أطرف المواقف بين الأزواج.. مروة: «هزار جوزي كله هزار بوابين».. هدير تلقي «صاروخ» على زوجها داخل الحمام.. سارة: «كسرلي دراعي عشان حدفته بالمخدة».. ودينا: «صحبتي لزقت شفايف جوزها بالأمير»

كشف عدد من السيدات عبر موقع التواصل الاجتماعى «فيس بوك» أطرف المواقف التي جمعتهن بأزواجهن، والتي نتج عنها ردود فعل محرجة من الطرفين.
انفجار السخان
قالت هدير: "جوزى متعود يطول في الحمام ويغني وبصراحة صوته وحش أوى، المهم جه مرة رزل عليا ودخل قبلي وكل ماانادي عليه يغني أكتر لحد ما زهقت جبت صاروخ من اللى بيفرقع ده ومن تحت الباب ورميته وفجأة طفيت النور لقيته بيصرخ ويجري ويقول السخان بيفرقع اجري ياهدير اجري.. وأنا ميتة من الضحك بس بصراحة كلت علقة حلوة في اليوم دا».
دراعي راح بسبب مخدة
وأوضحت سارة: «أنا مرة بهزر مع جوزي وحدفته بالمخدة الرجولة خدته قوي وقام لوالي دراعي ورا ضهري لحد ما سمعته طق وطبعا فضل في رباط الضغط أسبوعين مش قادرة أحركه علشان بس حدفته بالمخدة أومال لو حدفته بصاروخ كان عمل إيه».
«هزار بوابين»
وتابعت مروة: «والله هزار جوزي كله هزار بوابين كله ضرب، ومرة وأنا حامل في 3 أشهر راح شايلني من رجلي ال2 لفوق ودماغي تحت ونفسي اتحاش وكنت هرجع واقولك بموت وهو بيضحك مش فاهمة أنا إيه اللي يضحك في كدة، ولما أزعل يقولي انتي نكد ومايتهزرش معاكي روح ياخي ملعون أبو الهزار اللي بالشكل ده».
أول حمل
وحكت موني: "أنا لسه عروسة وبعدين امبارح عملت تحليل حمل طلعت حامل الساعة 8 الصبح وفرحت قوي وطلعت من الحمام بصرخ من الفرح ونطيت على السرير وفضلت أقول أحمد أحمد صحي مفزوع وكان شكله فظيع هههههههه وقالي مين فيه إيه مين مات روحت قولتله مات إيه أنا حامل راح قالي حامل إزاي لأنه يا عيني ماكنش فايق ولما فاق قالي الحمد لله إنك حامل قلتله فرحان يا حبيبي قالي لا بس أنا قطعت الخلف بسببك خلاص".
وقالت إيمان: "كنا رايحين جنينة الحيوانات نزلني قدام الجنينة وخد العيال والأكل وجري بالعربية".
وأضافت رودي: "جوزي دايما لما يكون جاي من برة يقول بسم الله الرحمن الرحيم وجيت سمعت صوته على السلم وقعدت ورا باب الشقة وأول ما فتح الباب لسه بيقول بسم خضيته من كتر الخضة فضل معلق عليها بس يومها أكلت ضرب".
وأكدت دينا: "مرة وحدة صاحبتي بتصحي جوزها علشان يخرجوا مش راضي يصحى راحت جايبة الأمير وحطيته على شفايفه طبعا لزق، لما صحي من النوم فكر أن هو اتشل وهي تقوله علشان مخرجتناش وبعدين هو مصدوم وبعدين قالتله إنه أمير وغسله بماية سخنة على ما عرف يفك شفايفه".