أحلام بكار.. حلقة رقم (26).. مرسى لازم يرحل.. مرسى لازم يرحل

فور اتصال سريع من "بكار" ل"حمزاوى" على الهاتف المحمول نزل "حمزاوى" للقاء "بكار" على مقهى الحرافيش فى أول شارع فيصل:
"بكار": الدنيا عاملة معاك إيه يا "حمزاوى"؟
"حمزاوى": زى اللى عملاه معاك.. مفيش جديد، الجديد يمكن يكون عندك انت.
"بكار": الجديد دايما عند جبهة الإنقاذ.
"حمزاوى": إيه الجديد اللى عندهم؟
"بكار": هو مش جديد أوى هو قديم.. بس جديد.
"حمزاوى": انت حتبطل أحلام يا "بكار" وحتقول فوازير؟
"بكار": لا فوازير ولا حاجة، أنا قصدى أن اعتراضهم هو هو، قديمه زى جديده، بس اللى زايد هو حرقتهم وغضبهم وسخطهم اليومين دول اللى باين فى تصريحاتهم.
"حمزاوى": قالوا إيه تانى وصرحوا بإيه؟
"بكار": اسمع يا سى "حمزاوى".. البرادعى قال: مرسى لازم يرحل ضمنيًّا من سياق حديثه وتغريداته على تويتر، قال بالحرف الواحد: على النظام غير القادر على توفير الأمن أن يرحل؛ لأن المواطنين صاروا ينفذون حد الحرابة بأنفسهم، وعلى النظام غير القادر على أن يكفل الأمن عليه أن يرحل، ولقد فاض الكيل، ده جدك البرادعى.
"حمزاوى": حمدين صباحى قال إيه؟
"بكار": صباحى قال إن مرسى مستبد والإخوان انتهازيون.
"حمزاوى": فيه حد تانى قال حاجة؟
"بكار": آه فيه.
"حمزاوى": مين؟
"بكار": أبو الفتوح.
"حمزاوى": إيه هو أبو الفتوح انضم لجبهة الإنقاذ؟
"بكار": لا يا أخى ما انضمش، مع إنه لو انضم حيكون مكسب ليهم، بس قال: مرسى فشل فى إدارة البلاد، وإن السولار بيهرب؛ لأن الحدود غير مراقبة، والمنافذ أيضًا، وإن وجود الانفلات الأمنى وغلاء الأسعار وتزايد البطالة وإهدار الدماء، كل هذه أشياء يجب محاسبة مرسى عليها، وكل هذا يعنى إنه ليست هناك دولة، وعلى مرسى أن يعلم أنه لن ينجح إلا إذا كان الشعب معه وملتفًّا حوله، وهذا لم يعد، فعلى النظام أن يرحل.
"حمزاوى": كل ده احتقان؟
"بكار": الإقصاء بيعمل أكتر من كده.
"حمزاوى": الحمد لله إنه ما زال إقصاء مش إخصاء.
"بكار": مش بعيد بكره يحصل إخصاء سياسى.
"حمزاوى": إحنا مش حنسمح بكده.
"بكار": فكرك نعمل إيه؟
"حمزاوى": نسمع أم كلثوم.
"بكار": إنت بتهرج؟
"حمزاوى": اكسر الملل.
"بكار": طيب اطلبلى واحد سحلب بالمكسرات.
"حمزاوى": أيوه كده، فكها.. سحلب بالمكسرات، وأم كلثوم، وأنا هشرب موز باللبن، اشمعنى المرشد مدلع نفسه وبياكل فى تشبيلز؟
"بكار": على قولك هو أحسن مننا فى إيه؟
"حمزاوى": هو معاه مرسى.. الريس مرسى.
"بكار": واحنا معانا ربنا اللى أقوى من الكل.
"حمزاوى": ونعم بالله.