شوفوا بقى يا أهل دايرتى.. أنا بقى جمعتكم النهاردة علشان أقولكم إنى تعبت منكم ومن شكواكم.. دا انا بقيت حاسس وكأننى عايش بس علشان كل واحد فيكم ييجى يشكيلى من السادة نواب الدايرة.. طب يعنى مش حضراتكم اللى انتخبتوهم واللا انا اللى انتخبتهم؟! نعم انتخبتوهم وتركتونى ظنًا منكم أن الفلوس اللى عندهم هتتوزع عليكم بمجرد وصولهم للبرلمان.. طب آديكم مش لاقيين حتى كيس السكر وهما بيتفرجوا عليكم. لا ومش بس بيتفرجوا.. دول بيدافعوا عن الحكومة وكأنهم يكيدونكم.. ههههههههه أي والله أنا حاسس أنهم رافعين لنا شعار "كايدة العزال أنا من يومى".. مع الاعتذار للست المطربة "عايدة الشاعر". دا بقى بالإضافة لتصرفاتهم داخل البرلمان وأخبارهم اللى بنشوفها على المواقع الإخبارية واللى ملهاش علاقة بنا كأبناء لدوائرهم. يعنى مثلا عندك الست النائبة الهمامة بتاعتنا سايبة كل مشاكلنا ورايحة تتكلم عن الستات وتطالب بتمكين المرأة.. طبعًا هي ماتقصدش المرأة بتاعة دايرتنا.. لأن حريمنا مش لاقيين ياكلوا أصلا علشان يدوروا على التمكين والكلام الفاضى ده.. وأنا مش عارف أصلا يعنى هي هتعمل إيه سيادتها بعدما تتمكن.. طب مااديكى اتمكنتى وبقيتى نايبه قد الدنيا.. تقدرى بقى تقوليلى عملتى إيه لأهل دايرتك؟! طب سيبك من أهل دايرتك.. عملتى إيه للسياحة اللى حضرة معاليكى بترأسى لجنتها داخل البرلمان؟! ماهى السياحة بقت زى حالاتنا في خبر كان.. بينما حضرتك بتناقشى تمكين المرأة ياست الحسن. ونائبنا الثانى اللى سايب مشاكلنا ورايح يقول للرئيس "أمى كانت بتدعيلك في الحرم وهى ساجدة وأنا قاعد جمبها ببكى.. ونائبنا الثالث بيقدم طلب إحاطة ضد معلمة ضربت تلميذا عندها في الفصل.. قال إيه البيه النائب عضو لجنة حقوق الإنسان داخل البرلمان.. طب يااخى تعال شوف المستشفى الحكومى في دايرتك وكيف تُنتهك فيه حقوق أم الإنسان. مع تحياتى: أخوكم "نزيه صندوق عبد المتعال الناخب" الشهير بالبااارلمنجى.. نائب ساقط ببرلمان 2016.