بالصور.. مهندس يشعل «فيس بوك» ب«60 سؤالا» لاختبار العروس.. أحمد: «شايفة نفسك إيه بعد 5 سنين».. إيمان: «من سيربح المليون أسهل».. سلمى: «هعيط».. وندى: «هي درجة النجاح من كام»

تداول نشطاء موقع التواصل الاجتماعى "فيس بوك"، منشورا جديدا عبارة عن 60 سؤالا، وضعه مهندس مصرى لاختبار العروس قبل الخطوبة، وتقييمها «هل تصلح أن تكون شريكة حياة أم لا»، الأمر الذي أزعج الكثيرين واعتبره إهانة حقيقية للمرأة.
وكانت الأسئلة كما يلى:
1 - انتى سعيدة في حياتك ؟.. "مؤشر للحالة النفسية وطريقة تعبيرها عن الذات".
2 - نفسك تحققى إيه في حياتك ؟... "رؤيتها للمستقبل - طموحها ايه - شايفة الدنيا ازاى".
3 - كنتى مرتبطة قبل كده ؟... "تاثير التجارب السابقة عليها بيبقى واضح من رد فعلها".
4 - اتخرجتى سنة كام ؟.... "منتبهة لسنين عمرها وبتحسب حساب الوقت وإلا لا".
5 - دخلتى تخصصك برغبتك ولا لا ؟... "حياتها نتيجة قرارات خاصة ولا نتيجة القدر".
6 - إيه موقعك بين اخواتك الكبيرة ولا الصغيرة ولا في النص ؟... "الترتيب بيفرق".
7 - حابة تسافرى برة مصر ولا نفسك تكملى فيها ؟... "الرغبة في الانطلاق وأيضا حب الوطن".
8 - ايه مدى تحملك إننا نختلف في الرأى وفى الآخر أخد قرار عكس رغبتك ؟... "الطاعة".
9 - حافظة كام جزء من القرآن ؟.
10- الورد اليومى بتاعك من القرآن كام صفحة ؟.
11- أكثر عدد من الأجزاء من القرآن للقراءة في يوم واحد؟.
12- مين أقرب حد ليكى في الأسرة بابا وإلا ماما والا حد من إخواتك؟.
13- مين اقرب أصحاب بنات ليكى في الكلية وهل بتتواصلوا بعد الكلية؟.
14 - هل أقرب أصحاب بنات ليكى متجوزين ولا لا؟.
15 - هل لديكى أصحاب شباب فترة الكلية؟ أو زملاء عمل؟.
16 - هل زملاء العمل معاهم رقم موبايلك؟.
17 - هل المكان شغلك فيه اختلاط؟.
18 - هل في الشغل ممكن تبقى لوحدك مع شباب ومفيش بنت غيرك؟.
19 - لو ليكى فلوس في البنك بتقبلى الفائدة بتاعتها وإلا لا ؟ ورأيك هي حلال ولا لا ؟.
20 - إزاى تقدرى تفيدى الناس أكثر بالعلم والا بالفلوس؟.
21 - أمتى الفلوس تبقى أهم من العلم وأمتى العلم يبقى أهم من الفلوس؟.
22 - إيه هواياتك إلى بتحبيها؟.
23 - إيه أكثر حاجة انتى موهوبة فيها؟.
24 - هل من خطتك تبقى مستقلة ماديا عن شريك حياتك وإلا لا؟.
25 - إزاى تقدرى تحققى التوازن بين الشغل والبيت؟.
26 - إيه أكثر الأماكن إلى بتحبى تروحيها؟.
27 - إيه البلاد إلى انتى سافرتى ليها؟.
28 - إيه أكثر الكتب المؤثرة في حياتك؟.
29 - بتسمعى أغانى؟ وبتحبى تسمعى لمين؟.
30 - مين أكثر الأصوات بتحبيها في القرآن؟.
31 - مين من علماء المسلمين بتحبى تسمعي له؟.
32 - ليكى في السياسة؟.
33 - إيه رايك في الاحداث إلى مرت بيها مصر السنين الأخيرة؟.
34 - إيه أكثر مشكلة قابلتك في حياتك وحلتيها إزاى؟.
35 - إيه أصعب يوم في حياتك؟.
36 - إيه أجمل يوم في حياتك؟.
37 - قولي لى 5 أحلام نفسك تحقيقهم في حياتك ومهم أحققهم معاكى مش لوحدك؟.
38 - أمتى العلاقات بتنجح وأمتى بتنتهى؟.
39 - إيه مواصفات فتى أحلامك؟.
40 - بتعرفى تطبخى؟.
41 - بتعرفى تعملى محشى؟.
42 - بتعرفى تعملى بسكوت وقر ؟.
43 - بتساعدى ماما في أكل البيت وإلا هي اللى بتطبخ؟.
44 - بتحبى المطبخ أصلا ولا عشان كل البنات تقريبا بتتعلم؟.
45 - بتحبى الأطفال وتحبى تلعبى معاهم؟.
46 - في الأطفال بتحبى الأولاد أكثر وإلا البنات ؟.
47 - بتلبسى بناطيل؟.
48 - بتحطى مكياج؟.
49 - بتاخدى قراراتك على أساس الحلال والحرام وإلا حسب المجتمع ؟.
50 - بتحبى تبقى مميزة في مظهرك ولبسك وتلفتى الأنظار وإلا تلبسى لبس عادى؟.
51 - بتحبى تخرجى كثير وإلا بتحبى القعدة في البيت أكثر؟.
52 - عندك أصدقاء في حسابك على فيس بوك؟.
53 - لو قلتلك هاتى كلمة السر لحسابك على فيس بوك هتوافقى؟.
54 - ليكى كام حساب على فيس بوك؟.
55 - كام شخص عملتيله بلوك وليه؟.
56 - لو كنت بعتلك إضافة قبل ما اتقدملك هتقبليها ولا لا؟.
57 - إيه أكثر الأسماء إلى بتحبيها في الأولاد والبنات؟.
58 - بتتفرجى على برامج تليفزيون وبتحبى تتابعى الأخبار؟.
59 - بتحبى الشعر؟.
60 - انتى رومانسية أكثر وإلا عقلانية أكثر؟.
وحمل جزء من التعليقات طابع السخرية، بينما اعترض آخرون على التفكير الذي يجعله يقيم المرأة وكأنها تقدم في وظيفة ما أو تجرى امتحانا مصيريا وليست مقبلة على الزواج، فقال عبد الكريم: "كن لها كما تريد أن تكون لنفسك، وكن أنت سببها في أنت تكون سيدة حسن الجمال والخلق والدين وستكسب ملكة تعوضك عن كل ما يهمك".
وأضاف أحمد مصطفى: "شايفة نفسك فين بعد 5 سنين؟"، وتابعت: إيمان عبد اللطيف: "ده من سيربح المليون كان أسهل من كده"، فيما كتبت أسماء شعبان: "طب وإيه الأسئلة اللي انت بتسألها والقعدة بتاخد معاك كم ساعة"، واستكملت: سلمى بدوى: "أنا لو روحت شغل واتسألت الأسئلة دي كلها في الانترفيو هعيط وأقوم أمسح دموعي واضرب اللى سألنى"، واختتمت ندى السيد: "مستر مستر.. هي درجة النجاح من كام".