حالة حوار

د / عمرو عبد السميع : مساء الخير وأهلا بكم فى حالة حوار ثقافة الانتماء حلقات خاصة من هذا البرنامج نستضيف فيها رموز السياسة والاقتصاد والأدب والفنون والرياضة والإبداع فى كل المجالات لنقلب معا فى ملف حب الوطن ضيفى اليوم هو المسئول الأول عن الرياضة فى مصر هيكلمكم عن الفرق بين المجلس القومى للرياضة والمجلس القومى للشباب هيكلمكم عن مدى مطابقة الاتحاد القومى المصرى لكرة القدم للوائحه على لوائح الاتحاد الدولى الفيفا هيكلمكم عن المحكمة الرياضية هيكلمكم عن نادى الزمالك وهيكلمكم عن حظوظنا فى البطولات الرياضية العالمية ليه كبيرة عند الشباب وليه ضعيفة عند الكبار اسمعوا له كويس لإن الرياضة النهاردة أصبحت أهم ساحات ظهور الانتماء الوطنى فى هذا البلد ويا أيها الشاب الجميل حب بلدك ، حب وطنك ده الحب بعده مستحيل
فاصل
عبارة عن أغنية السيدة أم كلثوم مصر التى فى خاطرى
د / عمرو عبد السميع : اسمحوا لى أولا أن أرحب بضيفى وضيفكم الكبير المهندس حسن صقر رئيس المجلس القومى للرياضة وأرحب بأبنائى وبناتى شابات وشباب مصر وأهلا وسهلا بكم ، المهندس حسن صقر الحقيقة منذ سنوات الوزارة قررت إنها تخلى فصل يتم ما بين المجلس القومى للرياضة والمجلس القومى للشباب قلنا لك فقلت لنا مش جاى أظن بعد مرور كل هذه السنوات من حقنا إن احنا نناقشك فى الموضوع عايزين الشباب دول يعرفوا إيه الفارق بين المجلسين؟ لإن محدش فاهم إيه الفارق بين المجلسين
م/حسن صقر : هو طبعا أنا بشكر حضرتك على الدعوة الكريمة
د / عمرو عبد السميع : ربنا يخليك أنهى دى وللا اللى فاتت
م/حسن صقر : كله أنا بس عايز أقول أنا ما رفضتش إن أنا آجى كل ما فيها كنت عاوز الرياضة التخصص بتاعها ياخد المساحة اللازمة وأنا عارف طبعا حضرتك بتحاول إن انت..
د / عمرو عبد السميع : طبعا كان وارد عندنا إن الرياضة تتناقش لوحدها والشباب يتناقش لوحده والاثنين يتناقشوا مع بعض
م/حسن صقر : واحنا دلوقتى فى مجال إن احنا نشرح تماما إيه هو المجلس القومى للرياضة وليه بيختلف عن المجلس القومى للشباب يعنى طبعا ما هو أغلبية الرياضة شباب أغلبيتها شباب ولكن طبعا هناك رياضة رواد كبار السن ، فيه رياضة المعاقين ، الإعاقة الخاصة ، فيه عندنا المرأة عندنا أعمار كثيرة ولكن طبعا بتبقى الأغلبية الكاملة أغلبية كبيرة اللى هى الشباب و بالتالى يمكن هنا فيه سوء فهم أو قلة فهم فى حتة طب المجلس القومى للرياضة ليه والمجلس القومى للشباب ليه إذا كان الرياضة الاثنين قريبة من بعض لإن الشباب ليه مجالاته وليه تثقيف وليه تنمية ومهارات الشباب منصوص عليها فى القرار الجمهورى وفيه محددات منصوص عليها فى القرار الجمهوري برضه بإنشاء المجلس القومى للرياضة
د / عمرو عبد السميع : مش المفروض إنكم توضحوا الكلام ده للناس بلغة يفهمها الناس؟
م/حسن صقر : والله
د / عمرو عبد السميع : وللا الناس مش طرف فى العملية دى؟
م/حسن صقر : لا ده الأساس طبعا كل واحد بيحاول يوضحها من خلال العمل بتاعه ومن خلال الشغل بتاعه لكن أتفق مع حضرتك قد يكون إنها محتاجة أكثر إعلاميا من المسئولين هم يوضحوها بشكل أو بآخر
د / عمرو عبد السميع : ليه ساحات الرياضة بقت هى ساحات الانتماء السياسى والانتماء الوطنى وهل الانتماء السياسى والانتماء الوطنى يبقى مجرد الاحتفال بالعلم أو الاحتفال بالنشيد أو ترديد اسم البلد أو تحية ممثليها الرياضيين وللا فيه شئ أعمق من كده لازم يحصل
م/حسن صقر : لا هو فيه شئ أعمق هو النهاردة الانتماء ده مش سهل كلمة انتماء يعنى إنى النهاردة آجى أقول إن أنا بحب بلدى إن أنا مفتخر إن أنا مصرى إن أنا أفتخر إن علم مصر بيرتفع إزاى يبقى فيه على البلكونات علم مصر إزاى يرجع تانى علم مصر
د / عمرو عبد السميع : فى الاستديو عندنا أهه
م/حسن صقر : بالضبط يعنى شوف النهاردة لما كنا احنا رياضيين زمان لما كنا نلعب أى بطولة كان اللحظة اللى بيترفع فيها العلم المصرى والسلام الجمهورى الوطنى السلام الوطنى بيضرب كنا بندمع يعنى هو ده قمة الانتماء وبالتالى حدوتة كبيرة موضوع الانتماء والوطن
د / عمرو عبد السميع : انتوا عارفين المهندس حسن صقر كان كابتن كبير قوى هاندبول(كرة يد)
م/حسن صقر : ما هو الهاندبول جزء من الرياضة فى مصر يمكن مش عايز أقول إنها اللعبة الشعبية الثانية عشان الطائرة والسلة ما يزعلوش منى ويقولوا منحاز لكن خلينا من اللعبات اللى هى تلى الكورة مباشرة إن فيها الإثارة برضه
د / عمرو عبد السميع : منحاز دى بقى بتاخدنى إلى ساحات بالغة الأهمية فى الحقيقة ، الحقيقة بنشوف مثلا الاتحاد القومى لكرة القدم الفيفا طلب تعديل لوائح الاتحاد المصرى لكرة القدم علشان تتلاءم أو تتناهض مع اللوائح بتاعت الفيفا وحصل جدل طويل عريض واتقال المهندس حسن صقر بيدفع نحو أمور معينة فى هذا السياق علشان اتحاد كرة القدم ورئيسه ما يقعدوش أكثر من 8 سنين إيه القصة دى بقى
م/حسن صقر : خلينى أقول جزئية مهمة جدا فى الموضوع ده يعنى الجزء اللى فى اللائحة اللى منصوص عليها 8 سنوات مش أنا اللى مقترحه ده موجود من أيام الدكتور عبد الأحد جمال الدين تعاقبت شوف بقى كام سنة وزارات مختلفة لغاية دلوقتى احنا ما عملناش حاجة فى هذا الموضوع كل ما فيها إن احنا لقينا هذا الموضوع إيجابى بحيث إنه بيدى فرصة لظهور جيل وأجيال تتعاقب فى حتة تولى المسئولية الرياضية ويكفى إن ده من 24 اتحاد أولمبى نجح 19 رئيس اتحاد جديد وقبل هذا القانون وقبل اللائحة وبعدين فوق ال90 % من القائمين على الاتحادات الرياضية اللى موجودين يعنى بقى لهم 10 سنين أو 8 سنين ما جوش إلا بناءً على هذا القانون ما كانوش هيقعدوا إلا لو اللى قبليهم مشيوا
فاصل
م/حسن صقر : هو الموضوع ده مهم
د / عمرو عبد السميع : علاقته إيه بقى بحكاية الفيفا واتحاد الكرة؟
م/حسن صقر : بالضبط هو الفيفا النهاردة بالتأكيد تنادى باستقلالية الاتحادات اتحاد كرة القدم
د / عمرو عبد السميع : اللى هى الجهة الإدارية اللى هى حضرتك تبعد بقى عن الناس
م/حسن صقر : بالضبط هى دى معادلة برضه عايزين نتكلم فيها شوية لإن هنا النهاردة الجهة الإدارية على مستوى الدولة كلها اللى هى متمثلة فى المجلس القومى للرياضة دى هى اللى بتصرف على الرياضة فى مصر وبتيجى من موازنة الدولة فده مال دولة ، مال شعب
د / عمرو عبد السميع : يعنى انتوا صرفتوا إيه عملتوا إيه
م/حسن صقر : فاحنا كل المنشآت اللى بتتصرف كل الإعداد للبطولات والمعسكرات دى ده مال دولة حق للشعب يمكن مئات الملايين بتتصرف على المنشآت وبنية أساسية رياضية وعلى إعداد أبطال وعلى توثيق إعادة الممارسة فى المدارس الرياضية الموجودة فى المحافظات كلها بتيجى منها أجيال وأجيال اللى هى يعنى الفلوس دى كلها اللى بتتصرف فى النهاية لابد إن يكون عليها رقابة مالية نعرف الفلوس دى إيه المردود بتاعها
د / عمرو عبد السميع : الرقابة بتكون من الجهاز المركزى وللا البنك المركزى؟
م/حسن صقر : لا الجهاز المركزى للمحاسبة وإدارة الرقابة والمعايير إدارة مركزية فى المجلس القومى للرياضة وده بحكم القانون فاحنا بننفذ القانون احنا ما بنتدخلش فى النواحى الفنية فى الاتحادات يا دكتور احنا ما بنقولش انت عينت الكابتن حسن شحاتة ليه ودى فن ما قلتش غيرت اللعيب الفلانى ليه ما قلنا لهمش اشتركوا فى بطولة إيه وما تشتركوش فى بطولة إيه جدول مسابقات الدورى ، مشاكل انتقالات اللاعبين فى الدورى كل الكلام ده احنا براه تماما احنا رقابة مالية على فلوس الدولة بتروح فين أعتقد ده حق ما نختلفش عليه كثير والفيفا نفسها بتقدر هذا احنا كنا بنتكلم فى اللوائح طلبنا مراجعة نصوص اللوائح عشان ما تتعارضش مع القانون المصرى
د / عمرو عبد السميع : يعنى فى الحالة بتاعت التفضيل بيكون القانون المصرى أبدى؟
م/حسن صقر : بالتأكيد
د / عمرو عبد السميع : يعنى لوائح الاتحاد المصرى هى الأبدى؟
م/حسن صقر : مش لوائح فيه فرق حضرتك بين اللائحة فى الفيفا
د / عمرو عبد السميع : والقانون
م/حسن صقر : والقانون المصرى بتبص تلاقى فيه بندين ، ثلاثة فى مثلا فى وسط 30 ، 40 بند لازم يعنى يتطابق مع القانون المصرى وإلا أى واحد ماشى فى الشارع هيرفع قضية هيكسبها احنا بننادى بالاستقرار وخلى بال حضرتك إن الفيفا بتبارك هذا التوجه لإن الفيفا أهم حاجة عندها إن يكون فيه تنسيق بين الجهة الحكومية والجهة الإعلامية اللى بيمثلها الاتحاد
د / عمرو عبد السميع : أنحاز برضه ردتنا إلى ساحة أخرى أو إلى فكرة أخرى تتعلق بنادى الزمالك ناديك هو كمان كان عضو فى مجلس إدارة نادى الزمالك ومن الرموز بتاعت هذا النادى لكن الحقيقة تدخل الجهة الإدارية اللى حضرتك بتمثلها علشان تقول تعقد جمعية عمومية أو يتعمل انتخابات جديدة لنادى الزمالك رغم إن المستشار مرتضى منصور كان رئيس نادى الزمالك فى مثل هذا التوقيت حاصل على ثقة الجمعية العمومية إدى انطباع بأن الجهة الإدارية توجه الأحداث توجيها معينا تراه وأن هذا التوجيه فى الحقيقة يسلب الجمعية العمومية حقها أو يوجه الجمعية العمومية الجديدة اللى هتنعقد دى إلى اتجاه بعينه
م/حسن صقر : نظرت لها بنظرة..
د / عمرو عبد السميع : لا دى ما فيهاش نظرة الجهة الإدارية
م/حسن صقر : آه الجهة الإدارية هى يعنى بيبقى لها توجه معين المجلس القومى أنشئ فى 1 يناير بدأ العمل 2006 لما توليت مهام المسئولية بتاعتى كان "all ready" مجلس إدارة الزمالك بحكم قضائى اتحل وكان الدكتور الوزير ممدوح البلتاجى كان ساعتها وزير الشباب ربنا يدى له الصحة وطولة العمر كان أخذ قرار نتيجة للنزاعات الداخلية جوة مجلس إدارة نادى الزمالك أخد قرار بحل مجلس إدارة نادى الزمالك أنا جيت كان مجلس الإدارة اتحل ومعين برئاسة الأستاذ مرسى عطا الله يعنى أنا جيت قعدت 4 شهور بالعكس بعد 4 شهور صدر حكم قضائى برجوع المجلس اللى هو اتحل فاستقبلت المستشار مرتضى منصور وسلمته أمور النادى استلم دخل بقى النادى بعد كده دخل فى مشاكل معينة ودخلنا فى متاهات حوالى 3،4 شهور وبعدين بقينا نتعامل برد فعل مع الأحكام القضائية لكن بداية حل مجلس إدارة الزمالك لم يكن فى عهد المجلس القومى للرياضة
د / عمرو عبد السميع : احنا عايزين تخلع قبعة رئيس المجلس القومى للرياضة وتلبس قبعة زملكاوى وتقول لنا ما آلت إليه الأمور فى نادى الزمالك تعنى إيه بالنسبة لك
م/حسن صقر : طبعا خلينا برضه نتفق يا دكتور إن الرياضة أهم روافد لها الأندية الكبيرة فى مصر نادى الأهلى نادى الزمالك نادى سبورتنج نادى سموحة هليوبلس كل دول عصب رئيسى لميدان الفرق القومية طبعا جد عليها أندية الشركات وأندية المؤسسات العسكرية والشرطة كل ده بيثرى
د / عمرو عبد السميع : المؤسسة العسكرية اللى هى زى طلائع الجيش زى الحاجات دى والشركات اللى هى زى انبى والحاجات دى
م/حسن صقر : بالضبط توضيح هايل بالنسبة لحضرتك النهاردة دى منظومة كلها متكاملة أنا النهاردة يعنى ما بينفعش إن أنا أنظر لنادى الزمالك خاصة إن أنا آجى أقول لا ده نادى ما لوش دعوة لا هو نادى الزمالك قيمة كبيرة زى أى نادى من الأندية الكبيرة والضلع الأساسى لمد الانتخابات باللاعبين اللى بيحصل جوة نادى الزمالك ده نتيجة تعاقب مجالس إدارات على فترات طويلة ونتيجة ظهور بعض الأحكام القضائية اللى هى دفعت الجهة الإدارية إن هى يبقى فيه مجالس معينة وأنا مع المجالس المنتخبة وأنا مع الجمعيات العمومية إن هى تدى الصلاحية الديمقراطية المطلوبة وبالتالى نجحنا أخيرا شوف حضرتك الكلمة نجحنا أخيرا إن يكون فيه جمعية عمومية وفيها انتخابات النهاردة برضه هذا الموضوع فى ساحة القضاء
د / عمرو عبد السميع : فيه طعن بالتزوير؟
م/حسن صقر : بالضبط فدى احنا بننتظر الأحكام اللى ممكن تحدث فيها إيه ولكن فى كل الأحوال عدم استقرار مجالس الإدارات وعدم استقرار البنية الإدارية لأى نادى يؤثر سلبا على الوضع الرياضى وعلى تأثيره حتى على المنتخبات والفرق القومية فأنا مش مبسوط من حاجة زى كده لكن بتبقى فيه أمور بتبقى غصب عنك طالما
د / عمرو عبد السميع : حلها إيه؟ نعمل إيه؟
م/حسن صقر : حلها إن لابد إن يكون فيه تسامح من كبار ورموز نادى الزمالك
د / عمرو عبد السميع : مين اللى يدعو للتسامح؟
م/حسن صقر : كبار ورموز كل نادى
د / عمرو عبد السميع : عشان كده أنا قلت لحضرتك اقلع القبعة وكلمنا كزملكاوى
م/حسن صقر : صعب فى الأمور دى إنك انت مهما كان أصل انت هتيجى تقعد قعدة فيها 15 ، 20 واحد 30 واحد هيبقى لك رأى هتصنف فالنهاردة ما ينفعش جهة إدارية تصنف أنا بحاول أبعد لكن احنا بنساعد فى حاجات لو أخد رأينا فى حاجة معينة لكن هناك كبار رموز ناس محترمين لنادى الزمالك وهناك ناس أفاضل مسئولين عن الرياضة بالنسبة بوجه عام أنا كذا مرة بندعوهم إن هم يقعدوا ويشوفوا الصالح العام بالنسبة لهذه المهاترات
د / عمرو عبد السميع : التسامح قيمة غائبة عن الساحة المصرية فى كافة المجالات مش الرياضة بس والحقيقة إحنا تحولنا إلى بلد مواطنوه يطاردون بعضهم البعض فى الشوارع وعلى صفحات الجرايد وفى قنوات التليفزيون ومن ثمة الحديث عن التسامح وإن الناس تتراضى فى قعدة زى قعدة العرب كده أصبح أمر لايمكن الوصول إليه بسهولة وبالتالى خلينى أقول لك إن احنا بنتكلم على قوانين وبنتكلم على إجراءات ومع ذلك يعنى مثلا فى صفقة اللاعب محمد ناجى جدو والصراع الرهيب اللى أشبه بحرب البوير مثلا ما بين نادى الزمالك ونادى الأهلى ونادى الاتحاد حوالين عملية بيع هذا اللاعب انتهى الأمر بإيه بدل ما الناس تفكر فى قيمة زى المحكمة الرياضية اللى هى قائمة أيضا على فكر التسامح وعلى فكر التراضى راحت الأقسام وراحت النيابة واتكلمت على خيانة الأمانة واتكلمت على التزوير ودخلنا فى إشكالية كبرى فى الحقيقة لا يمكن فضها بسهولة والواقع كذلك نعمل إيه
م/حسن صقر : هو مالهاش حل فى هذا الموضوع إلا حاجتين الحاجة الأولى أن تنضبط اللوائح والتعليمات فى لجان اللاعبين وشئون اللاعبين ده مشكلة اتحاد كرة القدم لإن هى النهاردة اللوائح هى اللى بتحكم الأندية اللى بيدير رياضة كرة القدم فى مصر هو اتحاد كرة القدم المصرى ده بحكم القانون شأنه شأن اتحاد أى لعبة أخرى النهاردة لابد أن تكون اللوائح صريحة ومحددة سواء العقاب أو الثواب النهاردة فى الاتنقالات معروف ده إيه وده إيه أنا النهاردة لازم إن أنا أطبق على الكبير قبل الصغير هذا الموضوع أنا شايف إن الموضوع ده مش عايز أقول فيه مجاملات ولكن عايز أقول إن لابد إن اللوائح تبقى واضحة والقرارات سريعة وحاسمة دة نمرة واحد
د / عمرو عبد السميع : عشان لا بالمجاملات
م/حسن صقر : ده نمرة واحد حضرتك النهاردة فيه لائحة فلان ساب كده يبقى انت كذا خلصت فى 24 ساعة ما نقعدش ناخد فيها جدل الحاجة الثانية المحكمة الرياضية ؛ المحكمة الرياضية اللى هى أحد اشتراطات الفيفا إن ما يحصلش لجوء للقضاء المصرى مثلا أو القضاء الوطنى فى أى دولة يقول لك لما يكون فيه أى منازعات تلجأ للمحكمة الدولية الرياضية الدولية ليه دى بتبقها حكمها نهائى ونافذ على الاتحاد الوطنى وبالتالى بيبقى نافذ على الأندية وده بيقى الحسم بتاعها فى شهر أو شهرين بدل سنة وسنتين والطعن فيها معروف وبيبقى فيها نهائى وبينتهى برضه كله فى خلال شهر أو شهرين فيه عندك أمور لازم تنتهى بهذا الموضوع موضوع الحضرى وموضوع كذا وموضوع كذا طالما إن عندنا channelعندنا طريق عندنا قناة مفتوحة لمحكمة رياضية وده عرف عالمى أعتقد إن ده يعنى فيها نوع من الحضارة إن الإنسان هو لما يكون فيه مشكلة بس لازم الأول يلجأ للاتحاد بتاعه ولو هيسلك مسلك ما هو حق لى المحكمة الرياضية لابد إنه هيسلكه من خلال الاتحاد ما ينفعش واحد من دماغه يبعت كده فوق الكلام ده كله أنا برضه بزف لحضرتك خبر كويس إن احنا أصلا وقعنا بروتوكول تعاون مع الأنوكا اللى هى لجان الأولمبية الأفريقية لجنة الأولمبية الأفريقية باختيار مصر هم عندهم المحكمة الدولية العالمية اللى حضرتك بتتكلم عليها دى لها فرع فى كل قارة فى العالم فلها 6 أفرع أو 7 أفرع فى العالم فهو مطلوب فرع لها فى أفريقيا فاحنا الموقف بتاعنا دلوقتى إن احنا إن شاء الله أخدنا الموافقة بتاعتهم بروتوكليا اتفقنا عليها عملنا هذا الموضوع وأهم من كده خدنا موافقة السيد رئيس مجلس الوزراء بتخصيص أرض فى 6 أكتوبر ونبنيها دى هتبقى مقر المحكمة الدولية فى أفريقيا هتبقى مصر دى أولا بتدى كريديت قيمة عالية مصر تستحقها على المجال الدولى وفى نفس الوقت مش عايز أقول لك نقرب المسافة بدل ما أروح سويسرا لا أروح 6 أكتوبر لكن هتبقى دى زائد مشروع القانون الرياضى الجديد اللى إن شاء الله قريب على تشريعات مجلس الشعب ربنا يسهل على حسب الأولويات بينص نص كامل وصريح على وجود محكمة رياضية تفض المنازعات بين الهيئات المصرية المختلفة
د / عمرو عبد السميع : المحكمة الرياضية الدولية بالنسبة لأفريقيا لما تبقى موجودة عندنا مش هتقابل برضه ببعض اعتراضات من الدول المعترضة أساسا إن الاتحاد الأفريقى يبقى عندنا
م/حسن صقر : والله ما هى كلها بتبقى زى مسابقة يعنى بتبقى مسابقة حضرتك هم لهم اشتراطات عاوزين تسهيلات معينة عاوزين ده بيطلع حضرتك بقرار جمهورى زى اتفاقية المقر بتاع الاتحاد الأفريقى طلع بقرار جمهورى واتصدق عليه فى مجلسى الشعب والشورى ولها تسهيلات للوفود اللى هى الاتحاد الأفريقى ولكل المجموعة بتاعت الاتحاد الأفريقى فالمحكمة الرياضية دى هم يبقوا طالبين أرض معينة تسهيلات معينة البلد اللى بتستوفيها يوافقوا عليها فهى ده لا يمنع زى ما حضرتك بتقول هيكون فيه نوع برضه من الغيرة نوع من الانتقاد لكن المركب ماشية المركب لازم تمشى يعنى بنقول هى بتبقى قيمة لمصر هى بتستحقها وسط دول أفريقيا إن يبقى مقر الاتحاد الأفريقى عندنا ، مقر المحكمة الرياضية فرعها فى العالم فى أفريقيا تبقى فى مصر إن شاء الله تبقى حاجة كويسة
د / عمرو عبد السميع : طب لما احنا لنا هذه القيمة اللى تخلى المحكمة الرياضية الأفريقية عندنا وتخلى مقر الاتحاد الأفريقى لكرة القدم عندنا أمال ليه الناس ما إدتناش أصواتها عشان ننظم المونديال عندنا
م/حسن صقر : ده موضوع حضرتك يعنى هو الفايل بتاعها فيه فرق إن الملف يتعمل مضبوط وفرق إن التسويق بتاعها طريقة كان لازم يتعمل بشكل مخالف ده أنا مش هقف عند دى كثير لإن دى احنا استفدنا من هذه التجربة تماما لإن هو الموضوع مش بس إن بيقى عندى إمكانية إن أنا أنظم دورة لازم يكون عندى إمكانية الحشد العالمي وعندى إمكانية إن أنا يبقى لى صداقات على مستوى الرياضيين فى العالم ونوع من أنواع التسهيلات اللى هديها لإقامة هذه الدورة وإمكانيات يعنى هى مجموعة عوامل تؤدى فى النهاية مجموعة عوامل تؤدى فى النهاية لاختيار دولة فهو النهاردة احنا آه ما اتوفقناش فى ده مونديال 2010 لكن مش هنفقل بقى نبص لحاجة ثانية وداخلين إن شاء الله ملف قدمناه ملف بحر أبيض متوسط سنة 2017 سيادة الريس مشكورا وافق لنا على المبدأ إن احنا نتقدم بالملف قريب والحكومة اعتمدت هذه الموافقة والتنفيذ مع السيد محافظ اسكندرية وهنبدأ حملة الترويج إن شاء الله بعد العيد ودى لجنة برئاسة الدكتور زاهى حواس
د / عمرو عبد السميع : رئيس المجلس الأعلى للآثار؟
م/حسن صقر : وعضوية مجموعة من الرياضيين والرموز الكبيرة يعنى المستشار الفنى للجنة اللواء منير ثابت رئيس اللجنة الأولمبية المصرية السابق وعضو اللجنة الأولمبية الدولية ونائب رئيس لجنة ألعاب البحر المتوسط فيها اللواء أحمد عادل رئيس اللجنة الأولمبية المصرية فيها الدكتورة رانيا علوانى فيها رشوان بطل الجودو العالمى فيها إسماعيل الشافعى الكابتن إسماعيل الشافعى نائب رئيس الاتحاد الدولى فيها عمرو السمرة أول مصرى وأفريقى وعربى يتسلق جبال إفرست يعنى احنا حطينا رموز الرياضة المصرية على مستوى عالى جدا فيها كابتن خالد مرتجى عضو مجلس إدارة النادى الأهلى له علاقات دولية برضه بعدين حشد كبير عندنا شغل كثير لمدة 8 شهور 9 شهور وربنا يوفقنا فكرة دورة ألعاب البحر المتوسط نبعت من مصر سنة 48 طاهر باشا هو اللى ابتدعها الفكرة دى وأول بطولة كانت فى اسكندرية 1951 وأنشئ بسببه استاد البلدية فى اسكندرية اللى هو نفتخر به كلنا
د / عمرو عبد السميع: على غرار برلين على غرار استاد برلين
م/حسن صقر : بالضبط فاحنا عندنا باع طويل فى هذا الموضوع تاريخ هذا الموضوع فمش عايزين نخاف من هذا بالعكس ندرس
د / عمرو عبد السميع : فرصنا إيه فى هذا الكلام؟
م/حسن صقر: هم فيه 5 دول متقدمة وانت بتقول لى حضرتك على ال5 دول واحنا لوحدينا لو احنا فى وسط ال5 يبقى النسبة 20 % لكن ما نقدرش نحسبها بالطريقة دى لإن فيه دولة زى أسبانيا نظمتها مرتين
د / عمرو عبد السميع :قبل كده آخر مرة كانت شئ خرافى يعنى
م/حسن صقر : بالضبط فدى بتبقى برضه حاجة ، عندنا ليبيا وعندنا تركيا وكرواتيا ومصر الموضوع كله موضوع نجاح إن احنا نعمل إزاى نبين للعالم كله مصر هتستفيد خلى بالك برضه ما بيقولوش مصر فيها ملاعب إيه لا هم يقولوا مصر هتستفيد من الدورة إيه هتطور عشوائيات إيه هتعمل شبكة سكة حديد فى برج العرب إزاى هتعمل بنية أساسية رياضية هناك هتعمل مدينة أولمبية رياضية إزاى هتربط برج العرب بالاسكندرية إزاى بحيث تبقى ده اللى بيدوروا عليه من هنا أنا بشكر سيادة المشير حسين طنطاوى على دعمه اللا محدود للموضوع ده لإنه سخر كل إمكانيات القوات المسلحة
د / عمرو عبد السميع: احنا بنشوف إضافات رائعة فى الحقيقة فى كل مكان فى برج العرب نفسه اللى حصل في افتتاح بطولة كأس العالم للناشئين
م/حسن صقر: بالضبط حتى لما قابلته ورحت اتكلمت مع سيادته فى الموضوع ده قال لى سواء هتعملوا الدورة أو مش هتعملوها أنا هعمل لكم المنشآت دى كلها عشان ده واجب على القوات المسلحة يعنى حاجة جميلة وروح جميلة والحكومة كلها و الوزارات المعنية كلها بتتابع هذا الموضوع
د / عمرو عبد السميع: الحقيقة كلام حضرتك عن دورة البحر الأبيض المتوسط بيخلينى أتكلم عن دورة أخرى خلصت منذ أيام فى سنغافورة هذه الدورة فى الحقيقة فرق مصر للشباب ودى كانت دورة للشباب حققت نتائج لفتت النظر يعنى فيه ذهبية فى الهاند بول وفيه فضيات فى ألعاب أخرى ليه احنا بنحقق نتائج فى دورات الشباب لكن بنتخلف فى دورات الكبار؟
م/حسن صقر : سؤال 100 %
د / عمرو عبد السميع : الله يكرمك
م/حسن صقر: هو ده فعلا كلام صح 100 % مشكلتنا إن احنا عندنا فجوة ما بين إن اللاعب يلعب لغاية 16 سنة و 17 سنة و18 سنة يحصل له dropإن هو من سن 12 سنة 14 سنة بيوصل لأعلى المستويات مجرد ما دخل فى الحلقة بتاعت الثانوية العامة وطلع منها بعد سنتين بيبعد عن الرياضة تماما طالما طلع عن الرياضة سنتين فبتبقى رياضة البطولة اللى هى القمة بتتأثر جامد لما بيرجع على الجامعة يا عالم بقى دخل أنهى جامعة فى ظل نظام بنقول وده اللى بنحاول نعالجه دلوقتى مع الدكتور هانى هلال بحيث إن يبقى
د / عمرو عبد السميع: وزير التعليم العالى؟
م/حسن صقر: وزير التعليم العالى والدولة للبحث العلمى إن احنا ازاى الرياضة بتتفعل وهو فى الحقيقة قايم بدور فعال جدا فى هذا الموضوع بس هيسمع معانا بعد عدة سنوات ابتدينا فيه دلوقتى بقى لنا سنتين فهو طبعا احنا بنبارك للجنة الأولمبية والاتحادات وأولادنا اللى كسبوا فى سنغافورة ودى كانت أول دورة أولمبية للشباب واحنا بنحاول الفترة دى كلها نعالج الفجوة دى اللى هى بيحصل فيها النقص عشان نحافظ على مستوى اللى هو إن هم الشباب دول هم أملنا فى لندن 2012 وهم أملنا فى رودى جا نيورو فى 2016 فلابد ما يحصلش خلل فى النص بالعكس يزيدوا
د / عمرو عبد السميع : على فكرة لما الباشمهندس بيكلمكم على إن هم بيبصوا دايما فى تنظيم الدورات للمجتمعات دى هتعمل إيه أو هتستفيد إيه تشيل عشوائيات تعمل طرق ما عرفش إيه حتى لندن فى دورة 2012 الأوليمبية لما تشوفوا المطبوعات اللى معمولة عن لندن إيه هتجد إن فيه إنشاءات كبرى فيه استغلال صحيح لإنشاءات قديمة زى الإنشاءات اللى موجودة فى جرينيتش وكده لكن أيضا فيه إنشاءات كبرى جديدة حتى لندن
م/حسن صقر : بالضبط هو دى الرؤية بتاعت اللجنة الأوليمبية الدولية أو أى جهة إعلامية بتنظم تشوف الدولة هتفيد المجتمع إزاى بتطوير منشآت بنية أساسية رياضية ، بنية أساسية مرافق تليفونات كل ده
د / عمرو عبد السميع :لما نتكلم بقى عن الدورات ونتكلم بقى بناخد ميداليات إيه شكلنا إيه كبار وللا صغيرين صغيرين وللا كبار الحقيقة ده بيدفعنا للحديث عن مشروعكم لإنشاء البطل الرياضى يعنى احنا سمعنا هذا الكلام من أيام الدكتور على الدين هلال من أيام ما كان وزير الشباب لغاية دلوقتى سمعنا عن مشروع البطل الرياضى وشفنا بعض نتاجه لكن هذا النتاج لا يتطور هو فى النهاية بضعة أفراد فى لعبات فردية اللعبات الجماعية بنحقق فيها على المستويات القارية لكن على المستويات العالمية ما بنحققش حاجة تذكر ليه؟
م/حسن صقر : حضرتك برضه قلت جزئية مهمة جدا هو البطل الرياضى هو البطل الأوليمبى دى كانت فكرة رائعة من الدكتور على الدين هلال فى هذا الموضوع ولكن برضه احنا خدناها وطورناها كان فيها دروب إن احنا زى ما حضرتك قلت كده ما بنركزش غير على 10 أو 15 واحد مشروع البطل الأوليمبى كان بياخد 10 أو 15 أو 20 رياضى ويركز عليهم هم دول مشروع البطل الأوليمبى احنا طورنا هذه الفكرة ولعلمك أنا قعدت مع الدكتور على ودرسنا المشروع الجديد ومشروع التميز الرياضى وسدينا بقى كل الفجوات
د / عمرو عبد السميع :سديتوها ازاى احكى لنا كده هننتج بطل رياضى عالمى إزاى
م/حسن صقر : احنا أساسا لابد الاستعانة بدل ما بشتغل على 20 أو 30 واحد أشتغل على 20 أو 30 ألف
د / عمرو عبد السميع : كسر القاعدة
م/حسن صقر : نكسر القاعدة
د / عمرو عبد السميع :عشان اللى خاب يطلع
م/حسن صقر : بالضبط فبدل ما يجى لى ترشيحات من 10 اتحادات 30 واحد يجى لى ترشيحات من المحافظات عملنا مراكز تنمية فى المحافظات وابتدينا بمحافظات الصعيد
د / عمرو عبد السميع : بس عايز فلوس كثيرة قوى
م/حسن صقر : الدولة اعتمدت المبالغ دى كلها
د / عمرو عبد السميع :كل المبالغ
م/حسن صقر : كل المبالغ
د / عمرو عبد السميع :حجمها أد إيه تقريبا
م/حسن صقر : حاليا احنا معتمدين ميزانية فى ال5 سنوات القادمة تقريبا 300 مليون جنيه
د / عمرو عبد السميع : 300 مليون جنيه ده مش فلوس كثير
م/حسن صقر : آه ما هو دى نشاط ولكن غير المنشآت الرياضية تتعدى النص مليار والثلاثإربع مليار
د / عمرو عبد السميع : هل حددتم المستهدف اللى ممكن تحقيقه من وراء صرف ال300 مليون جنيه
م/حسن صقر : بالضبط احنا عملنا plan إن يبقى عندنا مراكز تنمية رياضية نشتغل أول سنتين على 20 أو 30 ألف هيزيدوا فى آخر 5 سنين ل50ألف و60 ألف دى هتبقى بطاريات كلها بتجمع كل الموهوبين فى المحافظات ممارسة عامة يتاخد منها مواهب المواهب دى بتخش فى البطولات بتروح الأندية والاتحادات ياخدوهم يبقوا ناشئين زى بقى يروحوا دورات وإنه يلعب بطولة دورية اللى يلعب بطولة أوليمبية اللى يلعب بطولة عالمية نجح فيها بيخش لآخر مرحلة فيها بقى اللى هى البطل الأوليمبى فيبقى زى حضرتك راس جبل 30أو 40 واحد لكن القاعدة نفسها 30،40 ألف
د / عمرو عبد السميع : الحقيقة حديثك ممتع وفى بدايته ذكرت أشياء كثيرة عن موضوع الانتماء وعن موضوع شعور الواحد وهو بيسمع النشيد الوطنى لبلده أو بيرفع علم بلاده فى ساحة رياضية شكله إيه هل بتعلموا البطل اللى انتوا بتعدوه ده بتعلموه سياسة بتعلموه فكرة الانتماء يعنى احنا بنشوف ما تآخذنيش يعنى فرق قومية مصرية قاعدة بتسمع عزف النشيد الوطنى نشوف أى فرقة أخرى عاملة كده وبتقول النشيد صح ولو إنها أناشيد معقدة جدا واحنا عندنا يقول كلمتين ومش عارف يكمل بقية نشيد بلادى بلادى إيه ده
م/حسن صقر : يعنى أساسا بتبقى من المدرسة لابد إن الطالب فى المدرسة وده برضه مع الدكتور أحمد زكى بدر وزير التربية والتعليم يعنى مشكورا ابتدى يرجع النشيد القومى تانى النشيد الوطنى كل يوم الصبح فالطلبة بتحفظه يعنى ما نجيش عند واحد عنده 30 سنة
د / عمرو عبد السميع :لغاية ما الطلبة دول يوصلوا لكم الموجودين دول
م/حسن صقر : الموجودين حاليا احنا طبعا مش عايز أقول إن احنا بنعمل لهم حصص محدش بيكبر على بلده ولكن النهادرة الانتماء بيكتسب نتيجة يعنى أنا بتخيل إن ثلاث إربع أبناءنا وبناتنا اللى موجودين فى القاعة خلينا نتفق إن من سنة 2006 مع بداية إنجازات كرة القدم اللى هى الحقيقية بطولة أفريقيا 2006 و 2008 و2010 اهتمام القيادة السياسية واهتمام الشعب والنهاردة بقى كله ابتدى الأغانى الوطنية احنا آخر أغانى وطنية سمعناها سنة 73 ابتدى يبقى فيه أغانى وطنية للرياضة
د / عمرو عبد السميع : الباشمهندس شارك فى حرب 73 لإنه كان فى سلاح الإشارة
م/حسن صقر : تمام
د / عمرو عبد السميع : كلية هندسة سنة 73 برضه
م/حسن صقر : أنا لى الشرف طبعا فى هذا الموضوع هو الانتماء بييجى من التجارب وبييجى من الانتصارات فالحمد لله بفضل ربنا الصورة اختلفت والنهاردة طبعا لابد من رجل الاتحاد حضرتك قلت كده برضه دى حاجة مهمة جدا المسئول عن أى اتحاد لابد إن يبقى عنده جزء كبير من الثقافة السياسية والمسئولية السياسية الرياضة بقى لها دخل كبير فى السياسة وبقى لها دخل كبير فى النواحى الاقتصادية وبقى لها مردود عالى فماينفعش النهاردة ممكن واحد مسئول رياضى رئيس اتحاد أو بتاع يبوظ علاقة مصر مع دولة أو ما يبقاش واحد ينفع يسافر سفرية مع فرقته يبوظ شكل مصر فى هذه الدولة يعنى النهادرة الرياضة بقت هى
د / عمرو عبد السميع :أنا هفوت الرسايل الضمنية اللى حضرتك قلتها كلها عشان ما نقفش عندها
م/حسن صقر : أنا فاهم لكن الرياضة بقت وسيلة
د / عمرو عبد السميع :أنا عايز أقول إن مش هم بس عايز أقول إن هناك فى الإعلام من لعب هذا الدور هناك فى الصحف من لعب هذا الدور هناك فى بعض الذين اعتلوا المنصات التعبير فى وسائل الكتبة الصحفيين فعل هذا
م/حسن صقر : أنا أتفق مع حضرتك لإن المنظومة كلها على بعضها يعنى كان فيها فى هذه الجزئية خلل ولابد انت تداركت حاجات كثيرة قوى يمكن ظهرت فى الأسبوعين اللى فاتوا اللقاءات اللى فاتت اتعلمنا منها بقى فيه فعل برضه أمنى بقى فيه فعل لوجستى
د / عمرو عبد السميع : بعد إمدادى يعنى
م/حسن صقر : إمدادى كل الكلام ده بقى فيه جهات مختلفة يعنى النهاردة بقى فيه تنسيق كامل ما بين المجلس القومى للرياضة ووزارة الإعلام الوزير أنس الفقى على مستوى راقى جدا فى التعامل والمسئولية بصفته بصفة وزير إعلام حالى ووزير شباب سابق مع سيادة الوزير أبو الغيط أحمد أبو الغيط الخارجية تنسيق مع السفارات كل اللجان التنسيقية كلها بتبقى لها مردود واحد اللى هو مصلحة البلد فين احنا رايحين على فين كل حاجة كل ما بنشتغل
د / عمرو عبد السميع :رايحين على فين
م/حسن صقر : احنا رايحين إن شاء الله رايحين لتفوق رياضى عالى بس هيسمع معانا فى دورات أنا مابقولش النهاردة هيسمع معانا فى 2016
د / عمرو عبد السميع :احنا رايحين على تفوق رياضى عالى هيسمع معانا فى 2016 ونتواصل بعد الفاصل
فاصل
د / عمرو عبد السميع : عدنا لنواصل التقليب فى ملف الانتماء مع المهندس حسن صقر رئيس المجلس القومى للرياضة حضرتك كنت بتقول لى احنا قاعدين نجهز عشان رودي جانيرو وسنة 2016 طب ولندن 2012
م/حسن صقر : لا دى لندن دى محطة احنا لندن لازم يكون لنا فيها تحقيق مجموعة من الميداليات ولكن أنا بتكلم المشروع بتاعنا مرحلته مش بينتهى خالص نهائى
د / عمرو عبد السميع : عادة بيبقى فيه توقعات بتبقى فيه قراءة للمستوى وتوقعات احنا متوقعين نعمل إيه فى دورة لندن
م/حسن صقر : والله أنا باخد كل توقعاتى ودراساتى من اللجنة الأوليمبية المصرية هى اللى مشاركة فى مشروع التميز الرياضى معانا وفيه تنسيق فى هذا الموضوع لأن بنتكلم فى هذا الموضوع من ميداليتين لثلاث ميداليات لندن 2012 ونبدأ فى انطلاق أكثر فى 2016 الفكرة كلها يا دكتور احنا بنتكلم على بنية أساسية من الكوادر الرياضية ذخيرة بنشتغل بها تبتدى تسمع معانا بعد كده يكون واحد بيسمع برة يقول لك آه طبعا مين اللى يقعد ل2016 مين هيحاسب مين بس العلمى الصح
د / عمرو عبد السميع :ده بيقولوه على السياسيين المصريين وأصحاب المقاعد فى المستويات العليا فى الوزارة يقول لك إنه دايما يربطنا بمشروع بعد 15 سنة بعد 20 سنة عشان يقعد ال20 سنة وللا ال15 سنة دول تبص تلاقيه يقول لك التعليم عام 2025 عشان الوزير يقعد لغاية 2025 انت ناوى تقعد كده
م/حسن صقر : الحمد لله طبعا ده تكليف رئاسى وطبعا كل الخطة اللى احنا عاملينها دى بيبقى مدروس فيها بصلاحيات لا تعتمد على الوزير المختص يعنى لا تعتمد على مين اللى موجود فى رئاسة المجلس القومى للرياضة أو حتى لا تعتمد على هل بقى مجلس قومى للرياضة وللا مجلس قومى شباب وللا بقت وزارة للشباب والرياضة هى تعتمد على بقت وزارة رياضة لا تعتمد على أى حاجة هى system اتعمل
د / عمرو عبد السميع : نظام اتعمل
م/حسن صقر : هو ده النظام وهو ده النجاح فى هذا المشروع إنه لا يعتمد على أسماء أشخاص لكن على مجموعات عمل كل واحد عارف طريقه ماشى إزاى
د / عمرو عبد السميع : ده وقت حوارك مع الشباب
م/حسن صقر : قوى
د / عمرو عبد السميع : هذا ضيفنا فاسألوه وحاوروه وناقشوه
جوزيف أنطون : جوزيف أنطون معيد بإعلام القاهرة الحقيقة يعنى على الساحة الرياضية يوجد العديد من القضايا التى تستحق المناقشة منها التعامل الخاطئ مع الملف الجزائرى من سنة 89 وحتى الآن ومنها إن مصر أصبح لديها عدد قليل من اللاعبين المحترفين على مستوى الساحة الأفريقية كلها لكن أنا لضيق الوقت هتكلم فى الموضوع الأكثر أهمية وهو أعتقد إن السبب فى حجم الكثافة السكانية عندنا مش متلائم مع حجم الإنجازات الرياضية المتحققة احنا كان عندنا المجلس الأعلي للشباب والرياضة ثم أصبح وزارة الشباب والرياضة والتى استمرت فترة ثم تم الانفصال ومعرفش ليه علما بأن الشباب والرياضة هم وجهان لعملة واحدة فالشباب لابد أن يمارس رياضة والفرق الرياضية سواء كانت رجال ، سيدات ، معاقين فالعناصر الأكثر فيها هى أيضا من الشباب فدلوقتى حاصل تضارب نيجى مثلا ناخد مثال أى مركز شباب هذه المراكز تهدف أساسا لتوفير ملاعب ونشر الرياضة فى القرى والأحياء والنجوع هنلاقى إن المجلس القومى للشباب يقوم بتحويلها إلى مراكز ثقافية ونشاطية تقوم بإدخال الكمبيوتر فيها ولا يهتم بالرياضة حتى لا يستولى المجلس القومى للرياضة عليه ماشى الكمبيوتر مهم لكن الكمبيوتر ممكن مزاولة يعنى نشاطاته وأموره فى المنزل ، فى الجامعة ، فى المكتبة فى السايبرس لكن هل ممكن بناء ملعب فى البيت أوفوق السطوح مثلا ما اعتقدش وبالتالى أصبح فيه خلل واضح وتضارب شديد ونفس الكلام على معسكرات الشباب الرياضية تم تغيير مسماها إلى مدن شبابية وأصبح المجلس القومى للشباب عبارة عن فرع من فروع الدعاية السياسية أو شعبة من شعب الدعاية السياسية للحزب الوطنى فين الرياضة نفس المشكلة إن الفصل ما بين المجلسين أدى إن كل مجلس يعنى الفصل ما بين الأجهزة الواحدة اللى ما زالت فى نفس مبنى الوزارة اللى عند نادى الترسانة كل مجلس أصبح بيقاتل من أجل استقطابه لمزيد من السلطات والاختصاصات والإدارت وبالتالى أضر هذا الفصل بين مجلسين
د / عمرو عبد السميع : عشان حضرتك ما جتلناش فى المرة الأولى جدول الأعمال ازدحم أهه
جوزيف أنطون : بالشباب وبالرياضة أضر بالاثنين محدش مستفيد أنا شخصيا شايف إن الحكمة كانت فى الفصل إيه إن التركيز على الرياضة عشان نحقق مزيد من الإنجازات أعتقد ما اتحققتش إلى الآن إنجازات ملموسة فى مجال تحديث البنية الرياضية والإنجازت اللى حصلت بنهى عليها لكن إنجازات سبق إنجازها يعنى أمم أفريقية احنا جبناها قبل كده 4 مرات قبل ال3 مرات دول يعنى الإنجاز مكرر أنا شخصيا أطالب بإعادة هيكلة الوزارة بحيث يتم توحيد فيها المجالين لتحقيق مزيد من الإنجازات الحقيقية
د / عمرو عبد السميع : تمام زميلتك
شيماء الخلفاوى : بسم الله الرحمن الرحيم شيماء الخلفاوى باحثة بوحدة دراسات الشباب وإعداد القادة كلية سياسة واقتصاد جامعة القاهرة حاصلة على بطولة القاهرة فى الملاكمة باسم نادى الانتاج الحربى هو السؤال بيقول ليه المنظومة الرياضية اللى فى جامعة القاهرة التابعة للمدينة الرياضية منظومة غير متكاملة والدليل على كده عدم وجود بعض الألعاب مثل لعبة الكونغ فو وحتى مع وجود بعض الألعاب بتكون ألعاب غير كاملة زى مثلا لعبة الملاكمة ملاكمة للرجال ماهياش مش فيها ملاكمة للنساء شكرا
أحمد حامد : أحمد حامد حسين بطل التايكوندو جامعة القاهرة معالى الوزير حضرتك كيف تكون الرياضة جسر تواصل بين الشعوب ، السؤال الثانى يعنى إيه انتماء رياضى يعنى إيه انتماء لمصر أو دور جهاز الرياضة
د / عمرو عبد السميع : انت اللى تقول لى يعنى إيه انتماء لمصر
أحمد حامد : مش فاهم لأن
د / عمرو عبد السميع : انت مش فاهم
أحمد حامد : أنا مش فاهم لإن حضرتك مفيش وسيلة فين الوسائل اللى تفهمنا احنا كشباب إيه هو الانتماء يعنى إيه احتراف رياضى يعنى إيه مشروع البطل الأوليمبى عايز أعرف الحقيقة
د / عمرو عبد السميع : زميلك
أحمد طه : بسم الله الرحمن الرحيم أحمد طه عبد الواحد بكالوريوس تربية رياضية جامعة الأزهر مشرف رياضى السؤال احنا عايزين ننهض بالرياضة فى مصر وعندنا تطلعات إن احنا نوصل للريادة فيه نظام اللى هو نظام الركود اللى هو البناء والتشغيل وإعادة الملكية عايز أعرف مدى تطبيق هذا النظام فى الأندية الرياضية وهل القانون يسمح بذلك وإذا كان يسمح بذلك هل يوجد عوائق تعيق مثل هذا النظام
د / عمرو عبد السميع : تمام زميلك
محمود عثمان : محمود عثمان بشكاى برلمان شباب بورسعيد أنا كنت عايز استفسر من سيادتك عن شئ وهو البطاقة الاحترافية للعيب اللعيب مثلا زى اللعيب عمرو زكى اللعيب بييجى من برة وبعدين نسمع أصل البطاقة اتأخرت ، اللعيب بيتمرن مع الفريق وما بيلعبش أصل البطاقة اتأخرت إيه السبب فى ده وازاى نقدر نحله
د / عمرو عبد السميع : تمام زميلك
أحمد عبد العزيز : أحمد عبد العزيز ليسانس حقوق جامعة القاهرة حضرتك فى حديثك قلت عن ردينجينيرو 2016 مع العلم إن البرازيل أيضا بتستضيف كأس 2014 بتستضيف أكبر حدثين رياضيين بيشهدهم العالم فى عامين يعنى الفارق الزمنى بينهم وبين بعض عامين فقط مع العلم إن البرازيل دولة نامية زيها زى مصر من مجموعة الدول ال 15 الأهم فى الدول النامية فمتى سيصبح لمصر منشآت رياضية تستطيع استقبال الأحداث الرياضية الأهم فى العالم فى كأس العالم أو بطولة الألعاب الأوليمبية شكرا
د / عمرو عبد السميع : تمام زميلك
الجبالى عبد المجيد : الجبالى عبد المجيد دكتوراة الإدارة الرياضية حضرتك فى ظل الأساليب الإدارية الحديثة اللى بنسمع عنها زى إدارة الوقت اللى هى إعادة هندسة العملية الإدارية والإدارة الاستراتيجية هل بدأ المجلس القومى للرياضة بتطبيق الجودة الشاملة فى قطاعاته وصولا إلى الاعتماد
د / عمرو عبد السميع : سؤالك هايل بس ليه بتقراه من ورقة زميلتك
أميرة محمد : أميرة محمد إعلام القاهرة دلوقتى المجلس القومى للرياضة بيشرف على جميع الهيئات الرياضية والأندية طب ما هو فى نفس الوقت ما لهوش سلطة على الأندية دى يعنى مفيش لوائح ونظم صارمة للاحتراف مثلا وده شفناه فى أزمة اللعيب جدو
د / عمرو عبد السميع : تمام زميلك
الطالب / محمد عثمان : محمد عثمان إبراهيم طالب بكلية تجارة جامعة الأزهر القاهرة دلوقتى بيتم صرف على اللاعيبة ملايين وملايين دون حدود معينة بعد ما دلوقتى أصبحت كل قناة فى مصر منظمة تجارية فى المقام الأول فأنا عايز أعرف بس إيه سياسة المجلس القومى للشباب المجلس القومى للرياضة فى الحد من هذه المشكلة
د / عمرو عبد السميع : تمام إجابات وتعقيبات المهندس حسن صقر
م/حسن صقر : بالنسبة للأستاذ جوزيف بالنسبة للموضوع اللى هو موضوع الملف الجزائرى ده ملف واتقفل لكن استفدنا منه كثيرا استفدنا منه أد إيه لابد إن احنا نشتغل كهيئات مختلفة داخل مصر زى ما شرحت فى الأول مع وزارة الخارجية مع الجهات الأمنية مع كل الكوادر إزاى يكون عندنا البعد الأمنى بجانب البعد الرياضى ازاى يكون عندنا حتة الوعى بالنسبة للرياضيين سواء اللعيبة أو المسئولين عن الاتحادات الرياضية فى هذا الموضوع ده اللى احنا بنهتم به على التوازى هناك مسئولية زى ما ذكر الدكتور عمرو على الإعلام لاتقل أهمية بالعكس يمكن أكثر لإن اللى انت ممكن تعمله فى المحاضرات فوق مع اللاعيبة أو فى اللقاءات توعية ممكن برنامج واحد لمدة نص ساعة يبوظ لك الدنيا كله يغير ويرجعك مربع رقم واحد فدى منظومة كلها متكاملة أحب بس أقول لحضرتك عليها لكن حضرتك ظلمت برضه الرياضة فى حاجة حجم الإنجازات هو طبعا غرض الرياضة الفصل بين المجلس القومى للرياضة والشباب التخصص فى الرياضة ما كانش إنى من أول يوم أجيب ميدالية أوليمبية ما ينفعش إن أنا أختزل الرياضة كلها فى ميدالية أوربية ما ينفعش الرياضة لها حاجات كثيرة أساسية أهمها البنية الرياضية الأساسية للى حضرتك اعترفت أو اقتنعت إنها موجودة وابتدت تتكاثر ولكن دى هتسمع معاك كمان أد إيه محتاجة وقت الحاجة الثانية اللى هى عن التوازى عشان نقدر نوصل فى النهاية لقطاع البطولة اللى هى الأوليمبى لابد وده التنسيق اللى شغالين فيه دلوقتى للرياضة المدرسية إنها تتواجد بكثافة زى زمان الملاعب حصص الألعاب مدرس تربية رياضية دى منظومة جارى دراستها وتنفيذها مع الدكتور أحمد زكى بدر وزير التربية والتعليم نفس الشئ تطلع للجامعات مع الدكتور هانى هلال والرياضة الجماعية وزير التعليم العالى عايز أقول لك دى منظومة متكاملة احنا بنعالج بها بعض السلبيات اللى كانت موجودة قبل كده بس دى جزء لا يتأصل من المنظومة اللى توصل بها لقطاع البطولة العالمية والدولية لكن ده لا يمنع إن احنا شغالين على أعلى مستوى نظمنا الدورة العربية وأحسن تنظيم ونجحت نجاح باهر برئاسة شرفية لسيادة الريس وحضور مجموعة من الملوك ورؤساء الدول فى هذه الدورة 8000 لاعب ولاعبة كان فيه إدارى 3500 متطوع
د / عمرو عبد السميع : دى دورة نظمها المهندس حسن وقت ما كان لسة جاى إلى منصبه
م/حسن صقر : لسة بنقول أهه وبعدين تنظيم 2006 كان فيه مجموعة قبل ما آجى هى اللى نظمتها ونجحت بس فى وقت المجلس القومى فريق الكرة كسبها ما نقللش من الإنجازات الرياضية لإن احنا كسبنا فى البحر المتوسط فى بسكارا فى السنة اللى قبل اللى فاتت 14 ميدالية ؛ 14 ميدالية ذهب وإجمالى 34 ميدالية مختلفين ده بحر متوسط يعنى ثانى أو ثالث بطولة بعد الأوليمبيات مش وحشين يعنى احنا مش بهذا الضعف ولكن عندنا طموحات أكبر آه ، عندنا فكر اللى هو الزيادة السكانية من ناحية الاستغلال أكثر وده اللى شرحته فى الأول هنشتغل على مستوى 40 و 50 ألف و 60 ألف ده اللى هنشتغل عليه فى المحافظات هيبقى فيه استبدال على مدار سنوات طويلة نوصل بها للتميز الرياضى آخر حاجة فيها البطل الأوليمبى لكن لو مفيش ميدالية أوليمبية على الأقل يبقى فيه رياضة يبقى فيه بطولات عالمية يبقى فيه كذا يبقى فيه كذا وأنا لو عندى كل هذا القطاع لازم هوصل للميدالية الأوليمبية ما ينفعش أبقى أنا أحصل على جائزة نوبل وأنا ما عنديش حد بيقرأ ويكتب لازم يكون عندى دراسات لهذا الموضوع وأنا بشكرك على السؤال ده ، الأستاذ أحمد حمدى الانتماء الرياضى يعنى أنا مستغرب من سؤال حضرتك مش عارف يعنى إيه انتماء رياضى ولا انتماء لمصر
د / عمرو عبد السميع : ده أنا هصلح ده بيقول لحضرتك الانتماء الوطنى مش عارفه كمان
م/حسن صقر : يعنى هو النهاردة
د / عمرو عبد السميع : انت بتيجى تقعد معايا كثير على فكرة
م/حسن صقر : يعنى كون إنك انت تبقى فى غربة وتحس إن بلدك بتنتصر أو انت حتى قاعد فى وسط بلدك وتحس إن مصر بتتفوق فى مجال علمى زى ما بيقولوا الدكتور زويل مثلا وللا الدكتور مجدى يعقوب مجالات مختلفة فالرياضة نفس الشئ عندنا أبطال أوليمبيين عندنا أبطال عالميين بتحس بقيمة بلدك فى مجال الرياضة ده إحساس داخلى جواك لازم إنك انت تحس بحلاوته ما ينفعش واحد يعلمه لك فى الكتب لازم انت تحس به من واقع إنك تقعد فى ماتش وتهتف وتقعد فى ماتش وتحيي دى قضية وحدوتة لازم أبناءنا كلهم يحسوا إن احنا البلد محتاجة إن احنا نحس بها ونحبها زى ما هى بترعانا مصر بلد كبيرة ومصر عطاءة ، الأخ أحمد طه بتكلم على نظام المشاركة القطاع العام والقطاع الخاص وحقوق الملكية والإيجار التمويلى والحاجات دى أنا معاك فى الموضوع ده وده من توجهات المجلس القومى للرياضة فى حاجة اللى هو ازاى إن احنا نستثمر فى الرياضة ، الرياضة بقت صناعة
د / عمرو عبد السميع : الباشمهندس نموذجى فى الحكاية دى ليه لإنه بيرأس هيئة قومية أو مؤسسة قومية وجاى من القطاع الخاص
م/حسن صقر : يعنى الاستثمار ده يعنى هى الفكرة كلها فى إيه انت إزاى تعظم المنتج اللى معاك الرياضة صناعة فى كل الدنيا ازاى تستغل اللعيب وتوصله لمرحلة إنك انت تجيب رعاة وازاى إنك انت المنتج الرياضى ده إنك انت تشغله بطريقة اقتصادية طبعا مع مراعاة الناحية النفسية والناحية الإنسانية فى هذا الموضوع لكن فى النهاية مرجعية هذا الموضوع ممكن نجيب شركات متخصصة لإدارة بعض المنشآت الرياضية شركات متخصصة فى تسويق المنتج الرياضى فى تسويق ال" الحدث"events اللى هى الأحداث الرياضية الإعلامية إزاى نعمل أحداث كثيرة يعنى لو احنا عندنا بطولات بتتعمل فى مصر زى مثلا كأس أفريقيا ده 4 مرات فى السنة اتفرج انت على الناس هتبقى عاملة ازاى فى الشوارع مرة كل سنتين لكن احنا بنسوق حاجات بنسوق منتج وده توجهنا إن الرياضة تصرف على نفسها فى المستقبل القريب إن شاء الله ونشيل عبء عن كاهل الدولة فى هذا الموضوع ده توجه مهم لهذا الموضوع الأستاذ محمود عثمان احتراف اللاعبين أنا أتفق مع حضرتك إنه محتاج وقفة واحنا طبقا لتعليمات الفيفا عندنا سنة 2012 عشان نطبق نظام الاحتراف فى كرة القدم ده لا يمنع إن هناك احتراف فى كرة السلة وكرة الطائرة وكرة اليد إلى آخره والرياضات الأخرى كلها هنا تنظيم الاحتراف مهم جدا وما يبقاش بس اللعيب ياخد فلوس إيه هى الحقوق وما هى الواجبات ما يبقاش بس إنه بياخد فلوس وما انتاش بتاخد منه حاجة ولا عارف تحاسبه لازم أنا زى ما بدى زى ما باخد زى ما بنفق عليه والدولة زى ما انتوا شايفين لما سيادة الريس يستقبل فريق الكورة الصبحية فى المطار وبعد الظهر يدعوه لتسليم أوسمة فى مقر رئاسى فيه إيه اهتمام أكثر من كده لما تكون الدولة متمثلة فى سيادة الريس السيد رئيس الوزراء موفر الدعم من خلال الحكومة وعندنا شغل كبير جدا فى المرحلة الحالية والقادمة يبقى لابد إن احنا نقول إن يبقى فيه استغلال أكبر لكل المراحل ده اللى أنا بقوله ده لا يمنع إن الاحتراف لازم يتنظم ولازم يتعمل بطريقة فعلا شوف الدنيا ماشية ازاى احنا مش هنألف نشوف الدنيا برة ماشية ازاى وبعدينا نضبطها على الحالة الاجتماعية وحالتنا فى البلد اللى هو ظروف الاجتماعية بتاعتنا إيه اللى ينفع وإيه اللى ما ينفعش يعنى ما اجيش مثلا مراهنات لا ما تنفعش المراهنات فى مصر الدين بتاعنا والشريعة بتاعتنا لا تسمح سواء الدين الإسلامى وللا المسيحى أو أى دين فى مصر ما ينفعش يبقى لازم نوجد بدائل إن احنا ازاى نجيب تنمية للموارد بحيث يكون وسائل الإعلام لها دور كبير فى هذا الموضوع
د / عمرو عبد السميع : بعض رجال الأعمال فى السياق ده فين؟
م / حسن صقر : ده لهم دور كبير قوى
د / عمرو عبد السميع : وللا هم منشغلين شوية بأمورهم يعنى؟
م / حسن صقر : يا دكتور عمرو رجال الأعمال فيه فعلا مجموعة منهم مهتم جدا بالرياضة
د/ عمرو عبد السميع : شفت حضرتك فيه مجموعة منهم لإنهم مجموعة قليلة أنا عارفها
م / حسن صقر : ما هى ثقافة
د / عمرو عبد السميع : لكن أنا بتكلم عن وهى ثقافة تدخل فى لحم وعظم فكرة الانتماء الوطنى اللى بيسأل عنها ابنى ده
م / حسن صقر : هو ده الكلام صح يعنى هى مجموعة أنا النهاردة بحب مصر وبنتمى لمصر أنا رجل أعمال أدعم حاجة أدعمها فين أدعمها فى مجمع
د / عمرو عبد السميع : عشان الشاب ده يعرف يعنى إيه معنى الانتماء الوطنى لازم يشوف
م / حسن صقر : بالضبط كل واحد فى تخصصه إيه اللى بيديه لمصر مش إيه هو اللى بياخده من مصر انت لازم تدى حاجة وقصادها تحس بقيمة البلد اللى انت عايش فيها ، أستاذ أحمد عبد العزيز المنشآت الرياضية العالمية مصر عملت حجم من المنشآت على الاستاندرد العالمى والنهاردة احنا مؤهلين لاستضافة بطولات كثيرة فى هذا الموضوع ده لا يمنع إن احنا محتاجين وقت برضه ما يبقاش إن أنا يعنى ما تطلعش سلم 5 درجات درجة درجة يعنى احنا نظمنا بطولة عربية بطولات أفريقية ربنا يوفقنا فى البحر المتوسط لو ربنا وفقنا واشتغلنا كلنا مع بعض ونتوفق فيها هتبقى دى خطوة مهمة إن احنا نخش على أوليمبيات أو على بطولةعالم ثانى ناشئين قصدى فريق أول كرة قدم زى ما نظمنا 2009 مونديال الشباب فى كرة القدم ومصر نجحت نجاح باهر بأيدى مصرية مجموعة من المصريين
د / عمرو عبد السميع : انتوا عارفين إن احنا عملنا رقم قياسى فى عدد الجمهور اللى بيحضر البطولات دى للتنظيم
م / حسن صقر : بالضبط أكبر رقم كان فى كندا كان مليون احنا مليون و 200 ألف زيادة يعنى حوالى 20 ، 30 % وده record وجوزيف بلاتر رئيس الاتحاد الدولى الفيفا وقف فى حفل الختام قال مصر لو كانت بهذا الشكل من سنوات قبل كده تبقى مؤهلة وهى ستكون مؤهلة مستقبلا لهذا الموضوع هو انبهر بالتنظيم خلى بالك مش منشآت رياضية بس كوادر التنظيم ، تنظيم المنظمات رجال الأعمال اتعودوا إن هم بيدى إيه وياخد إيه أدام بالنسبة لعطاؤه لمصر هى منظومة كلها متكاملة فهى المنشآت الرياضية
د / عمرو عبد السميع : آخر نقطة يا باشمهندس
م / حسن صقر : أميرة قالت على إدارة الوقت ودى حاجة مهمة جدا أنا عايز أقول إن فيه تايم management فى كل مشروع ما أنزلش ناس فى التدريب كده وأنا مش عارف هيعملوا إيه فى التدريب ولا يعرفوا إن هم هيحققوا بطولات إيه ولا هيحققوا المجهود هيطلع بعد شهر بعد سنة بعد 10 كل حاجة بدراسة زى ما قلت الرياضة بقت صناعة بقت علم بقت دراسة بقت لها أبحاثها مجموعات العمل كلها بتتناسق فيها وتتكاتف فيها
د / عمرو عبد السميع : مهندس حسن صقر يعنى إيه كلمة وطن
م / حسن صقر : الوطن هو الأم
د / عمرو عبد السميع : الوطن هو الأم والنقاش مستمر وحالة الحوار قائمة وعلى لقاء إن شاء الله