الليثي لمحافظ الإسكندرية: «بدل ما تتصور سيلفي.. خد بالك من الغلابة»

قال الإعلامي عمرو الليثي، إن "الأسعار ما زالت في ارتفاع، والمياة مقطوعة في العديد من الأماكن، وبخلاف كل هذا، تخبط الحكومة ما زال مستمرًا، فيعد أن قالوا الأسبوع اللي فات إن في ضريبة على السجائر، خرج مسئول من الحكومة ونفى الخبر، وبعدها بعشر دقايق طلع مسئول ثالث وأكد الخبر، وهكذا"، حسب تعبيره.
وأضاف الليثي، خلال تقديمه لحلقة الجمعة، من برنامج "واحد من الناس"، المُذاع عبر فضائية "الحياة"، قائلًا "ما تفهمونا، مين اللي بياخد القرارات؟ ولا هي حكومة جواها حكومة؟ الحقيقة الناس فاض بيها من الحكومة وأفعالها، ومش هتكلم أكتر من كده عشان الحكومة بتزعل مننا أما بننتقد، مع إن كل ده عشان مصلحة البلد".
وعن أداء المحافظين، قال الليثي: "محافظ الإسكندرية الوسيم، هانى المسيري، قرر إنه يكون عصري جدًا، وركب التروماي وأخذ صورة سيلفي مع الركاب، يا سلام! سلوك جميل، بس يا ريت يا سيادة المحافظ تكون سمعت الناس وعرفت مشاكل المحافظة إيه، ويا ريت كمان لو سيادتك تكون روحت ركبت القطار بتاع أبو قير، بتاع الغلابة، عشان تعرف الناس عايزة إيه".
واستكمل: "عايز أقولك يا سيادة المحافظ، خد بالك من إسكندرية، لأنها من بره هالله هالله ومن جوه يعلم الله، وحضرتك عندك عجلة لطيفة جدًا ممكن تاخدها وتلف في شوارع إسكندرية عشان تعرف أحوال الغلابة إيه، لأنها لا تسر عدو ولا حبيب".