البااارلمنجى: النواب باعوا الشعب واشتروه

عليا الطلاق أنا مش عارف أقولكم إيه.. لكننى جمعتكم النهارده يا أهل دايرتى علشان أقولكم على بلوة جديدة من بلاوى النواب اللى حضراتكم انتخبتوهم ووصلتوهم للبرلمان على حسابى أنا.
طبعا كلكم سمعتم بأن الحكومة عايزه "تخصخص" التعليم.. وقوم إيه علشان ماحدش ياخد باله قالولك هنبيع المدارس بنظام "حق الانتفاع".. يعنى نفس المسلسل بتاع "عمر أفندى" اللى بدأ بتصريح حق الانتفاع في أولى حلقاته وتم بيعه في الحلقة الأخيرة.
أهو أنا بقى أتوقع أن يتم بيع المدارس قبل الحلقة الأخيرة بعشر حلقات.. ليه بقى؟!.. لأن أعضاء البرلمان الحالى جاهزون للموافقة على أي شيء تطرحه الحكومة وبأغلبية ساحقة تحت شعار "دعم الدولة".. فما بالك بقى وأن ثلثى أعضاء البرلمان من رجال الأعمال؟!
يعنى هما اللى هيسلموا الشعب تسليم أهالي للحكومة وهيبيعوا مدارس الشعب للحكومة.. وهما برضو اللى هيشتروها.. وزيتنا في دقيقنا ويولع التعليم ومستقبل التعليم.. أما الإعلام اللى برضه مملوك لرجال الأعمال اللى من الممكن إنهم يشترولهم كام مدرسة "بحق الانتفاع" سيروج للشعب أن هذه هي أفضل الطرق لتحسين وضع الفصول المزدحمة بالتلاميذ والقضاء على الدروس الخصوصية.. لنفاجأ فيما بعد بأنه ليست الدروس فقط هي الخصوصية بل والمدارس أيضا أصبحت خصوصية.. وكلامى دا طبعا لا ينطبق على كل أعضاء البرلمان.. لكنه ينطبق على المصلحجية.
وأقول قولى هذا.. واستغفر الله لى ولكم.
مع تحياتى: أخوكم "نزيه صندوق عبد المتعال الناخب" الشهير بالبااارلمنجى.. نائب ساقط ببرلمان 2016