أحدث صيحات الموضة لشتاء وخريف 2010.. مع إيمان أيوب (2)

أهلاً بيكم معانا في حلقة جديدة من حلقات "إنت أجمل مع إيمان أيوب" والنهارده هنكمل كلامنا عن الموضة والأزياء لشتاء وخريف 2010 وهنعرف مع بعض أحدث الخطوط والألوان والقصات اللي بتميّز شتاء 2010وهنبدأ كلامنا بموضة الملابس.. تعالوا نشوف مع بعض...
البنطلونات الجينز
بالنسبة للبنطلونات الجينز هنلاقي إن موديل البنطلون اللي كله ضيق أو "السليم" لسه موضة، وهو مناسب جداً لفترة الصبح واللبس الكاجوال، وطبعاً في دلوقتي ألوان كتيرة من البنطلونات الجينز زي الموف والتركواز يعني مش لازم نقيد نفسنا بس في الأزرق والأسود.
وممكن إننا نلبس بنطلون جينز عليه شغل، ونلبس من فوق بادي سادة، وكمان نقدر نلبس الجينز مع بادي سواريه لو عندنا سهرة أو مناسبة.

البنطلونات الكلاسيك
السنة دي هنلاقي إن فيه موديلات وقصات كتيرة من البنطلونات الكلاسيك، وزي ما هنشوف في الفيديو إن فيه موديل لبنطلون كلاسيك شيفون وله بطانة، وفيه موديل تاني لبنطلون قماش عادي والرجل من تحت كأنها بنطلون ليجينج وده استايل جديد.. وكمان موديل البنطلون الواسع كله موضة أوي.

البالطو لإطلالة أنيقة
طبعاً البالطوهات من الحاجات الضرورية جداً في الشتاء؛ لأننا ممكن نلبسه على أي حاجة عندنا علشان يشعرنا بالدفء وفي نفس الوقت بيدينا شياكة وأناقة.
والبالطو من الموديلات اللي بتناسب كل الأعمار وكل الأذواق وبتناسب كمان المحجبات.
والسنة دي فيه تنوع كبير في موديلات البالطوهات وخاماتها ففيه منها الجلد والفرو.. وممكن إن البالطو يكون سادة أو ملون أو كاروهات.
والبالطوهات الطويلة بتبقى حلوة أوي في اللبس، وممكن الرقبة بتاعتها تكون عالية أوي ويتقفل كله بالزراير.

إضغط لمشاهدة الفيديو:

السواريهات
موضة السنة دي بالنسبة للسواريهات هي البساطة يعني مش شرط إن الفستان يكون فيه تطريز كتير، لكن الأهم إن الألوان تكون جذابة وهنلاقي إن فيه ألوان كتيرة للسواريهات زي البيستاج والبينك، وفيه موديلات لفساتين سواريه طويلة أو قصيرة، وطبعاً كل واحدة بتختار اللي يليق عليها.
وطبعاً مش هننسى التاييرات واللي بتبقى حلوة أوي في اللبس وبتدي شياكة وتألق.

وكده خلص كلامنا عن موضة الملابس.. ودلوقتي تعالوا نتكلّم شوية عن الإكسسوارات..

الإكسسوارات ممكن نلاقي منها أشكال كتيرة أوي وفيه منها الفضي والذهبي، وكمان في إكسسوارات بتحتوي على أحجار ملونة زي الأحمر والأسود والأخضر والفوشيا والموف والأبيض.
والإكسسوارات دي ممكن تستخدميها لو عايزة تغيّري من شكل لبسك أو لو لابسة حاجة سادة خالص.
وكمان الأحزمة بتعتبر من الإكسسوارات المهمة وبيكون لها أشكال وألوان مختلفة وبتبقى حلوة أوي مع الجينز.

إضغط لمشاهدة الفيديو:

ولو عايزة تشوفي الجزء الأول من الموضوع دوسي هنا

ولغاية هنا حلقتنا خلصت النهارده..
ونتمنى إنها تكون عجبتكم..
واستننونا في الحلقات الجاية...
سلام،،،،