نائبنا أبوجلباب وطاقية.. مش عارف يوفر لنا الأسمدة الزراعية

يعنى يا ربى حتى الكام نائب اللى ربنا رزقنا بيهم في الدايرة مش قادرين يجيبولنا حقوقنا في البلد دى؟!.. أيوه إحنا بنطالب بحقوقنا مش بمنحة من سيادة النواب اللى رزقنا بيهم ربنا.. ولا حتى من الحكومة اللى بيطبطبوا عليها وبتطبطب عليهم..
نواب دايرتنا لا منهم ولا كفاية شرهم.. لا بيقدمولنا خدمات خاصة ولا حتى قادرين يطالبوا الحكومة بتوقير خدماتنا العامة..
وأنا بقى جمعتكم النهاردة يا أهل دايرتى الكرام مش علشان أفكركم أن نوابنا لغاية النهاردة لم يطالبوا بتوفير الصرف الصحى لنا كبنى آدمين.. لأ خالص.. ولا جمعتكم علشان فواتير الكهربا اللى زادت 100 % على زيادتها اللى قبل الأخيرة.. لا أبدا خالص.. ولا حتى جمعتكم علشان أفكركم أن شباب الدايرة عاطلين من غير وظايف.
أنا جمعتكم علشان "الأسمدة الزراعية" اللى اختفت من الجمعيات الزراعية وبنشتريها من السوق السودا بضعف ثمنها.. لأ وإيه.. حتى الأسمدة بقت مضروبة ومغشوشة.. لكن هنعمل إيه بقى.. لازم نشتريها وإلا الزرع هيموت..
واللى زاد الطين بلة إن الحكومة زودت سعر الأسمدة اللى مش موجودة.. يالا بقى ما هم ضربوا الأعور على عينه.. قال خربانة خربانة.
طبعا من حقها تعمل فينا كدا طالما نوابنا أصلا شايفين كدا.. عموما واضح أنها رسالة من الحكومة للقضاء على الزراعة وتبوير الأراضى.. وجايز نوابنا عايزين كدا.. ما هم بيموتوا في التبوير وآهى فرصة للتعمير واستثمار القرشين بتوع الدورة البرلمانية.
نوابنا خلاص خلعوا الجلاليب ولبسوا البدل والبنطلونات الجينز.. ندهتهم النداهة لا مؤاخذة.. مع أنهم دخلوا البرلمان على أنهم مزارعون.. وأخدوا أصوات المزارعين عندما وعدونا بحل مشكلات المزارعين.. يلا بقى اشربوا نوابكم يا أهل دايرتى اللى فضلتموهم عنى أنا ابنكم اللى شايل همكم..
مع تحياتى: أخوكم "نزيه صندوق عبد المتعال الناخب" الشهير بالبااارلمنجى.. نائب ساقط ببرلمان 2016