أنا بقى جمعتكم النهارده يا أهل دائرتي الكرام علشان اتكلم معاكم في موضوع مختلف.. وهوريكم نتيجة اختياراتكم لنواب دايرتنا عملت فينا إيه.. لكن في البداية تعالوا نتفق مع بعض على أن فيه ناس بتموت من الإرهاب ورغم أنهم من أبنائنا الضباط والجنود إلا أن وزارة الداخلية ما زالت ليس لها خطة واضحة لحماية أبنائها قبل حماية الشعب.. وناس بتموت من المرض بسبب تقصير وزارة الصحة في توفير العلاج الخاص بالأمراض المزمنة والخطيرة بأسعار في متناول المواطن المريض.. وناس بتموت من الجوع ووزارة التموين بتوفر لهم البامبرز على بطاقات التموين بدلا من الأرز والسكر والزيت.. وناس بتموت من خيبة الأمل في نوابهم اللى اختاروهم وصدقوا وعودهم بأنهم هيكونوا لسانهم المفوه تحت قبة البرلمان!! الناس اللي بتموت دي كلها من وجهة نظري المتواضعة ذنبها في رقبة السادة نواب دايرتنا.. ليه بقى؟!.. أنا هقولكم ليه وبالراحة كدا وبدون عصبية.. دا إحنا ماشفناش أي عضو من نواب دايرتنا خرج وطالب بمحاسبة وزير الداخلية على ما يتعرض له أبناؤنا الضباط من هجمات إرهابية.. ما فيش نائب منهم قدم استجوابا لوزير التموين يحاسبه عن تقصيره في توفير السلع الغذائية الضرورية لحياة أبناء الدائرة الفقراء.. ما فيش نائب حاسب الوزير على عدم قدرته على ضبط الأسعار في الأسواق.. ما فيش نائب منهم طالب بإقالة وزير الصحة بعد مهزلة اختفاء أدوية علاج الأمراض الخطيرة والمزمنة وارتفاع أسعار الموجود منها!! نواب دائرتنا يا سادة مأنتمين مع وزراء الحكومة على حساب احتياجاتنا نحن أبناء الدائرة.. كل اللي بيعملوه إنهم بييجوا في الفارغة ويتصدروا.. أي والله زمبقولكم كدا.. سايبين الناس والضباط اللى بتموت من الإرهاب والفقر وبيطالبوا الحكومة بتعديل قانون الحضانة.. وتطبيق قانون مساواة المرأة بالرجل في حالات الزنا!! نوابنا اللى اخترتوهم ولم تختارونني أنا ابنكم البار بكم بيلعبوا بيكم الكورة.. وأنا أقولها لكم بأعلى صوت: زغرتي يا سومة.. نوابنا مأنتمين مع الحكومة! مع تحياتي: أخيكم «نزيه صندوق عبد المتعال الناخب» الشهير بالبااارلمنجي.. نائب ساقط ببرلمان 2016.
