أحلام بكار.. حلقة رقم (25).. ودقت طبول الحرب فى المقطم

الأحدلث المتلاحقة جعلت لقاء بكار وحمزاوى شبه يومى بعد أن كان أسبوعيًا
بكار: شوفت اللى حصل ياحمزاوى ؟ حمزاوى: ايه اللى حصل يا بكار ؟ بكار: الحرب قامت فى المقطم بين الإخوان والمتظاهرين أنا حقولك إيه اللى حصل بالظبط وازاى كان حماس الإخوان شديد فى ضرب المتظاهرين أول شىء غزلان مسك الميكرفون وقال: ودقت طبول الحرب يا معشر الإخوان يافرسان الدعوة الجبل ورائكم والثوار أمامكم.
هيا يارجال السيفين واعدوا
اليوم يومكم
النصر لنا وإن ينصركم الله فلا غالب لكم
اقتلوا الكفرة الزنادقة المتظاهرون الثوار المأجورون الفلول
اليوم عاد إبرة الأشرم من جديد ليهدم كعبتكم مكتب الإرشاد أيها الإخوان المسلمون
انقضوا عليهم اضربوهم اسحلوهم أذيقوهم عذابنا
لا تفرقوا بين ذكر وأنثى اضربوا الجميع بيد من حديد
ارجموهم لو استطعتم لا تأخذكم بهم رحمة
أنهم أعداؤنا ومعطلى مسيرتنا
إن مس مكتب الإرشاد سوء فأنتم لستم إخوانًا ولا مسلمين
هيا يارجال أشعلوا النيران ودقوا طبول الحرب
ولو استدعى الأمر ألقوا المولوتوف والحجارة
ألقوهم من فوق الجبل إنهم بهم مس وخبل يا جند الإخوان
المرشد يؤازركم ويبارك خطواتكم
هجوم هجوم هجوم
حمزاوى: ياراجل معقوله توصل لكده ؟
بكار: واكتر من كده انت ماتعرفش الإخوان بيكرهوا المتظاهرين قد إيه دول بيقولوا عليهم كفرة
حمزاوى: ياساتر هو العبد بقى يكفر العبد
بكار: لأ الإخوانى بيكفر غير الإخوانى ده طبعهم ياصاحبى مش حيشتروه من بره
حمزاوى: الناس حوالين مكتب الإرشاد فى المقطم مستائه ومالهاش ذنب فى اللى بيحصل ده
بكار: الأمن المركزى غرق المقطم بقنابل الغاز والناس اتخنقت
حمزاوى: دى حتبقى حرب شوارع
بكار: هى لسه حتبقى ما هى بقت خلاص ابتدت الحرب على "تويتر وفيس بوك" واتنقلت للشوارع
حمزاوى: تلاقى الداخلية مشدودة من الشاطر وغزلان ومرسى
بكار: ده أقل شىء ممكن مرسى يعمله عشان يرضى بديع وغزلان والشاطر
حمزاوى: الدنيا لازم تهدا مصر كده حتولع ولازم الناس تبطل تستنجد بالجيش لازم يحصل وفاق بين الأطياف كلها مش حل أن الجيش يحكم تانى حكم الجيش معناه فشل الثوره الجيش كفايه عليه يحمى الحدود والمنشآت الحيوية زى قناه السويس وإذا دعت الضرورة يعدل الأوضاع فى مدن القناة أكتر من كده غلط
بكار: انت عاوز الجيش يبعد عن المشهد السياسى ؟
حمزاوى: ده اللى لازم يحصل المشهد السياسى ده بتاعنا احنا واحنا لازم نتوافق
بكار: والكلام ده مرسى فاهمه ؟
حمزاوى: فاهمة مش فاهمة لازم إحنا نجبره عليه عشان البلد ماتضعش منه ومننا
بكار: ده مستحيل مع غرور الإخوان انت بتحلم حمزاوى: لازم الحلم ده يكون حقيقه
بكار: ازاى نحوله لحقيقه ؟ ازاى ؟
حمزاوى: مقالاتنا لازم تتغير وإعلامنا كمان لازم يتغير ونبطل نشتم بعض ونغلط بعض ونطلع فى عيوب بعض لازم نحب بعض الحب والاحترام والثقة هما اللى حيحلوا كل مشاكلنا ومن غيرهم مفيش حل ولا ربط.
بكار: انا حخلى الجرسون يشغل لك أغنية حب ايه اللى انت جاى تقول عليه لأم كلثوم
حمزاوى : انت بتتريق عليا يابكار ؟
بكار: ما انت تغيظ ياحمزاوى حب ايه اللى انت جاى تقول عليه هى الإخوان حتعترف بالحب ؟ ولاتفهم فى الحب ؟ خلى الحب للحبيبة اللى زينا
حمزاوى: نحاول علشان نكون سباقين وربنا مايحاسبناش على شىء كان فى استطاعتنا نعمله وماعملناهوش همه مش عارفين إن ربنا قال "وإن جنحوا للسلم فاجنح لها"
بكار: تشرب ليمون ؟
حمزاوى: خلاص انا مش حتكلم عن الاخوان ولاحشرب ليمون انا حشرب يانسون صوتى تعب من الكلام
بكار: انا بقى حشرب ليمون انا حاسس إن الجو حر
حمزاوى: براحتك اشرب اللى يعجبك بس بكره تقول حمزاوى قال
بكار: روق روق بكره تتعدل
_ وصدحت أم كلثوم برائعتها: حب إيه فضحكا هما الاثنان _