يا بنات الجامعة .. بلاش الكعب العالى !

طبعا اللبس والشكل هو أول مشكلة ممكن إنها تقابل البنات .. بيحسوا إنهم متلخبطين ومش عارفين يلبسوا إيه ، وعايزين لما ينزلوا يشتروا لبس الجامعة يجيبوا كل حاجة ممكن إنها تقابلهم من غير ما يفكروا أو يسألوا نفسهم السؤال المهم: إيه هو اللبس المناسب للجامعة؟
طبعا بتسألوا أنفسكم دلوقتي وتقولوا إيه ده؟ هو معقول فيه لبس وشكل محدد للطالبة الجامعية واللي المفروض إنها تروح بيه الجامعة ؟ سؤال هتجاوب عليه الأستايلست " سارة محمد قنديل " التي تؤكد أهمية الخطوات التالية و هي :
أولا : اختاري الملابس العملية اللي تساعدك على الحركة براحتك في الجامعة أو في المواصلات والملابس العملية المريحة دي بتكون عبارة عن بنطلون قماش أو جينز أو جيب واسعة وبلوزة وياريت كمان تختاري الملابس اللي بتدخل في صناعتها مواد قطنية وده لأنها بتمتص العرق ومش بتسبب حساسية للجلد.
ثانيا : ياريت وإنت بتختاري ملابسك إنك لا تجري وراء الموضة وشوفي إيه المناسب لشخصيتك .
ثالثا : خلي شعارك طول ما إنت في الجامعة "لا للكعب العالي " لأنه لن يساعدك على الحركة في المواصلات أو في الجامعة
رابعا : بالنسبة للشنط هتلاقي إن الشنط الكبيرة هي أكتر حاجة هتكون مناسبة ليك لأنك هتقدري تضعي فيها الكتب و الملازم .
وبالمناسبة .. فيه كمان شوية نصايح سريعة للأولاد ، لإن كل الحكاية مش بس بنطلون قماش أو جينز وتي شيرت أو قميص، لكن ايضا :
أولا :إنك إذا لبست بنطلون قماش لا ترتدي عليه تي شيرت والبس عليه قميصا عاديا والعكس طبعا بنطلون جينز على تي شيرت.
ثانيا : ليس من اللائق قصة الاسبايكي وإنت رايح الجامعة لأنه يعطي انطباعا إنك طالب مستهتر... ولو بتحب الاسبايكي ممكن تعمله وإنت رايح النادي أو وإنت خارج مع أصحابك.