الدسوقي رشدي: «نقول إيه للأحزاب اللي وزعت علم السعودية في عيد تحرير سيناء»

وصف الإعلامي محمد الدسوقي رشدي، الأسبوع الماضي ب«أسبوع اللخبطة» بامتياز وجدارة، موجهاً حديثه إلى المشاهدين قائلاً: «ربنا يكون في عون حضراتكم، وجهازكم العصبي على اللي شافه الأيام اللي فاتت، كل واحد كان قال حاجة عمل عكسها الأسبوع ده، والهوى هو اللي كان غلاب، بس مش هوى الحب ولكنه هوى المصلحة الشخصية أو الحزبية».
وأضاف الدسوقي رشدي، خلال برنامج «قصر الكلام»، المذاع على قناة «النهار»: «تنزل الشارع يوم 25 أبريل تلاقي المصريين يحتفلون بعيد تحرير سيناء، وبدل ما يرفعوا علم مصر رفعوا علم السعودية، والأجدد من كده هو إن اللي بيتظاهر بعلم السعودية، كانت الشرطة بتفتح الشوارع والميادين، واللي كان بتظاهر بعلم مصر كان محل قلق وتوتر وشك من قبل الأمن اللي قفل في وشه الميادين والشوارع، والأجدد كمان هو إن اللي رفعوا علم السعودية هم نفسهم المواطنين إللي كانوا غضبانين في سبتمبر 2014، عشان الشرطة السعودية قبضت على أربعة مصريين عشان رفعوا علم مصر وقت احتفالات المملكة بالعيد الوطني بتاعها، شوفت إهانة أكتر من كده».
وتابع الدسوقي رشدي: «تصرف المواطن البسيط كن معبر عن فرحة لوقفة السعودية بجانب مصر وقت الشدة، نختلف معاه ولكن نضعه في حجمه، ولكن نقول إيه للنواب والسياسيين والأحزاب إللي وزعوا اللي نظموا احتفالات يوم 25 إبريل، ووزعوا أعلام السعودية بجانب أعلام مصر، زي ما عمل شباب المستقبل وبعض النواب».
واستكمل الدسوقي رشدي: «طيب تعمل إيه لما تلاقي سياسيين وإعلاميين ونواب بيقولوا على ده إنه عادي، وإيه اللي هيحصل لما يرفعوا أعلام السعودية، وطبعاً نقوله عادي، عشان كله برتقال وكله في الليمون، بس إللي مش عادي إن دول هم نفس الإعلاميين والسياسيين إللي صرخوا لما السلفيين رفعوا أعلام السعودية في جمعة قنداهار الشهيرة، إذن هو اسبوع اللخبطة بامتياز».