حوار| النائب عاطف عبدالجواد: معارضو قرارات الرئيس «خونة عاوزين يحرقوا البلد»

أثار تصريحه حول قضية جزيرتي "تيران وصنافير"، حينما قال "لو السعودية عاوزة جزيرتين كمان ياخدوهم"، ردود أفعال واسعة خاصة بين رافضي "التنازل" عنهما.. النائب البرلماني عن محافظة بني سويف، عاطف عبدالجواد، العضو بائتلاف دعم مصر، أعلن خلال حوار مع "التحرير"، رفضه "الخروج" على الرئيس عبد الفتاح السيسي، من قبل أفراد يريدون إسقاط النظام بالاتفاق مع جماعة الإخوان وقوى الشر، ووصفهم ب"المخربين اللي عاوزين يحرقوا البلد"، وإلى نص الحوار..
كيف ترى المظاهرات الرافضة للتنازل عن الأرض خلال ذكرى تحرير سيناء؟
أرفض خروج أي مظاهرة حاليًا، وأنا متواجد في جنوب سيناء ضمن احتفالية القوات المسلحة بعيد تحرير سيناء، واللي عاوزين يتظاهروا النهاردة عاوزين يحرقوا مصر؛ لأنهم خارجين مخصوص علشان يهتفوا إن الريس باع البلد، وإن الناس انتخبت جواسيس لإسرائيل والسعودية .
وما تعليقك على حديثهم حول التظاهر رفضًا للتنازل عن الجزيرتين؟
أنا مع الشعب وإحنا كنا بنبكي إمبارح في سيناء، ومحدش يزايد على وطنية الرئيس، وإذا كنا هنخون السيسي والرموز الوطنية والجيش، معنى ذلك إننا هنخون كل الناس اللي اختاروه رئيسا لمصر، وبعدين لا حد هيبيع حد، ولا حد هيشتري حاجة، ثم هل من العقل أن نصدق أن في حد في مصر من القوات المسلحة ممكن يبيع أرضه، أو يفرط في ذرة رمل منها، والرئيس السيسي لما وقع على اتفاقية ترسيم الحدود مع السعودية، شاف مستندات من كل الجهات تؤكد إنها مش مصرية، وراحت له وثائق تؤكد إنها ملك للسعودية، وعلشان كده ردلهم أرضهم.
وماذا عن تصريحكم السابق إن "لو السعودية عاوزة جزيرتين كمان ياخدوهم"؟
بلاش شغل التسخين في الإعلام، ونهتم بمصلحة الوطن شوية، وإحنا عندنا ناس في بني سويف بتموت على حقنة، وتصريحى السابق مجرد كلام سياسة، وإحنا لازم نحافظ على أسلوب الود في الحوار مع السعودية؛ حتى لا نخسر أقوى حليف عربي مع مصر، لكن لما نقعد ويثبت إننا فرطنا في شبر واحد من أرضنا ساعتها بس حاسبوني، وبعدين الاتفاقية لسه هتعرض على البرلمان، وهو وحده اللي هيقرر بالموافقة أو الرفض.
هل تتوقع رفض البرلمان للاتفاقية؟
غير مستبعد، والبرلمان ممكن يرفض الاتفاقية، وسوف نعقد جلسة طارئة تحت القبة لاستدعاء كل مصري عنده مستند رسمي بمصريتها؛ للوصول لقرار نهائي حول الإتفاقية، وولادي بيقولوا لي إن قناة "أون تي في" جايبة أكتر من 17 وثيقة رسمية تؤكد إن الجزيرتين مصريتان، وإحنا ممثلين عن الشعب واستحالة نفرط في أرضنا، ولا في مصري هيقبل بكده بس بلاش مظاهرات دلوقتي.
وماذا عن عشرات الوثائق الرسمية التي تثبت مصرية الجزيرتين؟
كل الأدلة والشهادات والأوراق بتقول إنها سعودية، وإمبارح خطب فينا الدكتور مفيد شهاب، خلال احتفالية جنوب سيناء في ذكرى تحرير الأرض، وكان واحد من اللي استردوا طابا عبر التحكيم الدولي، وأكد أنهما سعوديتان، ومفيش مستند رسمي واحد يؤكد إنهما ملك مصر، وفي الحالة دي لازم نسمع لكلام الناس اللي فاهمين ودارسين القانون كويس.
هل ترى تقديم العلاقات الاستراتيجية مع السعودية على حساب الأرض؟
لا تفريط في الأرض، ومصر ليست مستفيدة من الجزيرتين، ولا حد كان يعرف مكانهما من الشعب المصري قبل كده، وبعدين دول كانوا وديعة عندنا ورجعوا لدولة عربية وإسلامية شقيقة إيه المشكلة في كده.
هل ترفض خروج تظاهرات اليوم بشعار "ضد بيع الأرض"؟
أنا أصلا ضد المظاهرات كلها، واللي بيعارضوا قرارات الرئيس وبيخونوه وبيصفوه إنه جاسوس لإسرائيل والسعودية، ممولين ومأجورين وخونة وعاوزين يحرقوا مصر.