أموت وأعرف ليه بنعمل فتكين أوى ولما بنتسأل على حاجة ونبقى مش فاهمنها أو عارفنها بنعمل ناصحين وبنقول أى كلام فى كلام المهم إننا مانقلش ما نعرفش، فقد عزمتنى خالتى على الغدا فى أحد الأيام، وقعدت توصفلى العنوان، ولما غلبت معاى قالتلى إلى يسأل ما يتوهش قولتلها ماشى وبدأت رحلتى وصلت للعباسية فوقفت دقيقتين وسألت عسكرى هو شارع نافذة شيم الشافعى فين لقيته سكت دقيقتين قولت بس كده أنا وصلت طالما ركز يبقى هيجمع المعلومات فى دماغه ويدينى خريطة أجدع من الوصفة إللى بتوصفها فى العربية (GPS)) وفجأة لقيته قالى بصى يا أستاذة أنتى هتمشى علطول هتسيبى أول يمين وتانى يمين وعند تالت يمين هتدخلى شمال هتلاقى كوبرى متطلعوش وهتكملى هتلاقى نفق صغير انزليه وهناك هتلاقى ألف مين يدلك غمرتنى الفرحة والسعادة مش عشان عرفت الطريق ولا عشان خالتى وحشانى بس عشان تخيلت نفسى وصلت وباكل الرقاق باللحمة المفرومة وطبعا أدتها بنزين ومشيت على نفس الخلطة قصدى الوصفة إللى قالهالى الأفندى بس المصيبة أنى ملقتش 3 يمين دول كلهم كانوا شمال سألت واحد تانى معلش يا كابتن أصلى مش من هنا وسألت عسكرى على شارع نافذة شيم الشافعى وحكتله الوصفة قالى: لأ حضرتك التى دخلتى. من هنا ليه وبعدين هنا اليمين مسدود تلاقيه كان يقصد شمال بس هو أشول قولتله طب لو تسمح أروح إزاى من أقصر طريق راح مشاور وقايلى بثقة شايفه حضرتك العمارة البنى إللى هناك دى قولتله كل العمارات فى مصر بنى قالى الطويلة يا أستاذة إللى بعيد دى إللى شباك الدور الرابع إللى فيها شيش مش (الألومنيوم) آه شيفاه قالى من هناك حضرتك هتمشى طوالى هتلاقى تقاطع الأول عديه وعند التقاطع التانى هتدخلى (يمين) من جنب الإشارة. شكرته ومشيت ولفيت لفة ولا لفة أم العروسة وروحت هناك سألت لو سمحت فين نافذة شيم الشافعى لقيت النوع الثالث من الفتايين وهو فاعل الخير وقبل ما أكمل الجملة لقيت طرف تانى دخل فى الموضوع وقالى حضرتك عايزة نافذة شيم الشافعى قولتله آه قالى اسألى الفكهانى إللى على آخر الشارع مشيت بالعربية قلت هانت سألت الفكهانى لقيت عنده جماعة قعدوا يتخانقوا على مين إللى هيوصف، وكل واحد عنده وصف شكل، إللى يقولى يمين فى 2 شمال وانزلى اركبى من هناك أتوبيس 18 بشرطة لأن الشارع مكسر وإللى يرد يقوله لا لا لا يا حجاج فيه طريق أسهل امشى با بنتى طوالى لغاية متلاقى حارة مكتوب عليها عثمان الناجى واسألى من هناك فضلت طوالى طوالى ولقيت واحد قالى شكل حضرتك تايهة قولتله فعلا والله قالى إنتى مش من البلد قولتله آه. قالى روقى بس عايزة تروحى فين قولتله العنوان قالى اااااااا م طيب هو قالك فين؟ وده طلع النوع الخامس إللى هو الناصح شرحتله قالى لا حضرتك امشى طوالى طوالى طوالى لا يمين ولا شمال هتلاقى نقطة هناك هتبقى وصلتى قولتله حضرتك متأكد قالى يا أستاذة أنا شغلى هناك وعلىَّ الطلاق هناك قولتله شكرا وفضلت طوالى طوالى طوالى لغاية ما لقيت قدامى يافطة. أهلا بكم فى محافظة بنها وإللى طلع عليها ساعتها يا ترى مرات الراجل إللى وصفلى وحلف عليها بالطلاق كده تم طلاقها طلقة بائنة لا رجع فيها ولا ده طلاق معلق؟؟؟؟
