البااارلمنجى: نائب آخر لطافة.. بيطالب بتحويل التلاميذ لعمال نضافة

عشنا وشفنا برلمان العجب.. النواب بيتكسفوا من الحكومة.. بيحسسوا عليها خوفا من غضبها عليهم.. الآية بقت مقلوبة.. والغالبة بقت مغلوبة.. وطوبة على طوبة خلى العركة منصوبة
أنا بقى جمعتكم النهاردة يا أهل دايرتى علشان أوريكم العجب العجاب.. أوريكم مدى استظراف النواب.. واستخفافهم بالشعب شيوخ وأطفال وشباب.
نائب فاضى وعايز يعمل قاضى.. النائب تعرض في اليومين اللى فاتوا لهجوم نال من سمعته، وبقى شكله مش حلو قدام أهل دايرته.. قوم إيه.. عايز يقول أنا هنا.. وأنا ليا طلبات عند الحكومة.. أنا بشتغل أهه.. وبعارض أهه زى زمان.
قوم إيه يطالب الحكومة بتدريب أطفال المدارس على أعمال النظافة.. أي والله قال كده.. البيه النائب بتاع دايرتنا ساب كل همومنا والقرف اللى إحنا عايشين فيه وبيطالب الحكومة بالاستعانة بأطفال المدارس في تنظيف الشوارع.
حد منكم هيقولى إن سعادة النائب معاه حق لأنه شايف أن المدارس ملهاش أي ستين لأزمة أصلا، وكده كده التعليم في مصر فاشل.. وأنا بقى هرد عليه وهقوله ياخى أوكا.. ده نائب آخر لطافة.. بيطالب بتحويل التلاميذ لعمال نظافة.. وقال على رأى المثل "قال له علمنى الهيافة.. قال له تعالى في الهايفة واتصدر".. وسعادة النائب بيتصدر ويطالب بتهييف التلاميذ وتهييف مستقبلهم وتهييف مدرسيهم ومدارسهم ووزارة تعليمهم.. طب قولى بقى ياسيادة النائب.. هنجيب منين مدرسين خريجى أعمال نظافة علشان يدربوا التلاميذ على تنظيف الشوارع؟!.. طب المدرسين دول هيكونوا خريجين إيه بالضبط؟!
عموما واضح أن نواب دايرتنا تأكدوا أن دورهم داخل البرلمان أصبح "فستك".. فبيتصرفوا تصرفات مش عايز أقول إنها هايفة.. لأ دى تصرفات واحدة من جوزها خايفة
عموما يا أهل دايرتى.. اشربوا بقى.. هي دى نتيجة اختياراتكم.
مع تحياتىأخوكم: "نزيه صندوق عبد المتعال الناخب" الشهير بالبااارلمنجى..
نائب ساقط ببرلمان 2016