
رشا مجدي: طيب الدوشة عليك كتير ليه يا د. يحيي ؟
أ . د/ يحيي الجمل :أنا حأقول لك جايه منين – الدوشة جاية من مجموعة السلفيين لإن أحيانا كنت بأنفعل ما عنتش بأنفعل خلاص إنما مرة قلت العقول العفنه وأنا كلمة العقول العفنه ديه الحقيقة أنا واخدها من أستاذ لنا في الكلية زمان أستاذ عظيم عظيم عظيم إسمه الشيخ عبد الوهاب خلاف رحمة الله عليه – الشيخ عبد الوهاب خلاّف واحد بيسأله سؤال " عشان تشوفي يعني" واحد بيسأل سؤال من الطلبة فالشيخ خلاف كان رده الآتي مين يا ولاد كان يقول لنا يا ولاد وأظن كنا في الدبلوم مين يا ولاد زمان كان بيسلِّف مين وعلشان إيه والنهارده مين بيسلف مين وعلشان إيه - كان زمان يا ولاد الغني بيسلم الفقير عشان يربي ولاده عشان يكسيهم يوكلهم واللي ياخد فايده في الحاله ديه هو الربا المحرم شرعا وصاحبه في النار الي يوم يبعثون لكن النهارده يا ولاد مين بيسلم مين الفقير بيسلف الغني فإحنا بصينا كده إستعجبنا من الكلمه يا ولاد النهارده الفقير بيسلم الغني فإحنا بصينا كده إزَّاي – قال أنا أقول لكم إزَّاي عبد الوهاب خلاف ندي بنفسه ووديع فرج وحامد ذكي والقللي بيحطوا ماهيتهم في البنك الأهلي والبنك الأهلي فيه واحد إسمه عبود باشا في ذلك الوقت " الكلام ده كان سنة 50 – 51" طالب 6 مليون جنيه كان في ذلك الوقت مبلغ رهيب بيساوي النهارده مثلا 60 مليار – طالب 6 مليون جنيه عشان يعمل بهم مصنع أسمنت - لما البنك الأهلي ياولاد ياخد منه فلوس تشغيل ديه إسمها فايده أعوذ بالله من العقول العفنه فأنا أخذتها منه وقلتها ما هي فيه عقول مستنيره وعقول عفنه
رشا مجدي: حضرتك إتكلمت عليه دلوقت وقلت إن هو من تلاميذي وبتحبه والدكتور عصام العريان نائب رئيس حزب الحرية والعدالة هو معانا علي التليفون
أ . د/ يحيي الجمل :يا سلام يا محربا به
رشا مجدي: د. عصام مساء الخير
أ . د/ يحيي الجمل :وعصام حبيب يعني مش صديق بس
د.عصام العريان : مساء النور يا أستاذة رشا
رشا مجدي: أهلا بك يا فندم .. كان لسة بنتحدث مع الدكتور يحيى الجمل وقال أنا الهجوم اللي عليَّ مش من الإخوان المسلمين دا أنا الدكتور عصام عريان هو مش بس
أ . د/ يحيي الجمل : أخ وحبيب وصديق وزميل
د.عصام العريان :بسم الله الرحمن الرحيم يسعدني إن الدكتور يحيي الجمل يصفني بهذه الأوصاف وأنا تلميذة تتلمذت علي يدية في الحياة وفي كلية الحقوق .. أنا درست في الحقوق علي كبر بسبب كلمة من الدكتور رفعت المحجوب الله يرحمة ويحسن إليه لما قال لي وأنا في مجلس الشعب كنت أصغر نائب بأقول له دستور يا ريس واللائحة المفروض يوقف المناقشة ويعطي لي الكلمة قال لي إنت مالك ومال الدستور يا عصام كان بيعاملني كإبنه قلت له يا دكتور أنا نائب قبل ما أبقي طبيب أو قانون وبعدم مدام حضرتك قلت كده أنا حأروح أنتسب بكره علي طول لكلية الحقوق ومن هنا تعرفت علي الدكتور يحيي في المجلس لإنه كان نائب زيي لذلك هو بيعتبرني صديق وأخ وزميل وتعرفت عليه في كلية الحقوق لما درست قانون عام إداري ودستوري ودولي فالدكتور يحيي بالنسبه لي رمز كبير قد نختلف وقد نتفق ولكن يبقي الود والإختلاف في الرأي لا يفسد للود قضية كما علمنا هو وشرفنا أمس في مقر حزب الحرية والعدالة بزيارة كريمة لي مع الأخ الدكتور علي السلمي
رشا مجدي: كان لسة بيقول لنا عليها .. نعم طيب إنت حتخليني كده أدخل مع الدكتور يحيي الجمل في موضوع برضه أنا عايزة أقول إنها بقى جدل دائر في المجتمع بشكل كبير – الدستور أولآ – أنت يا دكتور يحيي مع الدستورأولا وبعدين ترجع تقول والا الإنتخابات – يعني انا عايزة أقول الشعب عايز الخبز والديمقراطية بأي شكل
أ . د/ يحيي الجمل :هذا كلامك صحيح الشعب عايز الخبز والديمراطية وحقه في هذا أمر لا يجادل فيه أحد حق الشعب في الخبر حق الشعب في حياه كريمه وفي الديمقراطية والتي هي أيضا جزء من الحياه الكريمه ما فيهاش – الجدل اللي داير أنا بأقول دا جدل يعود علي حياه مش جدل عقيم ولا جدل منبوذ أبداً- المجتمع المصري النهارده يموج بحياة سياسية غير مسبوقة
رشا مجدي:يعني ده صحي!
أ . د/ يحيي الجمل :جدا بس إنتظري حأقول لك صحي إزَّاي – المجتمع المصري – الشعب المصري لما راح الإستفتاء اللي حصل في 9 مارس الملايين اللي راحت ديه
د.عصام العريان :في 19 مارس
أ . د/ يحيي الجمل :في 19 مارس مش راحت بس عشان تقول نعم والا تقول لأ دا راحت لأنها عرفت إن صوتها لأول مرة حيبقي محل إحترام وإن الصوت اللي حينحط في الصندوق هو اللي حيطلع
رشا مجدي:لأ طيب أنا حأقولك علي حاجة راحت ليه – أنا أقولك راحت ليه إنها راحت لأول مرة تمارس الديمقراطية بجد فيه ناس ما كنش عمرةا إنتخبت في حياتها
أ . د/ يحيي الجمل :ما أنا بأقول لك ليه لأنه عارف إن صوته اللي حيقولة هو اللي حيطلع لم يكن هناك إحترام لا لإرادة الناس ولا سيادة القانون وهذا الكلام برضه أنا أحد الناس اللي قالوه في الفترة اللي فاتت أنا كتبت مقال بعنوان غياب إيرادة الناس وغياب سيادة القانون كنت بأوصف الإنتخابات اللي حصلت إخيراً
رشا مجدي: 2010
أ . د/ يحيي الجمل : اللي هي كانت أحد الأسباب لما حدث – فالشعب المصري الحراك اللي موجود ده حراك كويس جدا ويدل علي حيويه
رشا مجدي: بس إن مع الدستور أولا
أ . د/ يحيي الجمل : أنا حأقول لك أنا مع إيه
رشا مجدي: إنت معانا يا دكتور عصام
د.عصام العريان :أنا مع حضرتك بس الإستفتاء كان يوم 19
رشا مجدي: طيب بس إنت - إحنا دلوقت معانا طرفين – طرف د. يحيي الجمل بيقول أنا مع الدستور أولا وأنا عارفه موقفكوا مع الإنتخابات أولا
أ . د/ يحيي الجمل : إستني بس ما تقولنيش اللي أنا ما قلتهوش لسة
رشا مجدي: دا كان مانشيت الأهرام يا دكتور يحيي
أ . د/ يحيي الجمل : يا بنت الحلال طولي بالك عندنا في الفلاحين بيقول طولة البال كلها بركة وكمان يقول طولة البال تهد الجبال
رشا مجدي: وطولة البال تبلغ الأمل
أ . د/ يحيي الجمل : أمي اللي يرحمها كانت تقول طولة البال تهد الجبال فطولي بالك أنا بأقول إيه الذي يحكمها في هذه الفترة هو الإعلان الدستوري المكون من 62 ماده والإعلان الدستوري مواده متساوية كلها مع بعضها ما فيش مواد عليها ريش أو مواد ما عليهاش ريش يعني المواد اللي أستفتي عليها دخلت وبقة جزء من البيان الدستوري – هذا الإعلان الذي يحكمنا الآن والذي يمثل نوع من الشرعية الثورية وأكبره المجلس الأعلي للقوات المسلحة بما له من هذه الشرعية هذا الإعلان يحكمنا هذا الإعلان بيقول إنتخابات أولا في ظل هذا الإعلان الإنتخابات أولا لكن هناك رأي عام متصاعد بيقول لأ الدستور اولا .. فيه من الناحية التكنيكيه المحضه – وأنا هذا الحوار دار بيني وبين الإخوة الأصدقاء الأعزاء أمس وجري في جو جميل لما شرحت وجهة نظري – عندنا في القانون الدستوري حاجة إسمها السلطة المنشئة والسلطات المنشأة هي الشعب لكن في كل الدنيا نقول السلطة المنشئة هي اللتي تضع الدستور وتحدد المؤسسات الأخري السلطة المنشئه الأصل أن تكون قبل السلطات المنشأة – السلطات المنشأة اللي هي السلطة التنفيذية والتشريعية والقضائيه لكن إحنا النهارده في مواجهة إعلان دستوري هو الذي يحكمنا وبيقول كده لابد أولاً ضغط الشعب يتصاعد عشان يقنع المجلس الأعلي للقوات المسلحة إنه يعدِّل النص لكن إذا لم يُعدّل النص لا إلتفاف حوله وتتم الإنتخابات أولا .. وبعدين عايزة أقولك لك علي حاجة ريحتني في الفترة الاخيرة وأسأل الله أن تتم وأن يحرص عليها ما يشبه الإجماع – اولا الإجماع ما فيش إجماع علي حاجة أبداً إنما ما يشبه الإجماع - حصل نوع من التوافق بين عديد من الأحزاب منهم الحرية والعدالة والوفد ومنهم أحزاب أخري كثيره وحتي مستقلين عن الجمعيه الوطنيه للتغيير لإن أنا كنت بأشرف إن أنا كنت عضو في أحد مؤسسيها وكان معانا الدكتور عصام عريان وكان معانا الدكتور محمد البلتاجي من الإخوان المسلمين وعديدين من كل التيارات المجتمع السياسي الفاعل آن ذاك يعني فيه توجه عام النهارده إنه ينزلوا الإنتخابات كمجموعة ويألفوا حكومة وحده وطنيه والأهم من ده كله إنهم يلتزموا بمجموعة مبادئ حاكمه يتوفقوا عليها ولما ييجي يوضع الدستور تلتزم الجمعيه التأسيسية اللي حتوضع الدستور بهذه المبادئ الحاكمة اللي هي محل إتفاق ومحل إجماع الكل أنه دوله ديمقراطية سيادة القانون – حرية تكوين أحزاب – تداول السلطة – يعني مجموعة مبادئ حاكمة توشك أن توجد في كل دساتير العالم يعني ما فيش دستور في العالم ما ينصش علي سيادة القانون ما ينصش علس إستقلال
رشا مجدي: لأ بس فيع حاجات تانية إحنا حنيجي عليها يعني – إنت حضرتك مع الإنتخابات أولا
أ . د/ يحيي الجمل : لأ أنا ما قلتش كده أنا قلت مع إعمال حكم الإعلان الدستوري طالما هو نافذ – أنا راجل بتاع قانون – طالما الإعلان الدستوري نافذ ومطبق يبقي لازم نعمله طالما هو نافذ ويطبق والواضح إنه ما فيش نية لتعديلة فيبقي إذن حنعمل إنتخابات أولا – أنا بأقول لك المخرج اللي حصل دا مخرج جميل جداً وريحني وأنا كتبت عنه الإسبوع اللي فات في مصر اليوم وحأضيف لك شيئ جديد أنا بأقول أن التوافق بين القوي السياسية الحية وفي مقدمتها الإخوان المسلمين بإعتبارهم أكثر قوي تنظيما وأكثر قوي تفاعلا في الشارع وديه حقيقة ما ينكرهاش حد هذا التوافق علي جملة مبادئ حاكمة يعني لما آجي أقول حرية تكوين الأحزاب تداول السلطة – رئيس الجمهورية لابد وأن تكون سلطاتة محددة – البرلمان يراقب ويسقط الوزارة
رشا مجدي: إحنا لسة حنتكلم علي برلماني ورئاسي بس لما نشوف الدكتور عصام إنت لسة معانا ؟
د.عصام العريان : أنا معاكي يا أستاذة رشا
رشا مجدي: إنت موافق علي الكلام ده معانا يعني ؟ علي هذا التوافق
د.عصام العريان :أنا بأقول لحضرتك إن السياسة يجب أن يعلم الناس أن هناك طلب علي السياسة كما قال أستاذنا الآن عالي جدا في مجتمعنا والناس الآن تتعلم الديمقراطية كما أن تتعلم من الخطأ والصواب وأن تصحح أخطائها وميزة الديمقراطية أنها قادرة علي تصحيح أي ممارسات عبر الآليات والوسائل الديمقراطية انا إمبارح سعدنا بزيارة الدكتور يحيي وكما قال –هو قال إن إحنا لابد أن نحترم الأعلان الدستوري لابد أن نحترم إيرادة 18 مليون ذهبوا الي الإستفتاء منهم من قال لا ومنهم من قال نعم لكنهم جميعا يعلموا أنهم وهم ذاهبون للإستفتاء سيقبلون بالنتيجة ولم يكن أحد يعلم أول مرة في تاريخ مصر إيه النتيجة وبالتالي نحن أمام تحدي حقيقي أن نعبر هذه المرحلة الإنتقالية وأن يوفي الجيش كما عهدناه بوعده أن تنتقل السلطة الي حكومة منتخبة وبرلمان منتخب ورئيس منتخب نحن أمام تحدي حقيقي – التحالف الديمقراطي من أجل مصر الذي أشار إليه أستاذنا الدكتور يحيي بين 18 حزب هو تحالف واعد
رشا مجدي: لأ بس الدكتور يحيي قال حاجة يا دكتور عصام – الدكتور يحيي قال هناك مخرج لو حصل ضغط شعبي ما فيحصل تعديل أو إعلان
أ . د/ يحيي الجمل : كملت قلت الوضح إنه المجلس الأعلي عايز إنتخابات تتم في اقرب وقت
رشا مجدي: إنت ما سمعتش عن مليونية 8 يوليو
أ . د/ يحيي الجمل : سمعت عن المليونية
رشا مجدي: طيب لو إنت عايز تتكلم علي ضغط الشعب
أ . د/ يحيي الجمل : المجلس الأعلي للقوات المسلحة حريص يعني كلامهم
رشا مجدي: شكرا يا دكتور عصام نشكرك شكراً جزيلا
أ . د/ يحيي الجمل : لا دا أنا اللي بأشكره كمان
د.عصام العريان :عايز أقول حاجة قبل ما أسبكوا الضغط الشعبي الآن في إتجاة أن يفي المجلس الأعلي بوعده بنقل السلطة الي المدنيين وبالتالي أنا أعتقد إن الضغط الشعبي تحول الي الإنتخابات فمدخل في تأسيس جمعية جديه تنتخب تمثل كل أطياف الشعب المصري وهي التي تضع الدستور سيكون الدستور بذلك مهمه شعبيه الشعب يمنحه لنفسه في إنتخابات حرة علي مرحلتين وستكون أول مرة في تاريخ مصر الشعب المصري يمارس السياسة فعليا يمنح نفسه دستوراً جديدا
أ . د/ يحيي الجمل : الذي أريد أن أوكده لك يا د. عصام وأوكده لكل جماهير الشعب المصري اللي سمعاني أنه المجلس الأعلي للقوات المسلحة راغب رغبه أكيده صادقة في أنه يسلم هذا البلد ويسلم الحكم فيها لسلطة منتخبة من الناس وزي ما قالوا عشرات المرات في كثير من المعاكسات معاهم إحنا مهمتنا نحمي الحدود الشمالية والجنوبية والشرقية والغربية مش مهمتنا نقعد في الشارع
رشا مجدي: بس ده ظرف إستثنائي البلد بتمر بها
أ . د/ يحيي الجمل : ظرف إستثنائي
رشا مجدي: شكرا د. عصام إحنا بنشكرك علي المداخلة ديه
د.عصام العريان :شكرا جزيلا
رشا مجدي: لكن أنا برضه حأرجع أقول لك إحنا في ظرف إستثنائي مش ظرف عادي البلد محتاجة لكن أنا عايزة أسأل علي – دلوقت حضرتك ذكرت حتتحط معايير محددة لما تيجي الجمعية التأسيسية.. يعني مثلا من ضمن الحاجات اللي عليها الكلام إن إحنا حنبقي نظام برلماني والا نظام رياسي والا نظام مختلط ولا إيه
أ . د/ يحيي الجمل : ما هو ده اللي الجمعية التأسيسية حتعمله لكن إحنا الوفاق القومي
رشا مجدي: التوجة الي أين ؟
أ . د/ يحيي الجمل : أنا حأقول لحضرتك فيه حاجة إسمها الوفاق القومي أنشأها المجلس الأعلي للقوات المسلحة ومجلس الوزراء وشرفوني بإن أنا أبقي مقرر بهذا الوفاق معايا صديقي العزيز اللواء ممدوح شاهين المقرر المساعد ربنا يشفيه يارب وبالمناسبة إتصلت بهكذا مرة لإنه كان في المستشفي وانا ما كنتش عارف
رشا مجدي: نتمني له السلامة إن شاء الله
أ . د/ يحيي الجمل : يا رب .. المهم إنه في الوفاق القومي كان عندنا جلستين عامتين مفتوحتين لكل أعضاء المجتمع وحصل فيهم كلام كتير أخذنا يومين بطول النهار ثم المؤتمر إنقس إلي لجان لجنة النظام الإنتخابي لجنة السلطات لجنة كذا لجنة كذا هذه اللجان بتدرس ليس مهمتها إتخاذ قرارات إنما بتدرس التراث الدستوري المصري كله زي ما أنا ما أسميته بدأً من عهد إسماعيل سنة 1866 مرورا بدستور 23 وكان دستوراً جيداً ثم مشروع دستور 54 اللي أضافة مجلس قيادة الثورة ثم دستور 71 وأيضا كان دستوراً جيداً قبل أن تدخل فيه تعديلات كلها سيئة وأظن أنا الوحيد اللي سمي كل هذه التعديلات في وقتها بأنها خطايا دستوريه وقلت بالحرف الواحد والذين صاغوها أهانوا مصر أهانهم الله هذا كان سنة 2005 وسنة 2007 مع بعض زملائكم في الفضائيات وفي كتابات موجودة في مصر اليوم جرائد مصر اليوم لغاية النهارده أنا الحمد لله مش بأدعي يعني إنما أن كنت بأعتقد إن ديه مهمتي وده واجبي وعملته والحمد الله
رشا مجدي: طيب ليه سألت السؤال ده لإن إحنا شوفنا وجوه كثيره جداً خرجت علينا مرشحين للرئاسة من كل الأطياف يعني أول ما عرفوا إن ممكن يبقي النظام السياسي نظام برلماني إبتدوا يقولوا لك إحنا حننسحب من سباق الرياسه وممكن مثلا زي الدكتور البرادعي قال لك أنا ممكن أبقي رئيس وزراء مثلا – عمر موسي قال لك أنا كده لو هو نظام برلماني مش نظام رياسي أنا ممكن أنسحب من سباق الرياسة
أ . د/ يحيي الجمل : أنا عايز أقولك علي حاجة كفن يعني كهدفي كراجل بتاع قانون دستوري فكرة النظام الرئاسي الكامل أو النظام البرلماني الكامل أظن أنها فكره بدأت تتراجع في فكر القانون الدستوري الفكره الغالبه النهارده أنه نظام رئاسي مطعَّم أو نظام برلماني مطعّم حتي في أمريكا
رشا مجدي: زي فرنسا
أ . د/ يحيي الجمل : زي فرنسا إنما أقول لك بأضرب مثل بأمريكا اللي هي بلد النظام الرئاسي اللي علي أصله - في أمريكا النظام الرئاسي حدث العمل أدخل عليه امور كثيره ما يسموه في الفقه الدستوري الأمريكي الردز " الجسور " بين السلطات وبعضها كان في الأول في تصور الآباء الأوائل زي ما بيسموهم في الدستور الأمريكي كان التصور كل واحد قائم بذاتها يعني كده – ما يمكنش لدولة واحدة تتصوري إن السلطة التنفيذية لوحدها والتشريعية لوحدها ما يمكنش يعني لابد من جسور العمل أقام هذه الجسور
رشا مجدي: لأ بس نرفع آذان العشاء ونكمل مع بعض
أ . د/ يحيي الجمل : آه طبعا دا علي عينا وراسنا
رشا مجدي: نرفع آذان العشاء وبعدين نرجع نحمل حوارنا
فاصل " آذان العشاء "
رشا مجدي: مشاهدينا الكرام نحييكم مرةً أخري وهذا الحوار المفتوح من القلب مع الدكتور يحيي الجمل الفقيه الدستوري أولا ونائب رئيس مجلس الوزراء .. د. يحيي إحنا كنا وصلنا للشكل الأمريكي والجسور التي تمد
أ . د/ يحيي الجمل : أنا كنت حأبدأ اتكلم علي الدستور الفرنساوي
رشا مجدي: إتفضل
أ . د/ يحيي الجمل : اللي هو دستور 1958 اللي هو بيسمي في فرنسا دستور ديجوب لإنه في الحقيقة كان وراه ديجوب الجمهورية الفرنساويه – فرنسا مرت علي ما يسمي الجمهورية الأولي والثانية والثالثة والرابعه والخامسه – الجمهورية الرابعه كانت جمهورية برلمانية وكانت الوزارات فيها بتسقط كل يوم والثاني وكانت كلها وزارات إئتلافية وتسقط والبر لمان يعني كانت لخبطة لا حدود لها – بعد الحرب العالمية الثانيه بدأت الجمهورية الرابعة وبرضه هذا الإستقرار ما كنش موجود كانت البلد غير مستقرة كل يوم والثاني وزاره كل يوم الثاني وزاره جيه ديجو وإتجه إلي وضع دستور يدي السلطة التنفيذية نوع من الإستقرار ويدي رئيس الجمهورية صحيح نظام برلماني لكن يدي أيضا رئيس الجمهورية نوع من السلطان والصلاحيات وفي 58 أنا بأعتقد إنه موديل طيب جداً ممكن نتحتذي به نزود عليه حاجة ننقص منه حاجة
رشا مجدي: دستور 58 الفرنسي
أ . د/ يحيي الجمل : الفرنسي .. طبعا مع إخضاعه لظروفنا – هل الدستور طابع الغالب عليه برلمان لكن فيه تطعيمات رئاسيه يعني مدي رئيس الجمهورية سلطان يعني مخليه حكم بين السلطات ومدياله سلطان مثلاً ماده 16 في الدستور الفرنساوي بتدي له سلطات تكاد تجعل منه في الظروف الإستثنائية زي بعض الفقهاء الفرنساوي ما بيقولوا ديكتاتور مؤقت
رشا مجدي: أنا عايزة أسأله بقه في النقطة ديه معلهش .. يعني نحن إسمح لي مش عايزة نصنع طاغية جديد
أ . د/ يحيي الجمل : لا .. لأ النظام الرئاسي مضطرين
رشا مجدي: طيب إحنا دلوقت هذا الكم الهائل من السلطان الممنوحه لرئيس الجمهورية خليني أقول لك إن التعديلات الاخيرة لم تتعرض لها يعني مثلا لم يتم الفصل الكامل ما بين رئيس الجمهورية ورئاسة أي حزب مثلا
أ . د/ يحيي الجمل : إنت لسة في مرحلة التحول
رشا مجدي: أنا بأقول لك تخوفات الناس ما هو فيه تعديلات عملت وفيه تخوفات
أ . د/ يحيي الجمل : يعني شوفي إحنا هدمنا النظام 25 يناير وما قبلها هدمت نظام باغي طاغي هدمته لكن خلينا نعترف بأمانة شديدة نحن لم نبني نظاماً جديداتً بعد نحن في مرحلة البناء ولازم نعترف كلنا بكده
رشا مجدي: بس بطئه شوية
أ . د/ يحيي الجمل : جايز
رشا مجدي: مش كده
أ . د/ يحيي الجمل : لأ ما تخديش علي لسان كلام إعملي معروف أنا مش ناقص
رشا مجدي: طيب خليها علي لساني أنا ماشي
أ . د/ يحيي الجمل : قولي اللي تقوليه هههه إنما أنا بأقول إحنا ما بنناش نظام جديد وعشان نبني نظام جديد لابد وأن نتكاتف جميعا كلنا المجلس الأعلي للقوات المسلحة ومجلس الوزراء والحزاب والست رشا وجنابي وجنابه وكل الناس تتعاون وتتساند من أجل بناء نظام جديد مصر محتاجة لكل جهد مخلص من أبنائنا
رشا مجدي: حآخد حاجة من علي لسانك يعني أنا قلت علي لساني إن الإجراءات بطيئه شوية حآخد حاجة من علي لسانك طالبت بمد الفترة الإنتقالية لمدة سنة أخري بدلا من تسليم السلطة للمدنيين بنهاية العام .. ديه مش من علي لسانك ؟
أ . د/ يحيي الجمل : حأقول لك حاجة أنا بأقول فيه قاعدة أنا مؤمن بها في علم الإدارة يعني المهمة تحدد المدة مش المدة اللي تحدد المهمة واخده بالك من العبارة – المهمة هي التي تحدد المدة – المهمة التي نريدها الآن هي إعادة بناء نظام جديد طيب إذا كان هذه المهمة تحتاج لأكثر من سنة أنا حأقول لك علي حاجة وبأقولها وأمري الي الله يعملوا فيه اللي يعملوه
رشا مجدي: حتعمل إيه أكثر من كده ما إنت لسة مقدم إستقالة وإترفضت من كام يوم هههه
أ . د/ يحيي الجمل : ههههه أنا المجلس الأعلي للقوات المسلحة كانوا مصممين علي سبتمبر وأنا أحد الناس اللي دخل معاهم في حوارات والحمد لله يعني أقدر أقول بأتمتع بقدر كبير من الثقة وبشق النفس أقنعتهم إن أنتقل من سبتمبر لديسمبر لكن فكرة إن بعد ديسمبر بيوم واحد هم رفضوا أنا بأقول ده ما يكفيش لبناء النظام الجديد لكن بقه علينا نحن بقه علي الأحزاب علي القيادات علي الحركات السياسية الواعية إنها تدرك أن إستكمال المهمة بتاعها هي مش بتاعة القوات المسلحة – القوات المسلحة مشكوره ويندر في تاريخ البشرية أن فيه قوات مسلحة حطت إيديها علي الحكم
رشا مجدي: وتبقي عايزة تسيب
أ . د/ يحيي الجمل : وتبقي عايزة تسيبة وأيه بإصرار وبإخلاص وبصدق – كل البيانات الدستورية التي صدرت بتقول إيه نحن لسنا بديلاً عن شرعية الشعب وأنا العبارة ديه بإعتباري الكودا بتاع القانون الدستوري دائما أركز عليه ودائما أقولها في أحاديثي معاهم وأقولها في أحاديث الصحافه " نحن لسنا بديلاً عن شرعيه الشعب " الشعب هو صاحب الشرعية الأصلية هم في شرعية ثورية لفترة مؤقتة هم لا يريدون أن تمتد بعد 31 ديسمبر حسب إيرادتهم مش هنقدر نغصبهم فلازم نحترم إيرادتهم ولازم نستعد أن نتحمل كلنا وبأكرر ثاني كلنا
رشا مجدي: دا إحنا في يوليو خلاص يعني إحنا قدامنا 5 شهور يعني
أ . د/ يحيي الجمل : 5 شهور
رشا مجدي: طيب خليني أتكلم علي الحكومة وحضرتك نائب رئيس الوزراء يعني لازم أتكلم علي الحكومة بيتقال إن حكومة تسيير الأعمال كل هدفها فقط إرضاء الرأي العام بصرف النظر عن النتائج المستقبلية وده بنلاقيه في تناقضات كثيره في الرأي ما بين أعضاء الحكومة نفسها
أ . د/ يحيي الجمل : طيب أنا عايز أقول لك علي حاجة حكومة الدكتور عصام شارع من كام يوم مضي عليها 100 يوم وقدمت هذه الحكومة كشف حساب بالمئة يوم – كشف حساب – ياريت بأمانة وموضوعيه وبهدوؤ نشوف هذه الحكومة عملت إيه في ال 100 يوم دول وإستلمت إيه إستلمت تركة رهيبه تركة بشعة قربة مخرمة من كل ناحية ومع ذلك إستطاعت في ال 100 يوم دول أنها تعمل ما لم يفعله احد قبلها والبيان موجود يعني كشف الحساب قُدِّم وأعلنه الدكتور عصام - أعلنه الدكتور عصام شرف علي الناس وموجود ومطروح .
رشا مجدي: شوفناه
أ . د/ يحيي الجمل : شفتوه فأنا بأقول الحكومة عملت مش ما عملتش وعملت في ظروف بالغة القسوة من حقنا أن ننتظر أكثر ومن حق الناس أن تنتظر أكثر.. ما هو الناس إيه قعدت في 30 سنة أو أكثر من 30 سنة في كبت وفي غلب وفي ضيق وفجأه الغطاء إنشال إنت بتعرفي تطبخي ؟
رشا مجدي: أيوه
أ . د/ يحيي الجمل : عندك حله برستو
رشا مجدي: آه عندي
أ . د/ يحيي الجمل : لما بتشيلي الغطاء من عليها مرة واحده هب الغطاء إتشال مرة واحده – دا الناس بتقول لك إيه اللي هم عندكوا في المبني ده لما كنت زمان ماسك الملف ده يقولوا إيه دلوقت أهوه يا جماعة دلوقت أهوه إزَّاي .. والناس كلها عايزة دلوقت أهوه دا ربنا سبحانه جلا وعلا قال إنه خلق الكون في 6 أشهر مع إنه كان يستطيع كن فيكون
رشا مجدي: في سبع أيام
أ . د/ يحيي الجمل : أو في سبع أيام أقصد ليه إنه سنة التدرج ما فيش حاجة كده مع إنه قادر علي إنه كن فيكون فلابد من إن ندرس الأمور بتأني ورويه ونشوف إحنا عملنا إيه وإستلمنا إيه أنا صحيح كنت موجود قبل الدكتور عصام يمكن إسبوعين سابقين عليه لإن أنا دخلت الحكومة مع الفريق أحمد شفيق بعد تنحي الرئيس حالف يمين قدام المجلس الأعلي للقوات المسحله لما توليت – يعني كنت نائب رئيس الوزراء بعد التنحي – يعني أنا مش عايز أقول مثلا – إنما مضطر أقولها الأخ الفريق أحمد شفيق وهو رجل فاضل وأنا بأقول هو رجل فاضل وبأتكلم عليه دائما كويس لإنه مش موجود في السلطة النهارده جالي مكتبي وقعد معايا ساعتين ونصف يقنعني بإن أنا أدخل الوزارة
رشا مجدي: قبل التولي
أ . د/ يحيي الجمل : قبل التولي .. أنا نظرتي لنفسي أنا راجل أستاذ كتب وهذا هو أحب ما كان عندي وما بحبش مكان ثاني غيره وقعدت أقول للفريق أحمد شفيق هذا الكلام وهو يجيبني يمين وبعدين في الآخر قال إيه بقه واضح إنك إنت بتفضل مصلحتك الخاصه عن مصلحة البلد – قلت له كده .. كده طيب أنا خلاص وافقت بحكم وحأدخل معاك – والجلسة ديه جيه وأحنا قاعدين الدكتور عصام شرف جاني المكتب لإنه كان بيتردد عليَّ في المكتب كثيراً وجيه الدكتور سمير الصياد لأنه لما حصل كلام مع الفريق أحمد شفيق ووافقت علي إن أنا أدخل معاه كان احد الأسماء اللي في زهني الدكتور عصام شرف وسمير الصياد وآخرين ونبيل العربي وآخرين
رشا مجدي: وحضرتك بتتكلم أنا بأطلع عندي بعض المعلومات إن عليك ضغوط بتتعرض لها من داخل بيتك أساساً من نجليك بيرفضوا إنك إنت كنت تأخذ المنصب ده وبعدين غير كده لسة كنا بنتكلم كنت مقدم إستقالتك من كام يوم والمجلس الأعلي رفضها
أ . د/ يحيي الجمل : هم ولادي في الحقيقة في الإول كانوا رافضين لكن دلوقت إقتنعوا بإن لازم أستمر
رشا مجدي: واجب وطني
أ . د/ يحيي الجمل : واجب وطني ولازم أستمر الي أن تنتهي الفترة الإنتقالية والفترة الإنتقالية هتنتهي في سبتمبر معلهش
رشا مجدي: إنت قدمت إستقالتك ليه
أ . د/ يحيي الجمل : لأسباب كثيرة
رشا مجدي: مش عايز تتكلم علي الهواء ؟
أ . د/ يحيي الجمل : لأ هو أنا أوضحها الإرهاق النفسي والعصبي إحنا النهارده في مجلس الوزراء حوالين المجلس من كل ناحية ناس ماسكة طرومبيطة عمَّاله تخبط عليها
رشا مجدي: ما إحنا عندنا نفس الحاجة
أ . د/ يحيي الجمل : وما بتقلش حاجة ياريت الناس تقول حاجة دول ماسكين طبل عمالين يطبلوا عليه طول النهار – طول النهار من 9 الصبح أنا ماشي الساعه 3 وربع الطبل ما توقفش طيب ما تطبلوا قولوا حاجة – طيب ما تطبلوا إشتغلوا وإنتجوا حاجة وخدوا منها شويه وإدو للحكومة شويه يعني إشتغل وإعمل حاجة ب 10 ساغ خد منهم 7 وإدي لسمير رضوان 3
رشا مجدي: يعني مش نتيجه لخلافات مثلا مع مستشارين دكتور عصام شرف زي ما يُقال وخلاف مع الدكتور عصام شرف متهيأ لي الكلام ده إنت عارف اليومين دول
أ . د/ يحيي الجمل : أولا الدكتور عصام بأقول لك علاقتنا علاقة صداقه وإخوه ومحبة .. هذا الرجل حنون بشكل لا يتصوره إنسان وأنا أعرف الحكاية ديه دا أنا كنت عندي دور أنفلونزا أبص ألاقية داخل عليَّ وماسكني يعني هو بطبيعته حنون حنيه غير طبيعية في البني آدمين
رشا مجدي: هي واضحة حتي في إسلوبه يعني .. طيب د. يحيي خلينا نقول إن دلوقت برضه فيه موضوع مهم جداً مش بيثار جدل بقه هو محل نقاش وهو قانون دور العبادة الموحد تعتقد إن القانون ده إن شاء الله إنه لما يصدر خليني أقول يطفئ نار الفتنة الطائفية أو حيغلق باب ما كانوا يحاولون العبث بالمصريين ؟
أ . د/ يحيي الجمل : كويس إنك فتحتي الباب ده – مصر اليوم عندهم إتجاة إنهم يرفعوا مقالاتي وأنا كنت بأغير في المقالات في مقالين إثنين أنا كاتبهم لا تكسروا مصر والمقالا الثاني لا تكسروا مصر حتي وإن كنتم لا تكسبون وقلت في المقالتين دول هم كانوا من سنيتين يمكن إن مصر لا تكسر إلا من الفتنة الطائفية والعياذ بالله وحأكمل لك بقى وأمري الي الله وقلت إن وراء الفتنة الطائفية أمريكا إسرائيلي – طيب ليه – لإن ما يكسرش مصر لاقدر الله إلا الفتنة الطائفية وإسرائيل هي صاحبة المصلحة الأولي في كسر مصر ولازم الناس تبقي واعيه لهذا – إسرائيل كسرت العراق – العراق مزقت لصالح إسرائيل – السودان بيمزق لصالح إسرائيل – حاجات كتيره بتتم في المنطقة لصالح إسرائيل وإسرائيل تعلم إن القوه الوحيدة اللي تعمل حسابها بكره وبعده وبعد 100 سنة هي البلد ديه ولذلك هم مخططهم لكسرها وأنا قلت هذا الكلام وإحتجت عليَّ الحكومة الإسرائيليه مرتين والدكتور نبيل العربي قال لهم ياناس دا بتكلم بصفته الشخصية قالوا لأ ما فيش حاجة إسمها صفته الشخصيه دا نائب رئيس الوزراء مع إني كنت بأتكلم بصفتي الشخصية ما بأتكلمش بإسم الحكومة اللي بتكلم بإسم الحكومة في المسائل الخارجية وزير الخارجية إنما أنا مؤمن بهذا
رشا مجدي: يعني قد تخشي علي مخاطر موجوده الآن داخل مصر متربصين بالثورة ؟
أ . د/ يحيي الجمل : يا سيدتي هناك عملاء لا يدركون أنهم عملاء أجهزة المخابرات العالمية قادرة علي تجنيد عديدين ما يعرفش إنه مجند الواد اللي مسكوه أخيراً ده
رشا مجدي: الجاسوس الإسرائيلي
أ . د/ يحيي الجمل : الجاسوس الإسرائيلي وغيره كثيرين – دا كلام مجلس الوزراء في مصر النهارده بيتردد فيه كلام ما كانش بيتقال من 30 سنة قبل 30 سنة ما سمعهوش قولت الإنتماء العربي لمصر ما أنا شغلتي حكاية الإنتماء العربي ديه زمان من أيام عبد الناصر وأنا بأقول الإنتماء العربي والناس بتقول عليَّ بيخرف عربي إيه ومش عربي إيه لكن أنا مؤمن بالإنتماء العربي المصري هذا الكلام إبتدي يتردد في جنبات الإمتداد الأفريقي لمصر أول زيارات عملها عصام شرف علمها لأفريقيا وجابت ثمار جيدة اللي عايز أقوله لحضرتك إن هذا الموضوع بالغ الحساسية لكن ستر ربنا إنه فيه رجلين عظماء .. عظماء قداسة البابا شنوده الثالث وفضيلة الإمام الدكتور أحمد الطيب .. ليه بقه – ليه بأقول ناس علماء البابا شنوده قال كلمه زمان قال مصر ليست وطناً نعيش فيه وإنما وطن يعيش فينا والعبارة ديه قالها البابا عادي أنا كتبت مقال في الأهرام بهذا العنوان وكررتها كثيرا – البابا شنوده صمام أمان حقيقي ضد أي إنحراف نحو الفتنة الطائفية وربنا يبقيه لهذا البلد لإنه فعلا نقاء – أيضا الإمام الطيب – الإمام الطيب هذا رجل يمثل إستنارة الإسلام سماحة الإسلام – شوفي وثيقة الأزهر اللي طالعة أنا كاتب عنها بكرة مقال
رشا مجدي: إنت شاركت فيها يا دكتور ؟
أ . د/ يحيي الجمل : لأ ما شاركتش يعني ما كنش لي شرف المشاركه فيها لكن بعض أصدقائي شاركوا فيها وفعلا أنا مسميها في مقال بكره وثيقة الأزهر وثيقة التنوير لإن هي فعلا وثيقة التنوير وأنا إقترحت كمان علي تآلف الأحزاب أنه المبادئ التي وردت في آخر الوثيقة يضمنوها مرجعية للإئتلاف
رشا مجدي: بالمناسبة يا دكتور
أ . د/ يحيي الجمل :هي لسة مناسبة ثاني إنت وجعت دماغي
رشا مجدي: ما علهش لسة شوية حضرتك وجاي ماسبيرو شوفت الطريق مقطوع ازاي
أ . د/ يحيي الجمل :لأ أنا جي من ورا زي ما بأدخل من مجلس الوزراء من ورا دخلت من ورا هههه
رشا مجدي: بس هو الطريق مقطوع النهارده تماما يعني فهناك قانون لتجريم الإعتصامات وما يعطل العمل والإنتاج وا – وا – الي آخره – طريق الكورنيش مقطوع تماماً علي من سيطبق هذا القانون متي سيطبق
أ . د/ يحيي الجمل :لابد وأن يطبق – شوفي فيما يتعلق بالأمن العام والنظام العام لا تهاون يعني الذين يخلون بأمن هذا البلد وبنظام هذا البلد يجب أن ما يبقاش فيه معاهم تهاون أبداً .. أبداً
رشا مجدي: طيب أمتي حنطبقه
أ . د/ يحيي الجمل :أنا لو بإيدي الأمور
رشا مجدي: بإيد مين ؟
أ . د/ يحيي الجمل :بإيد وزير الداخلية وبإيد قوي الامن والمجلس الأعلي للقوات المسلحة وأنا بأعتقد إنه فيه رغبه حقيقية في تطبيق النظام وإن شاء الله حيطبق النظام يعني ليتهم يرعوون – إسمعي الكلمة ديه – ليتهم يرعوون – إذا لم يرعون ربنا حيسلط عليهم بذنوبهم من لا يرحمهم
رشا مجدي: يعني عندنا وقت لسة فاضل
أ . د/ يحيي الجمل :لا ..لا ..لأ مافيش خلاص
رشا مجدي: ما فيش أنا عايزة بس فاضل دقيقتيه أنا عايزة أقول لحضرتك إنه التداعيات الإقتصادية ما بعد الثورة .. إحنا قدامنا دقيقتين .. يعني هي مثيره للقلق والمواطن للأسف لم يشعر بعائد الثورة ما فرحش عارف لما تقول حضرتك إتسرقت فرحتك
أ . د/ يحيي الجمل :معاكي حق هذه العبارة صحيحة وسليمة لو تشوفي حضرتك مناقشات مجلس الوزراء في موضوع الميزانية وتبصي لسمير رضوان وتبصي لرئيس الوزراء وتبصي للوزراء وهم كل واحد منهم عايز يمسك سمير رضوان يمزقه – مش يمزقه يعني أنا عايز 30 مليار – أنا التعليم عايز كذا – أنا العيش عايز كذا – لأ أنا الخبز عايز كذا إحنا بنعمل معجزه إحنا بنتصدي لمشاكل لم تمر مصر من أيام محمد علي – علي فترة بهذه الدقة وبهذه الصعوبة
رشا مجدي: د. يحيي أنا عندي أسئلة كثيره وللأسف وقت البرنامج تقريبا خلاص
أ . د/ يحيي الجمل :إن شاء الله السنة اللي جاية والا اللي بعدها حأجيلك ونكمل البرنامج
رشا مجدي: لأ أنا مش عايزة السنة اللي جايه ليه أنا عايزة اليومين دول يعني أنا
أ . د/ يحيي الجمل :لأ أنا قصدي أقول لك بإذن الله أرجع لكليتي بقى كده والإنتخابات تتم والحكومة ديه تنعمل والواحد يروح وينام ويهدي ويسمع أم كلثوم
رشا مجدي: إنت متوقع إن إنت علي السنة اللي جاية مش حتكون موجود
أ . د/ يحيي الجمل :لا قبل السنة الجاية بكثير علي نهاية السنة ديه علي سبتمبر ولا بتاع
رشا مجدي: دا تعب ولا زهق
أ . د/ يحيي الجمل :والله لأ تسليم المهمة لناس أكثر شباباً وأكثر قوة وأكثر مقدرة
رشا مجدي: والا الهجوم مضايقك
أ . د/ يحيي الجمل :لا ما عدتش في الأول كنت بأتضايق أنا بأكلمك بجد في الأول يعني مثلا من شهرين فاتوا
رشا مجدي: أنا عندي دلوقتي مثلا بلاغ متقدم مثلا من حد مش عايزة أقوله لك والا أقوله لك ؟
أ . د/ يحيي الجمل :لا ..لا قولي ياما بلاغات
رشا مجدي: قدمه محمود العسقلاني منسق حركة لا لبيع مصر بإن إنت كنت بتعمل مستشار بشركة رجل الأعمال إبراهيم كامل وهو من قيادي لحزب الوطني الديمقراطي ومحبوس مثلا هل الحاجات ديه بتضايقك
أ . د/ يحيي الجمل :ههههه كانت بتضايقني لكن حأقول لك حكاية إبراهيم كامل ديه – وإبراهيم كامل موجود – فيه شركه إسمها شركة المنتجعات المصرية هذه الشركه كونت في آخر السبعينان أوائل الثمانينات الشركه ديه أول رئيس لها كان إسمه اللواء أحمد زكي عبد الحميد اللي أعاد بناء الجيش المصري مع الفريق صادق الله يرحمه هذه الشركه إتأسست بين بنك مصر والبنك الأهلي ومصر للتأمين ومجموعة من كبار الرأسماليين المصريين والدوله المصرية – مش الدولة المصرية جهاز المخابرات المصرية لإنه جهاز المخابرات كان واخد موقف في ذلك الوقت أنه البحر الأحمر لازم يبقي إيه عينه عليه ودا أمن مصر القومي لها 15% في هذه الشركه – الشركه إسمها شركة الرواد مملوكه للمخابرات هذه الشركه أسست في مكتبي وأنا سعيد بهذا – هذه الشركه في فتره من الفترات كان إبراهيم كامل بيرأس مجلس إدارتها كان رئيس مجلس الإداره وحتي تركت المهنه وحتي تركت المحاماه هذه الشركه كانت المكتب – الشركه مش إبراهيم كامل .. أنا عايز أقول حاجة بقه أنا لم أعمل عند أحد وأنا أكبر من إني أعمل عند أي أحد في مصر كبير أو صغير أو راح أو جيه – أنا وأعوذ بالله من كلمة أنا إنما لست أنا الذي يقول عليها بتاع زي ما بيقول ما أعرفش إسمه إيه وياريت صحيح يكون قدم بلاغ عشان خاطر أبهدله – أبهدله بالحق ديه قلة أدب – يعني الناس لازم تبقي تراعي إنها ما تبقاش قليلة الأدب
رشا مجدي: د. يحيي الجمل الفقيه الدستوري والقامة الكبيرة ونائب رئيس مجلس الوزراء إحنا سعداء بتشريفك لينا في الإستديو في إتجاهات ونتمني إن إحنا نلتقي قريبا عندنا موضوعات كثيرة نحب نتكلم فيها مع حضرتك
أ . د/ يحيي الجمل : إن شاء الله
رشا مجدي: إديني وعد علي الهواء دلوقت
أ . د/ يحيي الجمل :حاضر إن شاء الله
رشا مجدي: إن شاء الله حتي الإسبوع اللي جاي
أ . د/ يحيي الجمل :لا..لا .. الإسبوع اللي جاي حرام عليك
رشا مجدي: إحنا بنشكرك شكراً جزيلاً وأهلا بك معانا
أ . د/ يحيي الجمل :أهلا بك
رشا مجدي: مشاهدينا الكرام بكده تكون إنتهت حلقتنا الليلة ديه لكن إن شاء الله حلقة الغد حتكون عن دور مواقع التواصل الأجتماعي كمصدر للأخبار مشاكل الشبكات الإجتماعية بنشكركم ونترككم الآن مع نشرة التاسعة .