البااارلمنجي: حملة «راقب نائب» لا تدين أي نائب

الإخوة الحلوين اللى معرفش هما مين.. نواب كانوا أو صحفيين.. أو جايز يكونوا من عمال البرلمان المُعينين.. مش مهم نعرف هما مين.. المهم أننا نعرف أنهم عاملين حاجة داخل البرلمان اسمها «حملة راقب نائب».. والحملة دى قالولنا إن الهدف منها الإشادة بالنائب اللى بيشتغل وفضح النواب النايمين.
إحنا بقى قلنا آمين وأدينا مستنيين.. علشان نشوف النواب الحلوين من النواب اللى مش شغالين.. والفكرة حلوة والقائمين عليها ناس حلوين.. وزى ما قالولنا إن كل شهر هيكون فيه إعلان عن النواب اللى هتقع عليهم العين.. وأنا بصراحة كبااارلمنجى تمنيت إنى أكون في البرلمان علشان أكون من الفايزين.. وأعرفكم يا أهل دايرتى من خلال الحملة أنى من أفضل النواب اللى شغالين.. لأنى كنت أكيد هبقى شايل همكم وأكيد أنتم طبعًا عارفين.
لكن وللأسف عدى على البرلمان ييجى نص سنة وماشفناش أي نواب مش شغالين.. وكل شهر تطلع علينا الحملة بخبر على المواقع وفى الجرايد يقولنا إن الاختيار وقع على النائب الفلانى كأفضل نائب من النواب الحلوين.. وكمان معاه نائب تانى يستحق الإشادة بدال ما نفضل كل شهر نمدح في نائب واحد حزين.. وهاتك يا إشادة في النائبين الحلوين المسكرين اللى وقعت عليهم العين كأفضل نائبين خلال الشهر الحزين.
وأنا جمعتكم النهاردة يا أهل دائرتى علشان أسألكم: هما اللى عملوا الحملة الحلوة دى مش لاقيين نواب تحت القبة وحشين؟! يعنى مافيش عندنا ولا نائب شين؟! أو حتى نائب كسلان حبتين؟!
طب إيه لأزمة إنك تعلن عن حملة راقب نائب وتقولنا إنها هتفضح ناس وتشيد بالتانيين؟! مش كان أحسن لك ولنا يا عمنا إنك تقولنا إنك هتلاعب النواب المحترمين؟! ولا إنت يعنى وأصحابك بتخزوا العين؟!
طبعا حد هيطلع يقولى إن إحنا قلنا إن «توفيق عكاشة» أسوأ نائب من نحو شهرين.. وأنا بقى هقولك دا مش تقديرك انت لوحدك.. دا تقدير كل المصريين.. وهو يعنى مافيش تحت القبة غير توفيق اللى لمحته العين؟! ولا العجل لما يقع تكتر عليه السكاكييييين؟!
أنا بس كان نفسى مايبقاش اسمها حملة راقب نائب.. لأن المراقبة بتفرز عن نوعين.. وكان نفسى يبقى اسمها «حملة الإشادة بنائب» علشان بس نبقى مصدّقين.
مع تحياتى: أخوكم «نزيه صندوق عبد المتعال الناخب» الشهير بالبااارلمنجى.. نائب ساقط ببرلمان 2016.