الشعب مش ناقص.. ارحمونا ياجودعااااان

طبعا أنتم عارفين أنا النهاردة جمعتكم ليه.. واللى مش عارف أنا بقى هقولكم يا أهل دايرتى السبب اللى خلانى أجمعكم.. أنا عايز بس أقولكم أن الكورة لسه في الملعب.. وآديكم شايفين النواب اللى بتتلغى عضويتهم سواء بحكم محكمة أو بسوء سلوكهم أو بميولهم السياسية ضد الدولة أو حتى بالموت ومرافقة الحياة.
أنا هنا مش جاى أشمت في حد.. لكن جاى أقولكم إنكم من الممكن أن تجدونى تحت قبة البرلمان في يوم وليلة.. فبلاش تنسوا إن أنا مرشحكم الأول.. وأنا أقول ذلك رغم أنكم بعتونى بأرخص الأسعار وأعطيتم أصواتكم لمن ضحك على عقولكم وظننتم أنه سيدفع أكثر.. فلا هو دفع ولا أنتم تستطيعون أن تصلوا لسيادته بعد أن أغلق تليفوناته وأخفى عنكم عنوان شقته الجديدة.
اشربوا بقى ياحلوين ياواعيين ياجعانين.. يعنى أنا لو موجود تحت القبة حاليا.. هل كان يجرؤ أحد على تطبيق قانون "القيمة المضافة" على الناس الغلابة والمساكين؟! هل كان يجرؤ أحد على السكوت وتطنيش غلاء الأسعار اللى مبهدل أهاليكم لأنكم ملكوش صوت داخل البرلمان بعد أن أصبح كل أعضائه من رجال الأعمال وعلية القوم؟
عموما أنا بس حبيت أفكركم أنكم أنتم الذين صوتم لهؤلاء حتى وصلوا للبرلمان على حسابى أنا ابنكم الفقير الذي استكثرتم عليه أن يدافع عنكم تحت قبة البرلمان.. لكنى أقولها من هنا لنواب البرلمان.. الشعب مش ناقص ياجودعاااااااان.. ارحمونا يرحمكم الرحمن.
مع تحياتى: أخوكم "نزيه صندوق عبد المتعال الناخب" الشهير بالبااارلمنجى.. نائب ساقط ببرلمان 2016.