خبيرة الأعمال اليدوية أميرة أيوب ل التحرير: كوني مختلفة وجريئة.. بالاكسسوارات الخشب والجلد والقماش الملون

اللون الأزرق المخضر في الاكسسوارات موضة هذا الصيف.. ويتماشى مع ألوان كتير من الملابس مثل البنفسجى والفوشيا والبرتقالي والأحمر
والجلد له ألوان أساسية لا تنتهي موضتها أبدا هي "البني والبيج والأسود والطوبي" وتتكرر هذه الألوان في جميع المواسم
كتبت- سارة حسين:
"الاكسسوارات والشنط".. مهما كان لبسك أنيق ومختلف أكيد الحاجتين دول بيمنحوكي إطلالة أفضل وبيظهروا جمال الملابس التي ترتدينها بصورة أكبر خصوصا إذا كانت هذه الإكسسوارات والشنط مبتكرة زي مثلا أنها تكون مصنوعة من "الجلد والخشب والنحاس".
عمرك جربتي تلبسي سلسلة أو غويشة "جلد أو خشب"؟!.. خبيرة الاكسسوارات والشنط المصنوعة يدويا وخريجة كلية الفنون الجميلة، أميرة أيوب، قالت ل"التحرير" إن الشنط الجلد الطبيعي والاكسسورات وتشمل السلاسل والحلقان والغوايش المصنوعة من الجلد الطبيعي أيضا أو الخشب أو النحاس أو القماش الملون موضة رائجة هذا الصيف.
ونفت أميرة ما قد يتبادر إلى أذهان الفتيات اللاتي يقرأن هذا الموضوع، من أن هذه الاكسسوارات ربما تكون غير مريحة عند وضعها. أميرة أضافت أن الألوان الأكثر رواجا في هذا النوع من الإكسسوارات هي النبيتي والبنفسجي والفسدقي. مستطردة أنه بالنسبة للجلد توجد ألوان أساسية لا تنتهي موضتها أبدا مثل البني والبيج والأسود والطوبي حيث تتكرر هذه الألوان في جميع المواسم.
ينبغي أن يكون لدى كل فتاة مجموعة أساسية من الاكسسوارات لا غنى عنها يوميا سواء صباحا أو مساءا وهي: حلق تتداخل فيه عدة ألوان، غويشة أو أسورة بلون محايد، شنطة كروس بحجم متوسط، بحسب أميرة. ولفتت إلى أن هذه الأشياء بيمنحوا تميز للفتاة التي تضعهم لأن ستايلهم بيكون مختلف.
أشارت أميرة التي تمتلك ورشة خاصة لتصنيع هذه الاكسسوارات إلى أنها تفضل الطابع العربي لأن الفن العربي غني جدا بالإلهام والجمال الذي لو حاولنا سنين لن نصل إلى نصف إبداعه، على حد قولها.
وتابعت أميرة في حوارها مع التحرير أن النوع ده من الاكسسوارات بيليق على معظم أنواع الملابس حاليا لكن طبعا مش كله وده بيتعمد على التصميم والبساطة التي تجعل الاكسسوارات مناسبة لمعظم الوقت.
بالنسبة للمحجبات، قالت أميرة أن حجاب البنت بيفرض عليها مثلا عدم وضع حلق، لكن ممكن تعويضه بسلسلة كبيرة أو طويلة مع أساور متعددة. وعن علاقة حجم البنت بنوعية الاكسسوارات التي تضعها، أشارت أميرة إلى أنه يفضل للجسم الصغير عدم وضع اكسسوارات ضخمة بالذات في الشنط، والعكس بالنسبة للجسم الكبير.
هناك بعض الفتيات يضعن اكسسوارات كثيرة جدا احيانا بيكون شكلها متناسق وأحيانا مقزز ومتعب للعين، وعن هذه النقطة أوضحت أميرة أن ده بيرجع لكل بنت ساعات بنشوف بنات لابسين كذا خاتم وساعة وكذا سلسلة في نفس الوقت، وده في الواقع بيعتمد على الأحجام يعني لو الخاتم صغير يبقى ليه ما نلبسش كذا واحد، أما لو ضخم فيفضل اثنين ع الاكثر في اليد الواحدة.
وطبعا ساعات كتير بيكون التنويع فى القطع جنب بعض حلو بالذات فى أساور اليدين، وده بيختلف من نوعية ملابس لأخرى يعنى الكلاسيك ستايل غير العربي أو الغجرى. وتابعت أميرة أنه يمكن الدمج بين قطعة من مجموعتك وليكن خشب مع أي قطعة إكسسوار أخرى سواء ذهب صيني أو بلاسيتك أو فضة إلخ.
أميرة أيوب.. "المطلوب والمحظور" عند اختيار الاكسسوارات المناسبة
1- البنت الطويلة يفضل لها السلاسل الطويلة والأساور العريضة
2- لو بشرة البنت غامقة يستحسن تلون فى لبسها واكسسواراتها أو علي الأقل تبعد عن الألوان الغامقة.
3- البنات الى حجمها مش كبير وإيديها رفيعة أحسن حاجة ليها إنها تصغر فى حجم اكسسواراتها من الحلق للسلسلة أو الشنطة
4- لو الرقبة قصيرة لا أفضل الحلق يكون طويل يفضل الحلقان الصغيرة او الاستغناء عن الحلق بسلسة فيها شغل و طولها من متوسط لطويل مع لبس بلوزات مفتوحة فتحة سبعة ساعات بتدى طول للرقبة
5- الالوان زى البنى والنبيتى والجملى والبيج دايما بتضيف روح وحياه للملابس فمثلا الاحسن ان شنطتك على جزمتك والحزام والاكسسوارات يكونو فيهم اختيارات الالوان دى
6- لو نازلة الصبح وحاسة انك ممكن تخرجى بليل الشنط الكبيرة دايما حل رائع لده، ممكن يكون جواها اكسسوارات وشنطة صغيرة تاخدى فيها حاجاتك المهمة وتستغنى عن الكبيرة
7- نحافظ على الاكسسوارات جديدة سواء كان خشب أو جلد بحيث ميقرش او يتشقق وخصوصا النحاس لأنه لونه بيسود بسرعة او لو جيه عليه ميه.. احسن حاجة لتنضيف النحاس يتنضف بشوية خل وسلك الومنيوم صغير ويتمسح عليه بالراحة
8- لو ميزانيتك صغيرة ممكن تشترى بنسة حجم صغير وتستعملى الحلى بكذا طريقة يعنى الحلق ممكن يتفك ويتحول لسلسة او يتعلق فى جلد ويكون اسورة سعر البنسة 5 جنيه وهتنفعك كمان فى تصليح اكسسوراتك المكسورة.
9- ليس هناك اكسسوارات لكل عمر لأن ده مرتبط أكثر بستايل كل سيدة على حدى. يعنى عادة النساء الكبيرات فى السن مبيحبوش يلبسو الوان مبهرجة كتير لكن فى نفس الوقت بيحبو برضو التجديد والابتكار فى حدود الالوان المناسبة ليهم.
10- الاكسسورات الخشب دايما موضة فى الصيف كل ما البنت تلون فى اكسسوراتها كل ده ما بييديها مزاج احسن, للصيف ده انصح باللون الأزرق المخضر لاضافته مع الوان كتير من اللبس زى البنفسجى والفوشيا والبرتقالي والاحمر لأنه بيليق على كتير من الالوان و بيدى لوك منعش وشبابى.
إكسسوارات أميرة أيوب