«جوزيه» يعقد مؤتمرًا صحفيًا للحديث عن مشروعه الجديد

عقد البرتغالي "مانويل جوزيه"، المدير الفني الأسبق لنادي الأهلي، مؤتمرًا صحفيًا، اليوم الثلاثاء، من أجل الحديث عن مشروعه الجديد الذي يقوم به في مصر، من خلال نادي نجوم المستقبل.
- سعيد بعقدي الجديد مع نجوم المستقبل
وقال جوزيه «أنا اشتغلت في سبورتينج لشبونة وكان رونالدو عنده 13 سنة.. أنا علاقتي بتكون كويسة مع الأولاد في السن ده، في عقد لمدة 5 سنين مع نجوم المستقبل حاليًا مبسوط ولكن مش عارف الفترة القادمة هنكون كده ولا لأ».
وأضاف: «فيدالجو هيكون موجود 8 شهور في السنة والمشروع هيبتدي 1 أكتوبر.. وعندي إمكانية إنني أنقل الخبرات اللي عندي.. حابب أشكر الصحافة والإعلام وأتمنى أننا نكون موفقين وسعداء بدعم الإعلام.. عايز لاعيبة تطلع يكون لديها قدرة على تمثيل الكرة المصرية في الخارج»
- وائل جمعة أفضل المدافعين في تاريخ مصر.. واللاعبين المصريين يمتلكون الإمكانيات لكن تنقصهم العقلية.
وأوضح «أتابع الدوري المصري في البرتغال.. ولما بشوف الماتشات بتفكرني ب2001 لما جيت واتفرجت على ماتش نهائي الكأس بين الأهلي والمحلة وكان ساعتها وائل جمعة بيلعب، وأنا بتفرج على الماتش نمت 5 مرات، بس لما شوفت وائل جمعة في المحلة كان شعره لسة غريب فيه شعيرات بيضاء، وائل جمعة أفضل مساك في تاريخ كرة القدم المصرية، فعشان كده لو عايزين نشتغل على مستقبل الكرة في مصر لازم نقول للأباء متضغطوش على الأولاد لأننا هنضم لاعبين من 7 ل14 سنة طبيعي كل أب بيشوف أبنه رونالدو وميسي، لازم الأبناء يكونوا ملتزمين بالمواعيد والمدربين أيضًا لأنهم هيكونوا مثل أعلى لهم»
وتابع «اللاعيبة المصرية عندها إمكانيات هائلة بس ناقص للاعب المصري الناحية الجماعية لأنه لاعب فردي.. وعشان اللاعب المصري ينجح لازم نغير عقلية المواهب الصغيرة دي.. فعشان كده عايزين نظهر عدد من اللاعبين ونخلي عقليات احترافية».
- احب الشعب المصري.. ليس لدى مشاكل مع أحد سوى بعض الصحفيين
وقال «استرجعت اليوم ذكريات جميلة بحضور المؤتمر الصحفي ده.. بشكر السفيرة على الحضور، هحكي سبب سريع عشان يوضحلكم ليه هعمل أكاديمية في مصر، أنا عايز أقول شكرًا للشعب المصري وكل الجماهير الأهلي والزمالك، بحس إني جزء من الشعب وبنتمي ليه، أنا عمري ما كنت مغرور بس عندي فخر بنفسي وده شيء طبيعي ومكنش عندي مشاكل مع حد غير بعض الصحفيين»