البااارلمنجي: بكرة هتدفع الثمن يا نائب آخر زمن

والله أنا عارف إنكم شايلين الطين.. يا كل أهالي الدايرة المحترمين.. وأنا جمعتكم النهارده بس علشان أقولكم كلمتين.. مع إني عارفكم مش ناقصين.
طبعًا مش ناقصين.. الجنيه بيعوم قدام عنيكم وأنتم ساكتين.. وزيادة في أسعار السولار والبنزين.. وسكر شاحح من السوق بقاله أسبوعين.. لكن تقدروا تقولولي السبب في دا كله مين؟!
أنا بقى أقولكم مين.. السبب يا سادة هم أمثال هؤلاء النواب اللي انتخبتوهم وأوصلتوهم للبرلمان ليمثلوا دايرتنا على حسابي أنا ابنكم البار بكم.. هؤلاء النواب عايشين دور الأطرش في الزفة تحت قبة البرلمان.. فلا سمعنا يوما أن أحدهم قدم طلب إحاطة ضد تصرفات الحكومة ولا حاول استجوابها عند أي أزمة يتعرض لها أهل دائرته.. ولا حتى تقدم بسؤال يحيى ماء وجهه أمامكم.. نواب دايرتنا يا سادة عاملين نفسهم من بنها.. وكأنكم انتخبتوهم علشان ياخدوا بّدل جلسات ويحضروا مؤتمرات وحفلات!
عارف إن حالتكم تصعب على الكافر «لا مؤاخذة».. وإن مرتباتكم مش مكفياكم -دا بالنسبة للي بياخدوا مرتبات- خاصة بعد أن قلّت قيمتها بعد هذا الغلاء الفاحش لجميع السلع.. أما أصحاب المعاشات فمعلش بقى ربنا معاكم.
أعرف أنكم تعانون من عدم وجود خدمات تليق بكم لأن سيادة النائب لا يقوى على مطالبة الحكومة بهذا.. سيادة النائب ابن دايرتنا شايف إن الحكومة مظلومة وما فيش بيدها حاجة.
طب تصدق بإيه يا عم النائب أنت وهو وهي.. الحكومة فعلا ملهاش ذنب في هذا الغلاء والفشل الذي نعيشه.. لأن الحكومة ببساطة لا تجد من يحاسبها.. وقال على رأي المثل: «قالولها يا حكومة مين فرعنك.. قالت ملقيتش نائب يحاسبني».
وأنا من هنا وبالنيابة عنكم وبالأصالة عن نفسي أقول لسيادة العضو ممثل دائرتنا تحت قبة البرلمان: «بكرة هتدفع الثمن يا نايب آخر زمن».. وأقول قولي هذا، وأستغفر الله لي ولكم.
مع تحياتي: أخوكم «نزيه صندوق عبد المتعال الناخب» الشهير بالبااارلمنجي.. نائب ساقط ببرلمان 2016.