بالصور| "قصة مثيرة".. هذا الشخص ممنوع من دخول نادي الزمالك نهائياً

سردت إحدى عضوات نادي الزمالك، حكايتها مع أمن القلعة البيضاء يوم الجمعة الماضي، حيث منعوا زوجها من دخول النادي بسبب طول شعره.
وينشر "الفجر الرياضي" مشكلة إسراء سليمان، وكل ما يلي على لسان صاحبة المشكلة:-
"موقف ظريف جدا حصل لي.. انا عضوة في ‫#نادي_الزمالك‬ بس بقالي كتير اوي مش بروح علشان الزحمه و انه بعيد عن بيتي، المهم يوم الجمعه اللي فاتت جوزي قرر اننا نروح نجدد الاشتراكات و اضيفه هو والاولاد على عضويتي علشان الصيف و كمان حفتح فرع جانبنا.. المهم روحنا واحنا داخلين من البوابه الامن سألني عى الكارنيهات اديتهاله قالي دي قديمه قولتله انا داخله اجدد و اضيف جوزي و اولادي.. ف رجل الامن بص لجوزي كده وقاله حضرتك ممنوع تدخل!
فبيقوله ايوة ما انا داخل علشان ادفع فلوس و اضيف نفسي على عضوية مراتي...
قاله حضرتك ممنوع دخول الشعر الطويل.
وهنا كانت الصدمه! انا فكرته الاول بيهزر فضحكت و قولتله حضرتك بتتكلم بجد!
قالي دي تعليمات الادارة.
قولتله تعليمات الادارة بتقول ايه حضرتك؟!
قالي بتقول ممنوع دخول الشعر الطويل و اللي لابسين شورطات...
طبعا انا ضحكت تاني لاني بجد حسيت انه ده مش كلام ناس طبيعيين!
قولتله ايه ال اي كلام ده انا عايزة اقابل حد من الادارة
قالي حضرتك احنا بنفذ التعليمات و الاداره حضرتك ممكن تقابلي حد و تتكلمي معاه..
فجوزي قاله طيب دخلني علشان اقابل حد جوه اتفهم معه و افهم الكلام ده بجد ولا هزار...
قاله لا حضرتك مش حتدخل.
المهم جوزي قالي ادخلي انتي قابلي حد وانا حستنى لما اشوف اخرتها..
عايزة اقولك يا عايدة انا قابلت 3 اشخاص جوة ولا واحد فيهم عارف يفتح بقوه! كل ما اسأل حد يضحك و يقولي دي تعليمات المستشار رئيس النادي... طب.ده اسمه كلام.. يعني اللي بيحط تعليمات دي اكيد ليها سبب او حجه او اي حاجه... دول ييطبقه كلام لا يصدقه عقل اصلا!!
المهم واحد من 3 اللي قابلتهم قالي حضرتك ممكن نكلم مدير الامن يدخله انهارده استثناءا لحد ما تجديدي وتعمليله العضويه و بعدين تاخدي معاد مع المستشار وتقابليه وتتكلمي معاه..
قولتله وانا فاضيه اوي والمستشار فاضي اوي لدرجة انه حيقابلني و يعمل لجوزي استثناء انه يدخل النادي وشعره طويل!!!!!
قالي لا انتي ممكن تقابليه علشان يفهمك التعليمات دي ليه ..
مكنتش مصدقه نفسي ف بصت له وقولتله انا اسفه ضايعة وقتي و وقتك...
وعلى فكرة انا كل الكلام اللي قلته ده بجد و مش هزار و حصل معايا انا شخصيا يوم الجمعه اللي فاتت 8-5-2015 الساعه 1 الظهر".