في العام الدراسي الجديد: وداعاً..... لحيرة البنات

قبل بداية كل عام دراسي جديد تبدأ البنات بالدخول في دوامة الحيرة والقلق... والبيت كله يتقلب.... الكبير والصغير بيلف على المحلات والمولات علشان يشتروا مستلزمات المدارس والجامعات... علشان كده قررنا إننا نريحكم من كل الحيرة دي... ونجيب لكم المحلات علشان تختاروا منها اللي يعجبكم....
مدرستك... تفوق وأناقة
نبتدي الأول بالبنات اللي بتغلّب كل أفراد أسرتها معاها كل سنة وهم داخلين المدرسة؛ لأنهم لا يجدون ما يناسب أذواقهم في لبس المدارس، وعلشان كده إحنا جبنا لك كل اللي هتحتاجيه لما تدخلي المدرسة...
يلا بينا نشوف.......
لبس المدرسة
مشكلة تكرار تصاميم مرايل وجيبات المدرسة مشكلة بتواجه كل البنات، واللي بتتحول لمشكلة كل عام في البيوت؛ لأن كل بنوته بتكون عايزة تلبس لبس جديد للمدرسة وللأسف بيكون اللف على المحلات مشكلة صعبة، لذلك وفرنا عليكي اللف وجيبنا لك تصاميم لبعض المرايل والجيبات ممكن تأخذيها لأي ترزي يفصلها.
بس الأول خذي بالك من شوية حاجات:
1- حاولي تختاري الموديلات اللي تناسب شكل جسمك.
2- ممكن تضيفي على الموديلات بعض الإكسسوارات اللي تجمل من شكل التصميم أكثر زي حزام أو زراير أو شرايط.
3- خذي بالك إن لما بتحبي لبس المدرسة وبيبقى شكلك فيه حلو، ده بيأثر بشكل إيجابي على حالتك النفسية داخل المدرسة ويشجعك أكثر إنك تروحي المدرسة وتحبي المذاكرة.
4- فيه حاجة مهمة أوي أحب أقولها لك لما تشتري القميص: وهي إنك لازم تلتزمي بشكل ولون قميص مدرستك، يعني بلاش الابتكار اللي بيحصل في أشكال وألوان القمصان واللي بيحوله لبلوزة أو بودي، وافتكري إنك لازم تكوني شيك بس برضه إنت رايحة المدرسة.
5- فيه بنات كثير بتتمرد على لبس الكرافتات لأنها بتحس إنها كبرت والمفروض إنها ما تلبسهاش تاني، بس إنتي لو فكرتي شويه هتعرفي إن الكرافاتات دي بتزود أناقتك داخل المدرسة، وبتخليكي أشيك، علشان كده خليكي على طول لابساها من أول اليوم الدراسي لآخره.
6- الشرابات بتعتبر من ألذ حاجة بتتلبس في المدرسة لأنه بيبقى فيه منه ألوان وأشكال جديدة باستمرار، بس خذي بالك إنك لازم تلتزمي بألوان الشرابات اللي بتسمح بها المدرسة.
7- ما ينفعش تلبسي شرابات الخروج في المدرسة لأن المدرسة لها شرابات مخصوصة.
8- ما ينفعش تلبسي الشرابات اللي شكلها غريب في المدرسة وتقولي "موضة" لأن المدرسة مش المكان المناسب لها، واحتفظي بها للبيت أو الخروج.

شنطة المدرسة
شنطة المدرسة من الأدوات المحببة جداً لكل الطلاب سواء البنات أو الأولاد، ومعظمهم بينتظروا ميعاد المدرسة بفارغ الصبر علشان يشتروا شنطة المدرسة الجديدة اللي ممكن يكون مرسوم عليها سوبر مان أو سندريلا.
ويا ريت لما تنزلي تجيبي شنطة المدرسة حاولي إنك تراعي شوية ملحوظات:
1- إذا كنتي بتشتكي دايماً من ثقل الشنطة وبتأخذي معاكي كتب كثيرة، يبقى الشنطة ذات العجلات "التروللي" هي الأفضل ليسهل جرها على الأرض.
2- حاولي أنك تختاري الشنطة متعددة الجيوب لأنها ستحمل مزيداً من الكتب والأدوات المدرسية.
3- بالنسبة لأسعار الشنط فهي بتختلف من مكان للتاني، فالأفضل إنك تعرفي الشكل والموديل اللي أنت عايزاه وتسألي عليه في أكثر من مكان قبل ما تشتري.
حذاء المدرسة
بنات كثير لما بتشتري حذاء المدرسة بتحب إنه يكون بكعب مرتفع، ولكن الأفضل إن حذاء المدرسة يكون بدون كعب وعلى الأرض؛ لأنهم بيقضوا معظم وقتهم في المدرسة، ولازم يشعروا بالراحة، وأنا جبتلكم أشكال جديدة ولذيذة لحذاء المدرسة اختاروا منها وقولوا لي رأيكم إيه.
المستلزمات والذي منه...
بتحتاجي حاجات كثير لما بتدخلي المدرسة زي الكشاكيل والمساطر والبرايات والأساتيك والجلاد والأقلام؟؟... البرايات والأساتيك من ألذ وأفضل الأدوات الدراسية، وده لأن دايماً بيظهر منها أشكال جديدة جميلة ومسلية، ودائماً كل الطلاب بيحبوا يشتروها مهما كانت أعمارهم علشان أشكالها المبتكرة وألوانها البراقة.
ودي شوية ملحوظات خذي بالك منها وانت بتشتري مستلزمات المدرسة:
1- اشتري الأستيكة الطرية لأنها أفضل وأكثر عملية من الأستيكة الناشفة.
2- جربي البراية الأول قبل ما تشتريها، لأن فيه برايات بتقصف الأقلام.
3- فيه بنات كثير بتغلط وتشتري الكشاكيل قبل دخول المدرسة وبعد كده بتكتشف إنها مش محتاجه نصفها، وعلشان كده الأفضل إنك تنتظري دخول المدرسة وتعرفي الأشياء والمستلزمات اللي هتحتاجيها وبعدين تشتري.
جاليرى الشنط المدرسية
* صحة وجمال
اضغط على الصورة لمشاهدة الجاليري:
الجامعة... أناقة وعملية
وطبعاً مش ممكن ننسى البنات اللي داخلة الجامعة واللي أكيد بيكون عندها حاجات كتير عايزة تحضرها وتشتريها علشان تكون جاهزة للدخول على عالم الجامعة الواسع، لإن طبعاً اللبس والشكل هو أول مشكلة ممكن إنك تقابليها وإنتي مقبلة على الحياة الجامعية الجديدة
وعلشان كده النهارده قمر 14 هتقول لك على شوية نصايح تقدري تعمليها.
إلبسي اللي يليق عليكِ
في بنات كتير بتبقى عايزة تغير شكلها اللي كانت عليه في ثانوي، فما بتصدق تدخل الجامعة وتحس إنها ممكن تلبس كل حاجة وأي حاجة ممكن تعجبها من غير ما تفكر في الشكل المناسب للبس الجامعة....
ودلوقتي فيه شوية حاجات بسيطة خدي بالك منها وإنتي بتختاري لبس الجامعة...
1- إنك تختاري الملابس العملية اللي تساعدك على الحركة براحتك في الجامعة أو في المواصلات، والملابس العملية المريحة دي بتكون عبارة عن بنطلون قماش أو جينز وبلوزة أو جيب واسعة، ويا ريت كمان تختاري الملابس اللي بيدخل في صناعتها مواد قطنية وده لأنها بتمتص العرق ومش بتسبب حساسية للجلد.
2- يا ريت وإنتي بتختاري هدومك إنك ما تجريش وراء الموضة وشوفي إيه اللبس اللي يناسبك ويناسب جسمك، يعني مش معقول إن علشان الموضة هي الألوان الغامقة إنك تلبسي ألوان غامقة بالرغم من إنها مش مناسبة للون بشرتك.
ودي شوية موديلات وأشكال للبس اللي ممكن بشوية إضافات بسيطة زي بنطلون أو بودي تلبسيه من تحت التونيكات ويكون عليكي أجمل من المانيكان اللي بتعرضه، وإنت هتلاقي زي الموديلات اللي أنا جايباها دي في كل المحلات.
جاليرى البرايات والاساتيك
* صحة وجمال
اضغط على الصورة لمشاهدة الجاليري:
شنطتك كبيرة... علشان تشييييل
أما بالنسبة للشنطة اللي ممكن تشتريها علشان الجامعة؛ فأحسن حاجة هي الشنط الكبيرة لأنك هتستفيدي منها في إنك تحطي فيها الكتب والأوراق الخاصة بيكي، وهتكون عملية جداً .
ودي شوية أشكال لموضة الشنط السنة دي واللي ممكن تنقي منها اللي يناسب ذوقك.
جاليرى لبس الجامعة
* صحة وجمال
اضغط على الصورة لمشاهدة الجاليري:
الراحة تبدأ من رجليكي
ونيجي بقى لغاية الأحذية، واللي ليها أشكال وأنواع وألوان كثير، وخذي بالك إنك مش لازم تشتري حذاء جديد لكل طقم من لبسك لكن ممكن تشتري مثلاً واحد أبيض وواحد أسود لأن اللونين دول هيليقوا مع معظم لبسك.
وخلي شعارك طول ما إنتي في الجامعة هو "لا للكعب العالي"؛ لأنه بصراحة متعب جدا جدا؛ خاصة كمان وإنك ممكن تقضي طول النهار في المحاضرات ومش هيساعدك على الحركة في المواصلات أو في الجامعة ..
وإذا كنتي مصممة تلبسيه فخليه للأيام اللي بيكون عندك فيها محاضرة واحدة أو اثنين.
ودي أشكال مختلفة وأذواق متعددة للأحذية اللي ممكن تلبسيها في الجامعة.
جاليرى الشنط
* صحة وجمال
اضغط على الصورة لمشاهدة الجاليري:
جاليرى الاحذية
* صحة وجمال
اضغط على الصورة لمشاهدة الجاليري: