7 نصائح في التعامل مع "الرجالة"

أولا: إنتى تشوفى كل اللى انتى عوزاه، يعنى نظراته بتقول إنه ولهان وهمساته بتقول إنه هيمان والجو ده اردمى عليه.. طالما هو لسه ماقالش حاجة يبقى مافيش حاجة! .
-ثانيا: زعلانة مقموصة حتولعى إشطة حقك! خدى كفايتك فى العياط والنف والاكتئاب براحتك وبعدها روحيله.. وقولى اللى عندك بلاش شغل ستى وستك ده.
-ثالثا: لو فركشتوا بقى ودى أكتر لحظة بتفقعنى! أرجوكى طلبين مالهمش تالت! أول واحد ماتسمعيش شيرين «قال صعبان عليه ويطمن عليا قلوله لسه عايشة وكل شىء حلو فى عينيا»!! انتى حتمثلى يا بت الكدابة صعبانة عليه ويطمن إيه ده، ولا حيعبرك أساسا وآخرك معاه حيكتب عنك ستاتيس عالفيس بوك إنك كنتى شبه برطمان المربى وخسارة الفلوس والعزايم.. وكل شىء حلو فى عينيكى إزاى برده مش فاهمة ده انتى كل شوية تخشى تشوفى ال last seen بتاعته امتى ولما غير ال pp جالك اسهال - ده لو ماكانش معمولك بلوك لا مؤاخذة ! فماتعشيش الدور أرجوكى.
تانى طلب ولعى فى ميتين أم صحبتك اللى بتقولك «بكرة يجيلك يبوس التراب» أولا لأن ده مش حيحصل، ثانيا عشان مش بعيد هى اللى قالتله إنك ضاربة ورقتين عرفى عشان يسيبك!
-رابعا: كلنا كبنات بنحلم بالراجل الجينتل الراجل إلى يفتحلنا باب العربية ويجبلك ورد وشيكولاتة واللى فاكر أدق التفاصيل فى حياتك.. اللى وانتى ماشية جمبه حاسة إنك ماشية جمب رشدى أباظة.. بس عاوزة أنا أقولك معلومة «رشدى أباظة مات هو وكل أشباهه من الرجال».. شايفة شكل أخوكى أول ما بيصحى وهو بيدور على الشبشب أو أبوكى أول ما بيشوف فاتورة الكهربا!! حبيبتى كل الرجالة كده فوقى وخليكى قنوعة.
-خامسا.. بلاش شغل «مقصودة وموجهة» والله أنا عمرى ما كتبتهم وعايشة عادى أهو جو للتلقيح عموما ده بلاشه مش حياكل معاه عشان هو غالبا عاملك أصلا unfollow.
-سادسا: انتى كبنت دايما مشدودة للولد اللى مابيردش! واللى بيتكلم بطريقة ليها أكتر من معنى! واللى مش حتوصلى معاه لحاجة! واللى مطلع عينك.. إلخ.... ده أنا مش فاهماه الحقيقة يعنى حب مثلا زايد للإثارة أو فضوووول ولا إيه بالظبط! بس فيه عينات سالكة كتير والله ركزى فيهم.
-سابعا: ليه تبقى مجنونة وتحبى واحد مثلا بيحب الهاديين فتعملى نفسك هادية!! أو انتى سمرة وتحبى واحد بيحب البيض فتعملى نفسك لا مؤاخذة بيضة!! مش منطق بصراحة، حبى اللى يحبك زى ما انتى بجنانك ولونك وجربك عادى.
النسخة الورقية