جمالك بالألوان مع "جيلان".. الألوان السادة شياكة وأناقة

أهلاً بكل أصدقائي، وبجد وحشتوني جداً، وعايزة أشكركم على رسايلكم الجميلة اللي بعتوها ليّ طول الفترة اللي فاتت، وأتمنّى إني أفضل دايماً عند حُسن ظنكم..
النهارده هنشوف مع بعض موديل عبارة عن سروال بيج واسع، وعليه من فوق بوليرو بيج مفتوح من الظهر، وعلى الوسط حزام بيج علشان يدّي تحديد شوية للوسط.
وضفت على البوليرو البيج ده بوليرو تاني لونه بطيخي مقفول وبأكمام منفوشة شوية؛ لأني مش بحب إن البنت المحجبة تلبس استايلات مفتوحة من الظهر وضيّقة؛ لأن شكلها بيكون لافت، وحبيت أضيف إسكارف بيج من فوق كإكسسوار.
وزي ما هنشوف إن الطقم ده ألوانه كلها سادة، والخامات السادة عامةً بتليق على كل الناس وبالذات اللي جسمهم مليان.
أما بقى الإكسسوارات فاخترت عقد طويل عبارة عن حجارة لونها بينك، وفيه حلقات باللون الذهبي، والخاتم والأسورة كمان بنفس الشكل.
أما الحزام فأنا اخترته باللون البيج، وممكن إننا نلبس حزام هافان، لكن أنا فضّلت البيج؛ علشان الشكل العام يبقى أهدى للعين؛ لأن اللون البطيخي ده لوحده لون ظاهر وواضح، ومش بيحتاج إننا ندخّل معاه ألوان تانية كتيرة.
الحذاء كمان اخترناه باللون البيج، وهو استايله روماني وبكعب عالي، والشنطة لونها بيج في أسود، يعني مش لازم إننا نتقيّد باللون البيج بس، لكن ممكن إننا ندخّل معاه اللون الأسود؛ لأنه بيمشي على كل حاجة، وكمان الإكسسوار اللي موجود في الحزام لونه أسود وبكده يكون فيه تناسق بين الشنطة وباقي الطقم.
وفي النهاية لازم تعرفي إن أهم حاجة وإنتِ بتنسّقي لبسك مع بعضه إن عينيكِ لازم تكون مرتاحة للألوان، ومش لازم تقيّدي نفسك بألوان معيّنة مع بعضها.


إضغط لمشاهدة الفيديو:
وفي النهاية أحب أشكر كل الناس اللي ساعدوني علشان أقدر أقدّم لكم كل الجديد في موضة صيف 2010:
ملابس: "منال فلاورز" - تليفون 0108255551
إيشاربات: محل "scarfobia" - تليفون 0105246632
إكسسوار: مدام مها - تليفون 0125671899 - 0126767583
وبكده تكون خلصت حلقتنا النهارده..
لكن كلامنا عن الموضة والجمال لسه ما خلصش..
واوعي تنسي تبعتِ لنا رأيك في حلقة النهارده..
إلى اللقاء،،،