دوشانى يابلد كده ليه وانتى اللى ساكنة عينّيّه ده أنا اللى وعيت عليه إن تيران وصنافير مصرية أي والله مصرية.. بعيدا بقى عن حكم القضاء الإدارى اللى قال إنها مصرية.. وبعيدا عن مستندات الحكومة اللى قالت إنها سعودية.. وبعيدا كمان عن رأى البرلمان.. هي مصرية كده وخلاص.. على الأقل من وجهة نظرى أنا المواطن الغلبان عمكم البااارلمنجى اللى أتولد في البلد دى وهو عارف أن الجزيرتين هم جزء من وطنه.. هي مصرية حتى ولو كانت بالفعل سعودية.. مصرية غلاسة.. فتونة.. بالذوق.. بالعافية هي مصرية حتى لو راحت للسعودية.. ماهى السعودية برضو عربية.. ومصر عربية.. واستنانى بقى في الحته دية أنا جمعتكم النهاردة يا أهل دايرتى الكرام علشان تشوفوا السادة نواب دايرتنا إزاى استقبلوا خبر إحالة اتفاقية ترسيم حدود جزيرتى تيران وصنافير للبرلمان.. طبعا المفروض إن السادة الأفاضل النواب بيمثلونا إحنا أبناء الدايرة.. وبالتالى من المفروض أن يسألوننا عن رأينا في مصرية الجزيرتين أو سعوديتهما وبعد كده يوصلوا رأينا وصوتنا للبرلمان. إلا أن نوابكم يا أهالي الدايرة تصرفوا عكس ذلك، وكأنهم هم وحدهم اللى عارفين الفولة وداهنين الهوا دوكوا.. وعلشان كما قلت لكم قبل كده إن البرلمان والحكومة راسين في طاقية.. راح نوابنا يؤكدون أن الجزر سعودية.. طب ليه يا ابنى انت وهو قلتوا إنها سعودية.. يقولك الحكومة عندها مستندات، وإحنا مش هنعرف اكتر من الحكومة.. وماحدش يقنعنى أن الحكومة ممكن تعمل حاجة تضر البلد. طب ياسيدى انت وهو مش كنت تيجى تاخد رأينا.. طب خد رأى زمايلك في البرلمان اللى بيقولوا إن الجزر مصرية.. يقولك لأ.. دول نواب أصحاب أجندات غير وطنية عموما يا أهل دايرتى.. الجزر دى مصرية حتى لو راحت للشقيقة السعودية.. وحتى لو نواب دايرتنا خالفوا زمايلهم في البرلمان وقالوا إنها سعودية.. وحتى لو كانت الحكومة والبرلمان راسين في طاقية.. هتفضل مصرية.. وأدينا منتظرين الرأى النهائى في الحكاية دية! مع تحياتى: أخوكم "نزيه صندوق عبد المتعال الناخب" الشهير بالبااارلمنجى.. نائب ساقط ببرلمان 2016
