أحلام بكار.. حلقة رقم (32).. الإخوان والدراويش فى حلقة الذكر!

عبر اتصال هاتفى حدد "بكار" مع "حمزاوى" موعدًا للقاء، والتقيا بعد تمام الساعة فى حديقة الأورمان بالجيزة، حيث معرض الزهور الدولى السنوى الذى تقيمه وزارة الزراعة بالتعاون مع إدارة الحديقة.
"بكار": ليه اخترت المكان ده يا عم الرومانسى؟
"حمزاوى": هو فيه حد مابيحبش الورد؟ إنت نفسك مابتحبش الورد؟
"بكار": طبعًا بحبه، ده الورد جميل، كائن حى بيعيش فى سلام وبيفيض على الدنيا بهجة وسحر، وبيخلى الحياة أجمل.
"حمزاوى": بس حتى الورد مابيسلمش من العدوان والأذى؛ عدوان الأطفال اللى بيقطفوه، وتجار الورود وبائعيه، ده غير الآفات الضارة، يعنى مفيش كائن بيعيش دايمًا فى سلام.
"بكار": رغم إن كلامك منطقى إلا إنى لامح فيه مرارة، وفى نبرة صوتك حزن.
"حمزاوى": ده شىء طبيعى جدًّا فى حال مصر، من يوم ما انخبطنا فى عقلنا وانتخبنا الإخوان ضيّعوا البلد، ماكدبش المثل اللى قال: إدى العيش لخبازه ولو أكل نصه.
"بكار": ماهى دى الحقيقة فعلا، شوفت يوسف زيدان قال إيه النهاردة؟
"حمزاوى": قال إيه؟
"بكار": قال لو اترشح شيخ حارة قدام مرسى والإخوان الشعب المصرى حيختار شيخ الحارة.
"حمزاوى": ده لو شيخ منصر مش شيخ حارة المصريين حيختاروه؛ لأنه أكيد حيكون عنده شىء من العقل اللى مش موجود عند الإخوان.
"بكار": أنا حلمت امبارح إن مصر بقت حلقة ذكر كبيرة مليانة بالدراويش، وشوفت بديع والشاطر والبلتاجى والعريان والكتاتنى وأبو إسماعيل ومحمود غزلان ومحمود عزت ومحمد مرسى لابسين لبس الدراويش؛ جلاليب واسعة مهترئة مزركشة، وكل واحد فيهم حاطط على صدره وحوالين رقبته شوية سِبَح، وعمالين يلفوا حوالين بعض وبيرطنوا.
"حمزاوى": ماهمه فعلا شويه دراويش مجاذيب، كل اللى بيعملوه بيقول كده، وكل قراراتهم كده، إنت ماجبتش حاجة من عندك، دى الحقيقة المرة، مصر بقت تحت حكم الدراويش المجاذيب المهابيل.
"بكار": وبعدين حندروش إحنا كمان؟
"حمزاوى": ماينفعش إحنا لازم نفضل بعقلنا، ده الشىء الوحيد اللى فاضل لنا.
"بكار": إنت مش خايف من الحرب الأهلية؟
"حمزاوى": الجيش مش حيسمح بحرب أهلية.
"بكار": وتهديد أبو إسماعيل للجيش؟
"حمزاوى": ده كبيره كلام، السن له حكمه، ماتدقش على كلامه، إنت مش بتقول إنك شوفته فى حلقة الذكر فى حلمك لابس درويش؟ يبقى خلاص إنت قيّمته، كده ماتشغلش بالك باللى بيقوله، ده تأثير لفحة هوا شديدة أو برد.
"بكار": وحكاية النائب العام واستدعاء باسم يوسف؟
"حمزاوى": مش حيقدروا يعملوله حاجة، دول بيحاولوا يخوّفوه بس مش أكتر من كده، وباسم مش بيخاف ماتقلقش عليه. أكيد طقم المحامين اللى معاه عامل حسابه كويس على يوم زى ده، ده غير الإعلام اللى حيقف فى ضهره والصحافة، واحنا وكل اللى بيحبوا مصر من قلبهم.
"بكار": هو النائب العام ده مش مكسوف على دمه؟
"حمزاوى": ده إخوانى، يعنى الكسوف ما يعرفلوش طريق، هو كان مرسى اتكسف قبل كده من قراراته الفاشلة ولا من قراراته اللى بيرجع فيها؟ يا عم وحّد ربك.
"بكار": لا إله إلا الله.
"حمزاوى": محمد رسول الله.
"بكار": أخدت بالك من حملة التشهير اللى شنها الإخوان على الثوار والمعارضة وجبهة الإنقاذ؟!!
"حمزاوى": ده سفه، وقمة الإفلاس والاضمحلال السياسى، ده إجهاض للثورة.
"بكار": الثورة دى لازم تكمل يا "حمزاوى".
"حمزاوى": حتكمل بإذن الله، رغم أنف الإخوان حيقعوا حيقعوا، كلها مسألة وقت مش أكتر ولا أقل، الصبر طيب.
"بكار": والبلد اللى بتغرق؟
"حمزاوى": ماتنساش "ادخلوها بسلام آمنين".
"بكار": مش ناسى، بس البلطجة زادت والناس مابقتش فى مأمن على نفسها.
"حمزاوى": ده فى إيد الداخلية، والإخوان سايبين الداخلية متراخية لهدف فى نفسهم.
"بكار": وزير الداخلية لازم يتغير.
"حمزاوى": مش وزير الداخلية بس اللى لازم يتغيير، حاجات كتير لازم تتغيير، أولها الدستور التفصيل بتاع ترزية الإخوان، والنائب العام كمان، ومجلس الشورى الإخوانى لازم يتحل.
"بكار": وفكرك الإخوان حيوافقوا بكده؟
"حمزاوى": عنهم ما وافقوا، لازم إحنا نجبرهم على كده.
"بكار": إزاى؟ وبإيه؟
"حمزاوى": باتحادنا وقوة إرادتنا وعزمنا وثباتنا وإصرارنا وعدم التناحر.
"بكار": يا ريت يا "حمزاوى" يا ريت.
"حمزاوى": شايف جمال الورد!! بكره مصر ترجع وردة وتفتح من تانى يوم ما يرحل الإخوان.
"بكار": ده حيكون يوم عيد لازم مصر كلها تحتفل بيه.
"حمزاوى": أكيد يا "بكار" أكيد، يلا بقى نخرج نشرب حاجة.
"بكار": يلا أنا عازمك على حمص الشام فى الحسين.
"حمزاوى": وانا قبلت العزومة، يلا بينا.
"بكار": يلا يا صاحبى.