شعب إيه وبتاع إيه ياض ياابن الإيه؟!

قبل دخولى في الموضوع اللى هتكلم فيه النهاردة أحب أقولكم حسبى الله ونعم الوكيل فيكم.. أيوة يا أهل دايرتى.. أنا جمعتكم النهاردة علشان تعرفوا أنكم جنيتم على أنفسكم قبل أن يجنى عليكم أحد عندما أعطيتم أصواتكم لهؤلاء النواب اللى بيمثلوا الدايرة بتاعتنا.. رغم أننى كنت مرشحكم ومهموم بقضاياكم.
طبعًا حضراتكم عارفين أن البرلمان كان بيحتفل منذ أسبوع بذكرى مرور 150 سنة على إنشائه.. وتعلمون برضه أن أعضاء البرلمان والوزراء وكل مسئول في البلد عمل الواجب الوطنى بتاعه على أكمل وجه، وقام بدوره في مطالبة الشعب بالتقشف علشان مصر بتتعرض لأزمة اقتصادية.
وعارفين أن الحكومة والإعلام والبرلمان بيطالبوا الفقير المعدوم بالتبرع لمصر ويصبح عليها ولو بجنيه مع كل طلعة شمس.. لكن اللى ماتعرفوهوش حضراتكم هو أن الناس دى لا تطبق هذا الكلام على نفسها وكأنهم ضيوف على مصر جاءوا لينصحوننا بالتقشف علشان نعرف نعيش ويفضلوا هما في مناصبهم.
أعضاء البرلمان ياسادة وعلى رأسهم نواب دايرتنا اللى انتخبتوهم على حسابى ذهبوا إلى «شرم الشيخ» للاحتفال على نفقة الدولة.. في حين أنهم قادرون على إقامة الاحتفال داخل البرلمان ترشيدًا للإنفاق الذي يطالبوننا بترشيده..
أما في حال أنه لا بد من ذهابهم إلى شرم الشيخ والإقامة في أفخم الفنادق هناك فهم أيضًا قادرون على أن ينفقوا على أنفسهم من خلال رواتبهم الضخمة التي يأخذونها من أموال الشعب.. ومن خلال ثرواتهم التي وصلوا من خلالها لعضوية البرلمان.
لكنهم للأسف رفضوا ذلك.. وعندما طالب بعض منهم بتحمل نفقاته الشخصية خلال أقامته بشرم الشيخ حتى لا يغضب أهل دائرته وجد معارضة من زملائه الذين يرون أن من حقهم التنزه على نفقة الشعب المطحون.. الراجل قال لهم خليها عليكم المرادى علشان الشعب ماياكلش وشنا.. إلا أنهم قالولوا شعب إيه وبتاع إيه ياض ياابن الإيه.. أهم حاجة الحكومة.
مع تحياتى: أخوكم «نزيه صندوق عبد المتعال الناخب» الشهير بالبااارلمنجى.. نائب ساقط ببرلمان 2016.