البااارلمنجي: نواب دايرتنا اللُطاف.. ماشيين معانا خلف خلاف

واضح أننا ملناش خاطر عند السادة نوابنا المحترمين.. أي والله زمبؤلكم كدا.. دا ما حصلش ولا هيحصل أننا نشوف برلمان بالشكل ده.. سنة كاملة مرت علينا وإحنا بنستنى من البرلمان يحسسنا أنه بيمثلنا قدام الحكومة.. سنة 2016 راحت بحلوها ومرها وكان نفسنا في نائب واحد يستجوب وزير علشان خاطرنا لكن دون جدوى.
عموما يا أهل دائرتي الكرام.. أنا جمعتكم النهارده علشان أفكركم أن سنة 2016 خلصت خلاص.. ومافيش ولا وعد من وعود نواب دايرتنا تم تنفيذه..
مافيش ولا هّم من همومنا تمت مناقشته تحت قبة البرلمان.. وكأن دائرتنا غير موجودة على أجندة المجلس الموقر.
حتى النائب اللى ربنا نفخ في صورته وحب يثبتلنا أنه بيعرف يطالب الحكومة بحل مشكلات الدايرة.. راح يطلب منها أن تقوم بعمل كشف العذرية على بنات الجامعات.. طب إحنا أكلنا إيه وشربنا عليه ميه من كشف عذرية البنات؟!
لأ دا كمان نائب دايرتنا التاني راح يطالب الحكومة بإعفاء أبناء المقتدرين من أداء الخدمة العسكرية مقابل 50 ألف جنيه تتحط في صندوق تحيا مصر.. قال يعني بكده هو بيحل مشكلات أبناء الدايرة.. طب إيه علاقة هذا بذاك يا نائب يا عكاك.
أما نائبنا المحترم الثالث اللى طالبناه بعدم رفع الدعم عن أبناء دائرته فذهب ليطالب البرلمان بعدم رفع الدعم عن نفسه وعن زملائه بالبرلمان وتناسانا تماما وكأنه يخرج لنا لسانه عن بُعد.. وعندما طالباه بتوفير الأدوية لأبناء الدائرة المعدمين.. راح يطالب الحكومة بتوفير الأدوية غير الموجودة بمصر لزملائه النواب وأسرهم وكأنه يعاند أهل دائرته!!
وهكذا مر أول عام للسادة نواب دايرتنا تحت قبة البرلمان وكأنه لم يكن.. مر عام ونواب دايرتنا اللطاف ماشيين معانا خلف خلاف.. فهل لنا أن نتعشم فيهم في العام الجديد 2917 ؟!.. سؤال سوف تجيب عنه الشهور القادمة.
مع تحياتي: أخوكم "نزيه صندوق عبد المتعال الناخب" الشهير بالبااارلمنجي.. نائب ساقط ببرلمان 2016.